رسالة الى انصار التغيير نوضح اولا الفرق بين الاكونت و البني ادم اكونت الفيسبوك هوه عباره عن مجموعه من الارقام مسجله فى قاعدة بيانات الفيسبوك باستخدام لغة الكمبيوتر فبالتالى اى نشاط حضرتك بتعمله على الاكونت بتاعك بيؤدى الى زيادة عدد الارقام ديه داخل الحساب و لكنها فى الاخر ارقام , يعني جماد , بل و اقل انواع الجماد قدرة على الفعل , اللى هوه جماد غير محسوس , يعني مثلا مينفعش ترص اكونتين فوق بعض و تعمل بيهم عارضه فيه بعد كده الربع بني ادم ,, الربع بني ادم ده شغلته النقد , يشوف اى فكره ينقضها و ينتقدها و يطلع عين اللى اقترحها من غير ما يطلع بفكره جديده او بديله او يضيف تحسين او اى حاجه ايجابيه , النوعيه ديه غالبا تلاقيها بتقول على سبيل المثال ,, التوقيعات ملهاش لازمه , طيب ايه اللى لازمه , ميعرفش و مبيقولش فيه بعد كده اللى نصه بني ادم و نصه اكونت وده يتميز انه بيطرح افكار لا محل لها من الاعراب او التنفيذ و مصر عليخا اصرار شديد , ساعات تلاقيه بيقول مثلا : ثوره ثوره حتى النصر , ثوره فى كل شوارع مصر , الفكره حلو لو تلاته ينفع يقوموا بثوره , انم اخينا مصمم على طرح فكره خياليه و مصر على تنفيذها باصرار شديد و كمان بيدعوا الناس ليها نيجي بأه للبني ادم الا ربع , الكائن ده تفكيره عقلاني جدا و منطقي و بيطرح افكار رائعه و جميله و منطقيه و بيساهم بفكر بناء للغايه , لكنه مبينفذش , يعني مبيعملش اى حاجه , مهما كان الكلام فده يعتبر اقصى انجاز عنده , الكلام فى النهايه بأه عندنا البني ادم زى مهو متوضح فى الكتالوج , ده بيفكر صح و بينفذ ,, واخذين بالكوا من النقطه ديه , بينفذ , يعني بيعمل انشطه فى مجال الفعل , طيب اخينا ده هل لازم مثلا نقوله انزل مظاهره ينزل و بشارك فى جميع الانشطه الممكنه على الارض , اكيد طبعا لأ , بس على الاقل صاحبنا ده عنده استعداد يعمل و ينفذ و ينجز اللى ربنا يقدره عليه و اللى ظروفه تسمحله بيه , يعني لو فيه عشر حاجات ممكن تتعمل على الارض صاحبنا ده ظروفه تسمحله يعمل تلاته منهم فبيعملهم مبيتأخرش ,, النوع ده من الكائنات , هوه اكتر نوع مهم بالنسبالنا و فى نفس الوقت اكثرهم انقراضا سلام
