تنظر محكمة جنح أول مدينة نصر القضية رقم 11564 والمتهم فيها لواء شرطة بالمعاش ونجلاه وابنته والتي تم حجزها للحكم في 2009/2/23 . ترجع وقائع القضية إلي قيام المستشار «م. ع» بوزارة العدل بتقديم مذكرة لرئيس نيابة مدينة نصر يتهم فيها زوجته واباها لواء شرطة ونجليه بكسر باب شقته والاستيلاء علي ما بها من منقولات وأوراق وتم تحرير المحضر رقم 20629 جنح قسم أول مدينة نصر. النيابة: ما قولك فيما هو منسوب إليكي من ارتكاب واقعة سرقة المنقولات المبينة بالأوراق بالمذكرة المقدمة من «م. ع» قاض بمحكمة؟ - الزوجة: الكلام ده مش صحيح. النيابة: ما الذي حدث إذن؟ - الزوجة: هو اللي حصل إن في خلافات بيني وبين زوجي القاضي، والخلافات وصلت لحد ما تعدي عليا بالضرب وطردني من مسكن الزوجية وكل الكلام اللي بيتهمني به مش صحيح وبيقول كده علشان يتهرب من القائمة اللي عليه وعلشان أنا بتهمه بالضرب وهو عاوز يضغط عليه علشان أتنازل. النيابة: وما هو تعليقك لما قرره سالف الذكر بالمذكرات المقدمة من اتهامك بسرقة المنقولات وإتلاف باب المسكن بالاشتراك مع كل من «أ. أ» و«ع. أ» و«د. أ»؟ - الزوجة: الكلام ده مش صحيح وده كله علشان يجبرني علي التنازل عن شكوتي في التفتيش القضائي. النيابة: وما تعليقك لما قرره سالف الذكر؟ - الزوجة: معرفش هو بيقول كده ليه بس أكيد هو متفق مع طليقي. النيابة: أنت متهمة بسرقة المنقولات المبينة بالأوراق بمذكرة القاضي «م. ع» في 2007/5/29 . - الزوجة: الكلام ده محصلش. النيابة: كما أنك متهمة بالإتلاف العمدي لباب الشقة رقم «1» الخاص بالقاضي «م. ع»؟ - الزوجة:الكلام ده محصلش. النيابة: ما قولك فيما هو منسوب إليك أنك متهم وآخرون بإتلاف المنقولات وسرقتها من المجني عليه المستشار «م. ع»؟ - اللواء: الكلام ده غير صحيح. النيابة: ما الذي حدث إذن وما هي ظروف ضبطك واحضارك؟ - اللواء: اللي حصل أن ابنتي تزوجت الأستاذ «م. ع» من حوالي ثلاث سنوات وهو كان مبيصرفش علي البيت والبيت كان ناقص أجهزة كتير وماكانش بيديها فلوس ومن حوالي سنتين اتطلقوا وبعدين جت ترجعله تاني وبعدين اتطلقوا تاني لأنه تعدي عليها بالضرب وكان بيعاملها معاملة سيئة وعملتله محضر في مدينة نصر وقدمت فيه شكوي في التفتيش القضائي وبعدين فوجئنا أنه اتهمها هي وأنا وأخواتها أننا رحنا البيت وسرقنا العفش والكلام ده غير صحيح لأنه هو اللي أخذ العفش وأخذ كل حاجة وكل ده مفبرك علشان يضغط علي بنتي علشان تتنازل عن حقوقها وهو ده كل اللي عندي. النيابة: ما قولك فيما قرره حارس العقار بالمحضر في 29 / 5 / 2007 من أنه اتهمك ونجلتك وشقيقيها تقومون بفتح العين ملك الشاكي وإخراج منقولات منها؟ - اللواء: الكلام ده غير صحيح وده البواب بتاعه وطبيعي أنه يشهد معاه.
