· أحمد عز والراجل بتاع السيراميك طلعوا امتي.. وعملوا الثروات دي منين والناس مش لاقية العيش الحاف · لو كنت طلعت غني كنت هبقي «وسخ» ومكنتش هاقول الكلام ده · تنبأت بمقتل السادات في قصيدة البتاع.. وقلت «علشان يعيش علطول عين حرس للبتاع وبرضه مات مقتول» · الناس في البلد مش لاقية الطعمية وأحمد عز بيكسب 40 مليار جنيه في السنة.. إزاي؟! · باقول لأشرف زكي فُوق.. متبقاش أهطل.. لأن مصر طول عمرهم بيقولوا عنها هوليود الشرق · أنا مع حذف الديانة من البطاقة.. وانت سألتيني اسمك إيه قلت أحمد فؤاد نجم بتشتغل إيه أقولك شاعر تقوليلي ديانتك إيه هقولك انت مال أمك في حلقة تليفزيونية تم منع إذاعتها فتح أحمد فؤاد نجم النار علي الرئيس الراحل أنور السادات والرئيس الحالي محمد حسني مبارك وأكد أن عبدالناصر قتل علي يد طبيبه الخاص. كان برنامج «ضد التيار» علي قناة روتانا سينما استضاف نهاية العام الماضي الشاعر الكبير أحمد فؤاد نجم في حلقة أثارت جدلاً وصل إلي حد منع الحلقة من البث وبعد عام من المنع استطاع البعض تسريب الحلقة وبثها علي شبكة الإنترنت «صوت الأمة» حصلت علي نسخة من الحلقة الممنوعة وننشر تفاصيلها والتي كشف خلالها نجم أخطر الأمور والأسرار! تبدأ الحلقة بسؤال للمذيعة حول الرئيس عبدالناصر وهل قتل كما أشار نجم من قبل؟ ويأتي رد نجم كقنبلة مدوية وقال إنه بكي علي عهد عبدالناصر رغم بلاويه السودة اللي عملها ومش لاقيين مسمار في جزمته دلوقتي ولم أشعر بقيمته إلا متأخراً ولكنه أخف وطأة من البلاوي السودا الموجودة الآن. المذيعة: التاريخ ليس لعبة لقد أخضعت التاريخ لإحساسك لما قولت إن عبدالناصر قتل علي يد طبيبه الخاص، وقولت إن سعاد حسني قتلت ما هو دليلك؟ نجم: نعم عبدالناصر قتل علي يد طبيبه الخاص الدكتور علي العاصي والذي كان عميلا لإسرائيل، أما عن سعاد حسني أكيد قتلت وياريت تبصوا إزاي جندها صفوت الشريف وعن مصدر معلوماتي فهي من المنبع فكان الدكتور علي العاصي عميد معهد العلاج الطبيعي في القاهرة بجانبي في زنزانة واحدة وكان يقوم بعمل العلاج الطبيعي لعبدالناصر وبعد مقتل عبدالناصر وأثناء زيارة بيجن لمصر قال لي علي العاصي أشوف وشك بخير وكان واخد إعدام فسألته هل ستنفذ الاعدام غدا فقال لا أنا باي باي فسألته إزاي فقال لي الراجل بتاعنا جاي بكره أصلهم رجالة مش بيتخلوا عن رجالتهم زي الأمريكان. المذيعة: ماذا حدث لك مع السادات قلت عليه شعبان البقال ووصفته بغول انتيكة لون الليل والهوا وقولت عليه المجنون أبوبرقوقة وزبيبة عيب ياعم نجم هل يستحق السادات كل الشتيمة دي مش فاكر له أي حاجة عملها؟ نجم: دي مش شتيمة دا شوية أنا نفسي أطلعه من قبره واقتله بأيدي وأنافاكر الوكسة اللي حطنا فيها دلوقتي واللي فيه العرب من اللي عمله السادات. المذيعة: إزاي مش فاكر له حرب أكتوبر؟ افتكر له إنه كان صاحب المبادرة وقرار النصر. نجم: نصر إيه هوكل حاجة يسرقوها ولا إيه واحد يقول الضربة الجوية الأولي والتاني يقولي بطل الحرب والسلام، والنصر اللي جايبه العساكر والضباط ولادنا وبعدين أدي حرب أكتوبر حصلت وانتصرنا فيها تعالي بقي بصي علي الشعب المصري في الشارع وقوليلي دا شكل شعب منتصر؟ سرقوا النصر إحنا بنموت بعض علي العيش والشعب اللي حارب وهزم إسرائيل وأمريكا بيموتوا بعض علي الرغف الحاف سادات مين ومبارك مين دول. المذيعة: كنت عايز السادات يعمل إيه يكمل الحرب لما يقضي علي آخر جندي مصري؟ نجم: محدش قال كدا مين اللي قال الكلام دا حرب إيه مين قاله يعمل سلام منفرد مع إسرائيل إحنا كان معنا السوريين إزاي يروح يعمل سلام منفرد؟ المذيعة: قولت في قصيدة البتاع إنك تنبأت بمقتل السادات؟ ففي أي جزء قلت ذلك؟ نجم: آه قولت: آدي اللي جابة البتاع جاب الخراب مشموم لأن حتة بتاع مخلب لرأس الغول باع البتاع بالبتاع وعلشان يعيش علطول عين حرس للبتاع وبردضه مات مقتول. المذيعة: إيه هو بقي البتاع؟ أنت استخدمت لفظ ممكن يكون عند بعض الناس بذئ شوية؟ نجم: لا مش بذئ البتاع دا مفردة عبقرية مش موجودة في أي لغة في العالم وقصدت جزءاً من القصيدة بالبتاع أي الانفتاح الاقتصادي لأن مفيش رئيس جمهورية يقف يقول اللي مكسبش علي أيامي عمره ما هيكسب دا منطق؟ ده مش رئيس جمهورية اكسب زي ما أنت عايز طالما هتديني حقي؟ حقي إيه بس دا ممكن يكون رئيس جمهورية وهاتوا التسجيلات واسمعوها مش ممكن دا يكون رئيس مصر. المذيعة: أنت قولت مين يقدر ساعة يحبس مصر فهل في رئيس من الرؤساء الثلاثة قدر يحبس مصر؟ نجم: آه الموجود دلوقتي بس دا مؤقت لأن الحالة اللي فيها مصر حالة مؤقتة وشكرا للرئيس حسني مبارك أنه خلي الناس يصحوا. المذيعة: أنت متحامل جداً علي الرئيس حسني مبارك ولو كانت الكلمة سلاحك ياعم نجم، والكلمة هي اللي بتهاجم بيها النظام وبتهاجم بيها الشخصيات، وبتهاجم بيها الاوضاع في مصر ممكن، بالكلمة دي كنت تقدر تتحاور بيها مع النظام والشخصيات بما فيهم الرئيس مبارك؟ وكان رد نجم: أتحاور هو أنا بشوفه، وتعود المذيعة لتسأل: أنت تقدر لو عايز تشوفه هتشوفه؟ نجم: مين اللي قالك الكلام دا هو الرئيس حسني مبارك حد يعرف يشوفه هو في حد يعرف هو بينام فين وبعدين انت بتسأليني أني أطلب من مكتبه أني أقابله تقدري تقوليلي فين مكتبه، دا الرئيس مبارك أول ما جه أنا كنت متفائل بيه جداً لأنه قال أنا جاي علشان أقضي علي الفساد ومحدش فوق القانون. المذيعة: أنت لم تهاجم الرئيس المصري غير مؤخرا يعني طول 18 سنة تقريبا متكلمتش؟ وليه متمش اعتقالك رغم أن القانون بيعاقب أي حد بيسب أي حد؟ أولا أنا لم أهاجمه لأني كنت مصدقه لكن أنا مشتمتوش أنا بطلب منه يبقي مسئول عن كلمته لما قال أنا جاي علشان أقضي علي الفساد والمفسدين، وأنا أيدي نظيفة ولساني عف أنا بطلب منه دا لأن دا حقي لأننا أصحاب البلد مش سياح وهو هييجي ويمشي لكن الشعب المصري هو اللي قاعد وهيشيل الطين. المذيعة: الرئيس مبارك سابك حر طليق ولو كنت في عصر السادات أو عبدالناصر كان زمانك في السجن؟.. والراجل سيبك حر طليق لأنك في نظام ديمقراطي؟ نجم: أولا أنا أتحبست حصل إيه وبعدين نظام إيه اللي ديمقراطي أنت بتضحكي عليا ولا بتضحكي علي نفسك البلد كلها مسجونة. المذيعة: أنت قولت إن شاء الله ييجي مين أن شاء الله ييجي اليهود بس يخلصونا من اللي موجودين؟ نجم: إن شاء الله ييجي الهنود الحمر يخلصونا من العصابة دي دي مش حكومة دي تشكيل عصابي يابنتي دا تشكيل عصابي لما واحد اسمه أحمد عز يكسب في السنة 40 مليار جنيه إزاي يعني الناس اللي في البلد مش لاقيين الطعمية إزاي ومين أحمد عز دا ويقرب لمين هتلاقيه صديق الباشا ولي العهد، وهتلاقي غيره وغيره والراجل بتاع السيراميك دا إيه الناس دي طلعت أمتي وعملوا الثروات دي منين وإحنا مش لاقيين العيش الحاف الناس بتموت علشان العيش الحاف. المذيعة: لو كنت طلعت غني كنت هتقول نفس الكلام دا؟ نجم: لو كنت طلعت غني كنت هبقي «وسخ» مقولش الكلام دا، غني يعني حرامي لأن في بلد مش لاقية العيش اللي معاه مليون جنيه يبقي حرامي. المذيعة: هل أنت ضد أو مع قرار أشرف زكي نقيب الممثلين بعدم عمل الفنان العربي في مصر في السنة أكثرمن عمل واحد؟ نجم: أنا ضد دا طبعا وبقول لأشرف زكي فوق متبقاش أهطل لأن مصر طول عمرها كانوا بيقولوا عليها هوليود الشرق، هو فريد الأطرش وأسمهان كل الفنانين العرب اشتغلوا وفي مصر، دي مش ملك حدولما هو والمقصود أشرف لما يقول كدا يبقي هندخل في حدوتة بقي مصر بتاع مين بتاع المسيحيين ولا بتاع المسلمين إيه دا مصر أكبر من الكلام دا مصر أكبر من نقابة الممثلين ونقيب الممثلين عيب بقي. المذيعة: أنت ضد ولا مع حذف خانة الديانة من البطاقة؟ نجم: دي لازم تتحذف لأن دا عملها الاستعمار التركي الملعون وبعدها الاستعمار الانجليزي يعني لو أنا ماشي وانت سألتيني انت اسمك إيه هقولك أحمد فؤاد نجم بتشتغل إيه ياعم نجم أقولك بتشتغل شاعر تقوليلي ديناتك إيه هقولك وانتي مال أمك أنت مالك ومال ديانتي دي علاقة بيني وبين ربنا. المذيعة: أنت ضد أو مع السيدة المأذونة؟ وهل أنت ضد أو مع عملية التحول الجنسي؟ نجم: أنا مع السيدة أن تكون مأذونة وبخصوص التحول الجنسي أنا معاه لأني مع العلم علطول.
