يري أنه مقدر علي المستويين الفني والإنساني خارج مصر أكثر بكثير من داخلها.. وهذه المسألة قال إنها تحزنه جدا لأن فرحته الحقيقية بأي خطوة ناجحة تكون أفضل وسط أهل بلده، مشيرا إلي وجود تجاهل متعمد لأي تفاصيل ترفع من شأنه أو تصيد متعمد لأي أخبار تؤذيه.. وفي الحوار التالي يتحدث سعد الصغير عن تجربته في مهرجان موازين بالمغرب والتي رسخت لديه هذه القناعة فضلا عن رؤيته وموقفه من أبوالليف كمطرب شعبي وجديده في عالم الغناء والتمثيل.. سألناه: ألا حدثتنا عن تجربتك في المغرب مع مهرجان موازين؟ - رشحتني إدارة المهرجان للمشاركة ونيل التكريم فوافقت بشرط أن أصطحب معي 55 فردا من فرقتي وبالفعل سافرنا وهناك عرفت الفرق بين سعد الصغير داخل مصر وخارجها. كيف؟ - في بلدي ملقتش غير ناس عايشة عشان تدمرني ويجروا بالمشوار ورا أي أذي لي ويفرحون جدا لما تحصلي مصيبة ويزعلوا لو طلعت منها وفي وقت الشدة وجدت أخباري مالية الدنيا كلها والجرايد كانت عمالة تقطع في لكن لما ربنا كرم وطلعت براءة محدش فكر يكتب عني كلمة واحدة تبين تفاصيل ده، دا غير أن تقديري كفنان ضعيف جدا. وخارج بلدك؟ - خارج بلدي تعاملوا معايا علي أساس أني عمرو دياب مش قادر أقولك أد أيه اهتموا بيا لما ذهبت إلي لمغرب في مهرجان موازين الناس هناك احترموا فني جدا ووافقوا علي كل الشروط لاشتراكي في المهرجان لأنهم عارفين إن سعد الصغير فنان تقيل، والأكثر من ذلك أنهم وفروا لي حراسات خاصة وكل أشكال الراحة لي ولأفراد فرقتي وتاني يوم بعد الحلفة اللي غنيت فيها وحضرها 100 ألف متفرج عملولي مؤتمر صحفي كبير اشتركت فيه صحافة معظم الدول العربية والناس كلهم أشادوا بي وشجعوني وكتبوا عني أحلي كلام. هل يمكننا القول إن سعد الصغير يعاني من سوء في مستوي تقديره في بلده؟ - فعلا.. أنا رحت أمريكا وغنيت وسط أهم الفرق العالمية وخليتهم يغنوا بالعربي معايا وعملت فيلم وثائقي بتكلم فيه عن جمال وتحضر مصر وقلت إن مصر بلد عظيمة ولا علاقة لها بالارهاب والتطرف وفي أمريكا قدروني جدا إنما هنا في حاجة غلط وطول الوقت توجد مشاكل واحباطات. ماذا عن الكليب الذي صورته وأنت في المغرب؟ - اسمه «إحنا ولاد ميت نامه» وأخرجه كامبا وفكرته إني وأصدقائي الصعايدة نحاول دخول حمام سباحة هناك ويمنعنا الأمن فنرد عليهم «إحنا ولاد ميت نامة» إحنا ولاد أبوالغيط واللي فاكرها قيامة يخبط راسة في الحيط» وندخل نسبح ثم نغني في حفل ليلي كبير. هل تري أن سوء التقدير الذي تتعرض له في مصر سببه أنك فنان شعبي؟ - لا دا راجع لأن في ناس هدفها هو تدميري أما المطرب الشعبي ده علي العين والراس أنا فخور أني شعبي لأن مش أي حد يقدر يغني شعبي، بالعكس أنا انتقدت جدا نادر أبوالليف وزعلت منه لما طلع مع معتز الدمرداش في برنامج 90 دقيقة وقال أنا مش شعبي.. ازاي مش شعبي يعني وهو طالع بيقول أنا مش خرونج ولا بس خيشة واضح إن في حد فهمه أن المطربين الشعبيين دول حرامية ومسجلين خطر علشان كده طلع يتبرأ من لونه. بالمناسبة.. ما رأيك في أبوالليف كفنان؟ - بحبه جدا وصوته حلو وعامل حالة جديدة وعشان بحبه حبيت أعرفه أنه غلط لما قال أنا مش شعبي ولما معملش في ألبومه أي أغنية تنفع تتغني لايف في الأفراح والحفلات.