تنشر «صوت الأمة» نص التحقيقات مع الضابط محمد فؤاد، معاون مباحث قسم شرطة السلام، المتهم بقتل شاب وإصابة آخر بمنطقة النهضة أثناء محاولة القبض عليهما لاتهامهما بحيازة مواد مخدرة بتاريخ 4 يونيو الماضى، فضلاَ عن أقوال القوة المرافقة له . أقوال الضباط المتهمين اسمك وسنك ؟ ج: اسمى محمد عادل محمود فؤاد: 27 سنة ضابط بقسم السلام س: ما قولك فيما هو منسوب إليك من انك متهم بصفتك موظف عمومي باستعمال القسوة معتمادا علي وظيفتك بان قمت باطلاق اعيرة نارية مما اسفر عن وفاة شاب واصابة اخر؟ ج: محصلش ، الاهالى اللى اعتدت عليا انا وباقى القوة
س: ما تفصيلات ما حدث؟ ج: اللى حصل انه فى يوم 4 يونيو 2017 ، حوالي الساعة 9 بالليل كنت مع قوة امنية بميكروباص ، بنتابع الحالة الامنية فى المنطقة ، النقيب اسامة محمد شاف مقروصة ، قاعد على القهوة وبيرمى حاجة من ايده شك انها حشيش، فنزلنا نضبط المتهم ، وفجاة لقينا الاهالى اتلمت علينا وبداوا فينا ضرب وحاولوا منعنا من ضبط المتهم وسمعنا طلقة خرطوش منعرفش مصدرها س:اسمك وسنك وجهة عملك ؟ ج: اسمي أسامة محمد ابرهيم 27 سنة واعمل نقيب شرطة بمباحث قسم شرطة السلام . س: ما قولك فيما هو منسوب إليك من انك متهم بصفتك موظف عمومي باستعمال القسوة مع معتز بالله محمد فاروق اعتمادا علي وظيفتك بان قمت بالتعدي علية بالضرب محدثا إصابات الموصوفة بتقرير الطب الشرعي علي النحو المبين بالتحقيقات ؟ ج: محصلش ده هو اللي اعتدي عليا انا والقوة بالضرب في مكان الواقعة . س: ما تفصيلات ما حدث؟ ج: اللى حصل انه فى يوم 4 يونيو 2017 ، حوالي الساعة 9 بالليل كنت مع النقيب محمد فوائد وأمناء الشرطة مصطفي بسيوني وتامر رمضان وطارق بنداري وكان معانا عربية ميكروباص وإحنا بنلف في شارع السنترال وانا راكب العربية في الكرسي اللي خلف السواق شفت محمود احمد السيد عبدا لهادي وشهرته (مقروصة) قاعد علي قهوة الحبايب وشوفته بيبص في ايدة وكان فيها حشيش فنزلت بسرعة انا والأمين تامر، وأول لما وصلت ليه، وهو مش واخد بالة مني مسكت أيده والناس اللي كانت في القوة كانت شايفة انه كان معاه حشيش وانا بشدهعلي الميكروباص لقيت جمبة واحد أسمة معتز منعني وقال ليا مش هتطلع بية من هنا وانا قلت ليه هاخده ونتفاهم في القسم وانا بشدة لقيتهة بيعافر معايا وعاوز يهرب ،ولقيت معتز بيضربني بأيده في ظهري من الخلف ومرة واحدة لقيت الناس اتلمت والدينا ولعت علينا والضرب اشتغل علينا من كل ناحية ودخلت أخته هاجر والناس اللي كانت في القهوة اتلموا علينا وانا كل همي الولد اللي مسكته والحرز وأحافظ علي السلاح بتاعي ، والأمناء بداوا يساعدوني أخد المتهم واحطة في العربية فلقيت شقيقة معتز واسمها هاجر بدات تتعدي عليا بالضرب والسب ومسكتني من رقبتي ومن أيدي علشان تهرب محمود ومعتز كان يضربني من ظهري ومن جنبي وكان معاة اله حادة بس مركزتش هي اية من كتر الزحمة، والنقيب محمد فؤاد حاول يدافع عني وحط جسمه قدامي علشان يشيل عني الضرب فهاجر مسكت في النقيب محمد وهما فضلوا يشدوا في بنطلون محمد فؤاد والحزام بتاعه اتفك ، فمسكه وفضل يهوش بية علي الناس علشان نطلع من تحت ايديهم وكان الطبنجة بتاعتة هتقع منه علشان البنطلون مفهوش حزام فطلع السلاح الميري وبيهوش بيه علي الناس، وفجاة سمعنا طلقة خرطوش فكل الناس واحنا كمان وطينا ودخلت المتهم جوة العربية ، وبدات هاجر ومعتز والناس كلها تكسر في الميكروباص ومحمد فؤاد وهو بيهوش بالسلاح هاجر مسكت السلاح الميري هي ومعتز وخرجت 3 او 4 طلقات وبعدين ركبنا العربية ومشينا بسرعة . المتهم بحيازة مواد مخدرة س: اسمك وسنك وعنوانك وجهة عملك ؟ ج: اسمي محمود احمد السيد 25 سنة عامل بمحل قطع غير سيارات.
