- مباراة الإنتاج : وحدث ما حذرت منه بالفعل فى مقالى السابق ، بضرورة الجدية فى هذه المباراة ، وعدم الإستهتار بها لأنها الأهم ، حتى ولو كانت مع أضعف فرق الدورى ، وضرورة الخروج من حالة الإنتشاء بعد مباراة البايرن ، وتجهيز اللاعبين وإستشفائهم ، لكن الحذر لا يغنى عن القدر !! - إدارة الأهلى : لازم تطالبوا بحكام أجانب لمباراياتكم ويبقى حد من لجنة الحكام عنده دم يقول لأ !! - حسن مصطفى : انت شكلك ماشى على خطى سيدك حسام بإستفزاز جمهور الأهلى ، وبقيت أحد المكروهين من جماهير وإدارة الأهلى ، إشبع بجمهور وإدارة الزمالك وإتمسح بيهم قوى برضه هتفضل من اللى رميناهم برة النادى بلا رجعة وبلاش ، يعنى لوكنت لعيب وليك فى الكورة كنت قولت ايه بقى !! دا إنت طول عمرك إحتياطى ولا نسيت ، دا حتى ابوجلبان لعبك عليك !! وعاشور وهو عنده 18 سنة قعدك على الدكة تطرقع صوابعك وتطول شعرك ، ولعبت فى نادى الوحدة السعودى الهزيل ومشوك ، يعنى ما تتكلمش عن أبوتريكة وتمسح جوخ لشيكابالا بالمنظر دا ، ولو معجب بشيكابالا للدرجة دى قوله أخطائه وإعرضها عليه ، بس الأفضل تعرضها للى يقدرها !! وماتفهمنيش صح !! - لجنة الحكام : المعروف دائماً إن حكام مباريات الأهلى والزمالك يكونوا دوليين ، أما حكام مباراة الإنتاج فكانوا حكام حضانة دولية !! لو إتجمعت أخطاء التحكيم فى كل مباراة على الأهلى وإتبعتت للفيفا هيقولوا أكيد الفريق دا الحكام عاوزين يخسروه !! - إتحاد الكورة : ما تقولوا إنكم عاوزين تكسروا إحتكار الأهلى لبطولة الدورة السنة دى وخلاص ، كنا وفرنا التعاقدات والمصاريف ومبروك للزمالك وخلاص عادى يعنى . - مدحت الحوفى : الحوفى إسم على مسمى فعلاً سبحان الله ، كنت لاعب فى الترسانة على قدك و بقيت حكم وبرضه على قدك !! - المساعد سيد رجب : يا عم سيبك من التحكيم ، الفرن ماله ما كان بيكسب وزى الفل !! - أحمد فتحى : مش فاهم إنت يا إما تبقى نجم المباراة يا تبقى عالة على الفريق !! - جوزيه : انا مش شايف برضه فى جونيورإنه مميز عن أحمد شكرى أو عبدالحميد شبانة أو عفروتو ، والمصيبة تصريحك الأخير بأنه ليس مهاجم صريح ؟ يعنى نبقى جايبين عبدلله السعيد ووليد سليمان وعندنا تريكة وبركات ونجيب لاعب تانى غير اللى اعارناهم علشان خاطره !! - سيد معوض: يا راجل ولا عرضية على راس او رجل لعيب من الاهلى ، وبعدين لازم يا نجم تدرب ترفع برجلك اليمين عيب دا انت دولى ، بس انت ابقى هاتها معاك الماتشات الأول !! - عبدالله السعيد : انا نفسى افهم الضربة الحرة الاخيرة ما سددتهاش فى المرمى مباشرة ليه ولو فى نص الجون حتى !! - عماد متعب : حرام عليك والله اللى بتعمله فينا دا !! ارجع يا عمدة بلاش تغيب !! - جدو :لماذا لم تلعب مباراة الإنتاج إنت كنت مصاب ولا ايه الف سلامة !!