همه الإخوان المسلمين والسلفيين عايزين ايه من المصريين والشعب المصري اللي انضحك عليهم من الإخوان والسلفيين زي ما انضحك عليهم قبل كده من الحزب الوطني وبالبلدي كده الإخوان المسلمين والسلفيين ما يفرقوش حاجة عن الحزب الوطني الفاسد وممكن علي رأي صديقي الحاج سيد الذي يصلي معي بمسجد الرحمن بالزمالك قاللي الحاج سيد: إن الإخوان والسلفيين كدابين ونصابين بيداروا في الدين وانه المفروض الإخوان المسلمين والسلفيين نطلق عليهم «الحزب الوطني للمعاملات الاسلامية» والحزب الوطني كان فاسد وظالم وحرامي وكنا عارفين وساكتين لكن الاخوان والسلفيين بيداروا في الدقن التايواني وعلامة الصلاة اللي في قورتهم وتشبه علامة «السيارة الميتسوبيشي اللانسر»، كل الاخوان والسلفيين ضاربين الدقن التايواني وزبيبة الصلاة الميتسوبيشي ونازلين كدب ونصب واتفضح كذبهم ونصبهم في قضايا «خيرت الشاطر وأبوإسماعيل وأمه والبلكيمي النائب بتاع المناخير» ومع ذلك لسه فيه ناس من المصريين معمولهم غسيل مخ ومؤيدين للإخوان والسلفيين وعايزين يحولوا «مصر إلي حرب أهلية» والدليل اللي بيحصل في العباسية من بلطجة المعتصمين بتوع الاخوان والسلفيين اللي عايزين يخربوا البلد أكثر ما هي خربانة. الإخوان والسلفيين بيفكروني بموقف شفته بعيني عام 1997 كان فيه مسابقة ملكة جمال مصر عام 1997 بقاعة المؤتمرات بمدينة نصر واثناء كواليس الحفل لفقرة المايوهات البكيني كانت توجد سيدة محجبة واقفة مع ابنتها رانيا المشاركة في المسابقة وقبل دخول المتسابقة رانيا التي كانت ترتدي المايوه البكيني نادت امها المحجبة عليها وقالت لها «يا رانيا اوعي تنسي تقرئي الفاتحة والمعوذتين علشان تكسبي» وظهرت رانيا وهي ترتدي المايوه البكيني وقرأت الفاتحة والمعوذتين وهي عريانة وخسرت رانيا لأنها كانت بتضحك علي نفسها وعلي ربنا. والإخوان والسلفيين زيهم زي رانيا اللي كانت لابسة البكيني وامها بتقولها ابقي اقرئي الفاتحة، الإخوان والسلفيين بيضحكوا علي نفسهم وعلي ربهم وإن شاء الله ربنا حيكشفهم اكتر واكتر الايام السودة اللي جايه. نشر بالعدد رقم 595 بتاريخ 5/5/2012