س: ما قولك فيما هو منسوب اليك من انك متهم بأحراز جوهر مخدر الحشيش بقصد الاتجار بدون ترخيص وفي غير الاحوال المصرح بها قانونا والتعدي علي النقيب محمد عادل محمود فؤاد والنقيب أسامة محمد ابرهيم واستعمال القوة والعنف معهم بصفتهم موظفين عموميين؟ ج: محصلش . س: ما الذي حدث وما هي ظروف ضبطك وإحضارك؟ ج: اللي حصل انا كنت قاعد علي قهوة جنب بيت معتز وكان معانا ناس أصحابنا علشان نتفرج علي مباراة الأهلي وقاعدين عادي لقيت ميكروباص وقف ونزل منه ضابط شرطة وقال ليا أنت بترمي اية في الارض وطلع كشاف التليفون ، وقعد يدور في الأرض ملقيش حاجة فقام مفتشني ملقيش حاجة معايا وكان عاوز يخدني يركبني ميكروباص ،فمعتز بيقول ليه أنت هتاخده ليه فضربه في صدره، وقال له انا محامي و مش معايا حاجة ومش من حقه ياخدني فراح زقة تاني وحاول يدخلني العربية وجة ورايا واختة جت يكلموا الضابط فقام ضربهم وزقهم وشتمهم والضابط محمد فؤاد نزل من العربية وساعتها الناس اتلمت فطلع السلاح بتاعه وضرب نار علي الناس اللي واقفة علشان يبعدهم عن العربية وضرب 3 طلقات منهم واحدة في الهواء وواحدة جات في تامر ، والثانية جات في واحد اسمة سيف والضابط لما شاف العيال وقعت خد الامناء وجري بيهم بسرعة وانا كنت في الميكروباص ، ودخلت معاهم القسم وفي الفجر جات النيابة وعرفت اللي حصل وان في واحد مات . تقرير الطب الشرعي وكشف تقرير الطب الشرعى لجثة المجنى عليه سيف مسعد جمعة تبين ان الوفاة حدثت نتيجة اصابته بطلقة نارية حيوية حديثة حدثت من ذلك العيار الذي تم استخراجة ووجد انه من عيار 9 مم اطلق من سلاح معد لاطلاق النار مثل تلك الاعيرة ومن مسافة قريبة، واستقر بصدره . وأضاف التقرير بالاضافة ان الاطلاق كان بشكل اساسي من الامام للخلف ، وان الطلقة احدثت انفاق تهتكية وانزفة غزيرة بالقلب والرئة اليسري مما ادي الي حدوث صدمة نزيفية غير مرتجعة ، ادت الى الوفاة وكانت نيابة شرق القاهرة الكلية، بإشراف المستشار إبراهيم صالح المحامي العام الأول، وبرئاسة المستشار إسلام الجوهري رئيس نيابة الحوادث، أمرت باخلاء سبيل باقي القوة الأمنية، المكونة من ضابط آخر، و3 أمناء شرطة من قوة مباحث قسم شرطة السلام ثان، في واقعة مقتل شاب، وإصابة آخر، أثناء القبض على مشتبه به، بكفالة مالية قدرها ألفي جنيه، لكل منهم.
