- قدمت استقالتك متأخراً! كان المفروض تقدمها بعد ما وصفوك بإنك فاشل وفشنك وآخرتك خدمة اجتماعية!! ورغم انك من سبتمر 2010 وانت في خدمة الزمالك.. لكن آخرتها تنطرد من الملعب!!. * محمود معروف:
- قلت أن الأهلي سيفوز بالدوري طول ماجلال إبراهيم باقي.. ربنا يديمها على الزمالك نعمة ويحفظها من الرحيل، كأن المستشار حيلاعب الأهلي لوحدة بعد ما يعمل زي أبو لمعة زمان.. ويلبس 11 فانلة و11 شورت فوق بعض ويباصي لنفسه وينفرد بالجول.. بس المشكلة: إن الحكم مش حيعرف يحسب أوفسايد على الأهلي زي يوم المحلة؟!!.
* الكابتن أبورجيلة :
قلت يوماً: إن مصر كلها بتحارب الزمالك مش عارف ليه؟! وديت الزملكاوية فين ياراجل؟!!. . لسه لغاية دلوقتي مش عارف؟..أنا هأقولك بس بيني وبينك.. نكاية في محرر محسوب على الزمالك.
* إلى إدارة التوجيه المعنوي
- ارسلوا أصغر مراسل عسكري عندكم لتغطية الحرب التي بدأ التراشق فيها بين الأندية واتحاد الكرة.
- حلف الهاتو بين الأهلي والاتحاد السكندري بدأ قصف الجبلاية لإسقاط النظام.. قبل أن يبدأ خريف الكرة المصرية.
* نادي الزمالك:
عناداً مع الأهلي راهنت على الحصان الخسران.. بكرة تندم يا جميل.
* اتحاد الكرة :
- واضح إن مستقبلكم مش زاهر.
* سُمعة :
- انت الناطق الرسمي باسم الجهاز الفني للزمالك.. أول مرة أشوف ناطق صامت والكل بيتكلم.!!
* ماكيدا :
- ارجع حمش تاني قبل بدلاء الدكة مايدبرولك مكيده.
*لجنة الحكام :
- مسلسل الفضايح مش كان حصريا؟!.. واللا الموسم ده الكل حياخد نصيبه .
* أحمد عيد :
- ياااااعبد الملك: هي أول القصيدة كفر؟!.. تكتب سطرين وتفوت ثلاثة؟!!.
* جوزيه :
- سلامتك: متصدقش.. التسمم مش بسبب أكله فاسدة.. ولكن بسبب نفوس حاسدة و قلوب حاقدة وجهالة ناقدة !
* شيكابالا :
تصور!..احتفالك بالفوز بدون الإساءة للأهلي أصبح خبراً يستحق النشر!!.
* إبراهيم حسن :
- صدق الدوري من غيركوا مالوش طعم ولا لون ولا يؤثر في عباد الشمس الأحمر.؟.. مافيش تصريحات نارية ولا اتهامات بمجاملة الأهلي ولا تهديد بالضر. لا لا لا.. كده مش حلو ارجع بسرعة خلينا نلاقي حاجة نكتبها.