دولة الهلاهطة

من ملامح دولة «الهلاهطة» أو حالة اللا-قانون و(اللي يجي في دماغه أي حاجة يعملها).. هو ما يحدث من إجراءات عجيبة بغرض السيطرة على الإرهاب في سيناء.
وكأن على أهالينا في سيناء تحمل أي حاجة تخطر في دماغ أي مسؤول مهما كانت هذه الحاجة مجنونة.
بعد التهجير وتدمير المنازل وحظر التجول المُستمر جائت الطامة الجديدة على أهل سيناء بقرار حكومة محلب أفندي بمنع سيارات الدفع الرباعي من الطرق الصحراوية في سيناء ..!!!
أنت مش عارف إن عربيات أهالينا في سيناء أغلبها دفع رباعي؟؟؟.. طيب مش عارف إن طرق ودروب سيناء معظمها جبلية وعرة لا يقدر عليها إلا هذه السيارات؟؟؟؟
معنى قرارك أن السيناوي يبيع عربيته ويرجع يركب الجمل.. أصل السيناوي يا عزيزي المسؤول الذكي يسكن (وياللعجب) في الصحراء وطريقه المُعتاد وعر ولا تستطيعه العربات «السيدان» بتاعة أفندية القاهرة.... حتى لو السيناوي باع (الجنشاطة) ولا (التعلبة) واشترى بدلهم (كيا سيراتو) مش هيعرف يطلع بيها الجبل عند مضارب قبيلته... أنت كده بتقوله أرجع للجمل من تاني لأن الجمل هو فعلًا البديل الوحيد.. طيب ده كلام ناس عاقلين يا أفندية يا بتوع مصر؟؟؟؟
أزيدك من الشعر بيت ... ما تبقى من سياحة في سيناء قائم على بعض الهواة من رواد سياحة السفاري التي هى عبارة عن استكشاف الصحراء بسيارات الدفع الرباعي.. طيب أنت لما توقف للبدوي سياحة السفاري اللي هو عايش عليها وتمنع سيارات الدفع الرباعي من دخول الصحراء عاوز أنت بقه البدوي يشتغل أيه؟؟؟.. مُحاسب في القرية الذكية فرع الشيخ زويد؟؟؟...... ماهو كده مافيش قدامه غير التهريب أو المخدرات أو أي سكة شمال... آمال هيأكل عياله منين؟؟؟؟
طيب خد دي كمان.. المحروس اللي طلع قرار منع سيارات الدفع الرباعي من دخول سيناء طلع القرار بحيث يتفسر على مزاج أي ضابط حسب حالته النفسية.. يعني كان الأمر ماشي بعد صدور القرار على أن المنع لدخول الصحراء فقط أما الطرق الأسفلت مسموح بها.. فجأة قرر بعض السادة الضباط يوم الخميس الموافق 3 سبتمبر 2015 وبدون أي سابق إنذار منع دخول أي عربية (4×4) لسيناء من بابها....!!!!!
أيوه والله زي ما بقولك حصل كده:....
البيه العقيد فلان و الباشا العميد فلان جابوا كرسيين وشمسية وقعدوا على باب نفق الشهيد أحمد حمدي وكل عربية (4×4) يرجعوها ويقولوا لصاحب العربية تعالى بعربة عادية وأنا أعديك. ..!!! ده طبعا على أساس أن المواطن المصري عنده عربية راكبها وعربية احتياطي في سلسلة المفاتيح!
حصل هرج ومرج وخناقات للصبح استمرت حتى يوم الجمعة... ناس رجعت ياما ومعرفتش تعدي النفق.. وناس كلمت وسايط وعدت وهكذا total chaos وكأننا عايشين في غابة.. اللي يكلم ضابط جيش يعديه واللي يلاقي واسطة تسربه واللي ما يعرفش يرجع.. آخر بزرميط.. وفجأة بعد انتهاء يوم الجمعة انصرف البيه العقيد والباشا العميد ورجع الحال على ما كان عليه....!!!!!
طيب الناس اللي ليها أعمال في سينا وليها بيوت ومصايف تعمل أيه دلوقتي لو ما عندهاش غير عربية واحدة مثل معظم المصريين ومن حظها الوحش أنها( 4×4)؟؟؟... يبيعوا العربيات ولا يبيعوا البيوت والمصايف؟؟؟؟؟
طيب أديني عقلك لو أنت مُستثمر من اللي طول النهار بنحاول نقنعهم يجوا يستثمروا عندنا وعندك قرية سياحية في رأس سدر مثلًا هتعمل أيه لما تلاقي أنك ممكن ما تعرفش حتى تروح تبص على أملاكك؟؟؟؟
البلد بقت هلاهطة وبالوظة رسمي وكل واحد بيعمل أي حاجة تيجي في دماغه في دولة اللا-قانون..
مش نفوق بقه يا مصريين؟؟؟