كل ست بيت شاطرة بتحب تعمل أكلها بطريقة مميزة.. كلنا بنعرف نعمل طاجن البامية باللحمة؛ بس مش كلنا بيعمله حلو.. تعالوا نشوف إزاي نعمل طاجن البامية باللحمة الضاني بطريقة جديدة وسهلة وكمان مش هتاخد معاكي وقت.. المقادير: 1 كيلو لحم ضاني 1⁄2 كيلو بامية 1 قرن فلفل أخضر مفروم 3 كوب عصير طماطم 2 ثمرة بصل مفروم 2 فص ثوم مفروم 1 ملعقة بهارات 3 ملعقة كزبرة 1⁄2 ملعقة قرفة 1⁄2 فلفل أسود 1 ملعقة ملح طريقة التحضير:
* شوّحي اللحمة الضاني بشوية زيت نباتي على النار لحد ما تحمّر، وبعد كده ضيفي البصل، وقلّبيهم لمدة دقيقة واحدة بس.
* حطّي الثوم المفروم والفلفل الأخضر مع اللحمة والبصل واخلطيهم ببعض لدقايق، وبعد كده ضيفي القرفة والكزبرة والملح والفلفل الأسود والبهارات.
* ضيفي البامية معاها كوباية مية و3 كوبايات عصير طماطم للخليط وقلّبيهم شوية، وبعدين شيلي الطاجن من على النار وغطيّه بورقة فويل.
* حطّي الطاجن في الفرن بالرف الأوسط في درجة حرارة متوسطة لمدة ساعتين علشان البامية تتسبّك كويس.
* قدّمي طاجن البامية باللحمة الضاني سخن مع رز أبيض، وماتنسيش السلطة.. وبالهنا والشفا.. وبكده تكون وصفتنا خلصت.. أتمنى تكون عجبتك.. ولو عندك أي استفسارات أو عايزة تعرفي طريقة عمل حاجة ابعتيلنا وهنرد عليكي في أقرب وقت.. واستنينا بكرة مع طبخة جديدة..