"انفراد" ننشر نص تحقيقات مقتل مستشارة الأمم المتحدة

حصلت "الوادي "علي نص التحقيقات في قضية مقتل نرمين جمعة خليل إبراهيم مستشارة الأمم المتحدة، ومديرة الموارد البشرية بمعمل البرج بميدان سفنكس بالمهندسين، والمتهم بقتلها سعد عادل سعد 26 سنة سائق، ومحمود يسري الحسيني 32 سنة (سائق)، وباسم أحمد هاشم عاشور 22 سنة (طالب)، عمدا مع سبق الإصرار.
وتضمنت القضية التي حملت رقم 6660 لسنة 2012، وأجري تحقيقاتها مديرا نيابة حوادث شمال الجيزة محمود حلمي ومحمد عبد المنعم 173 ورقة، اشتملت علي تحقيقات النيابة وتقريرى المعمل الجنائي ومصلحة الطب الشرعي وأقوال شاهد الواقعة وأسرة الضحية وتحريات المباحث وأمر الإحالة، الذي جاء به اعترافات المتهمين والإتهامات الموجهة.
وجاءت اقوال المتهم الرئيسي في الواقعة سعد عادل سعد 26 سنة في التحقيقات كالتالي:
س: ما اسمك ؟
ج: اسمي سعد عادل سعد حسن سائق
س: ما تفصيلات اقرارك ؟
ج: اللي حصل ان انا من بعد ثورة 25 يناير لسنة 2011 مكنش معايا فلوس والدنيا كانت مزنقة معايا اوي، وانا كنت لسه متجوز ومكنش عندي للشقة ولا اي حاجة ومكنتش عارف اجيب فلوس منين واتعرفت بعدها علي المتهم الثاني محمود يسري وهو كمان كانت الدنيا مزنقة معاه ومعهوش فلوس وعرفني علي واحد اسمه ابوهارون في العامرية بالاسكندرية، وده تاجر مخدرات وسلاح، ورحنا نجيب منه حشيش ونبيعه علشان يطلعلنا قرشين نعرف نعيش بيهم وفعلا بقينا نروح نجيب كيس او اثنين حشيش بالف جنيه ولما نبيعه في مصر يقف علينا ب1200 جنيه وبعدين ابو هارون قالنا تجبولي عربيات جيب علشان اعرف ابيعها في الجبل عندي مقابل كميات حشيش، وساعتها انا ومحمود جمعنا 9 الاف جنيه واشترينا بندقية آلي من عند ابو هارون علشان نعرف نجيب بيها العربيات، وابتدينا مشوار تثبيت العربيات من 3 اشهر تقريبا وكنا ننزل انا ومحمود نلف في الشوارع بعربية تاكسي او ميكروباص وعن يوم الواقعة كنت انا ومحمود بنلف بعربية لانسر فضي بالمهندسين انا كنت طالع من فوق نفق وادي النيل علي شارع 26 يوليو لقينا عربية جيب وفيها ست مصرية بسرعة والعربية جديدة وحلوة، فمشينا وراها وحصلناها عند المطب في ميدان سفنكس، ومحمود واقف جنبها وانا لقتها لوحدها وموطية وكانت بتدور علي حاجة واقعة منها في العربية، فانا طلعت البندقية بتاعتي وبفتح الباب علشان اخوفها وكنت ماسك البندقية بايدي اليمين لان ايدي الشمال كنت بفتح بيها الباب وخرجت طلقتين الطلقة الأولي جت في دماغها، والثانية جت فوق العربية فانا خوفت من المنظر، وركبت العربية ومحمود طلع يجري بالعربة علي طول.
س: متي تحديدا سلكت ذلك السلوك ؟
ج: من اول 25 يناير وانا ومحمود ابتدينا نشتغل مع ابو هارون نجيب منه حشيش نبيعه في مصر من حوالي 3 اشهر.
س: حدد لنا مكان سلوك نشاطكم ؟
ج: احنا علي بنثبت العربيات في المهندسين بالذات علشان نبقي قريبين من المحور لطريق الاسكندرية والعربية بتاعت زايد جت بالصدفة.
س: حدد لنا كيفية سلوككم ذلك النشاط ؟
ج: أنا ومحمود متفقين اول ما نلاقي عربية جيب حلوه انا اطلع البندقية أخرج طلقتين اخوف اللي فيها وانزله، ومحمود يسوق العربية ونجري بيها نوديها لابو هارون.
س: وما هو مكان تصريفكم تلك السيارات التي تستولون عليها ؟
ج: احنا كل ماناخد عربية نوديها علي طول في نفس الوقت لابوهارون في الإسكندرية.
س: وما هو اسم الثلاثي للمدعو ابو هارون ومحل إقامته ؟
ج: اللي اعرفه ان هو اسمه ابو هارون وده تاجر مخدرات وسلاح كبير اوي وقاعد في العامرية عند سيدي كرير علي الساحل في الإسكندرية.
س: وما هو مقابل تصريفكم تلك السيارات ؟
ج: احنا بنبديل العربيات وناخد بدلها حشيش نبيعه في مصر وفي مرة إداني في العربية بتاعت مسرح البالون بندقية آلي
س: وما هي الاسلحة التي تستخدموها في ارتكاب تلك الوقائع ؟
ج: انا علي طول بيبقي معايا البندقية الآلي بتاعتي.
س: ومن اين اتحصلت علي ذلك السلاح ؟
ج: انا جبتها من ابو هارون بتسعة آلاف جنيه.
س: وعلي اي اساس اختياركم للسيارات محل تلك الوقائع ؟
ج: احنا بنقي العربيات الجديدة وميكنش فيها ناس كتير وتكون في المهندسين علشان نطلع علي المحور علي طريق الاسكندرية علي طول.
س: ومتي تحديدا ترتكبون تلك الوقائع ؟
ج: من بعد الساعة 12 او الساعة واحدة بالليل
س: ولما اختياركم ذلك التوقيت تحديدا ؟
ج: علشان يبقي الطريق فاضي ونعرف ناخد العربية ونهرب
س: حدد لنا ما هي تلك الوقائع التي ارتكبتموها ؟
ج: احنا اول عربية خدناها كانت في شارع وادي النيل في نفس اليوم اللي احنا كنا هنجيب فيه عربية مرسيدس بس صاحبتها جريت بالعربية وانا ضربت حوالي خمس طلقات علشان تقف بس هي طلعت تجري بالعربية وفي نفس اليوم ده عند وادي النيل خدنا عربية جيب بعدما ضربت طلقتين خوفت السواق والست اللي كانوا فيها ونزلتهم وخدنا العربية وانا ومحمود وبعديها انا اخدت عربية من عند مسرح البالون برده كانت ركباها واحدة ست وانا ضربت الطلقتين ونزلتها واخدنا العربية، بس ديه كان فيها آي باد وكاميرا ديجتال وبرفانات كتير وبعديها خدنا مائتي خمسة وثلاثون الف جنيه من شقة في كرداسة وبعديها العربية الجيب بتاعت ميدان سفنكس بس ديه مخندهاش علشان الطلقة جت في الست وانا مشيت علي طول لاني خوفت.
س: ومن الذي يعاونك في ذلك النشاط ؟
ج:علي طول محمود يسري الحسيني هو اللي بيبقي معايا في تثبيت العربيات بس يوم ماثبتنا شقة كرداسة كان معانا ناس ثانية غير محمود.
س: وما هو دور كلا منكم انتي والمتهم محمود يسري الحسيني في اتيان تلك الوقائع ؟
ج: احنا لما نشوف عربية جيب حلوة انا بطلع البندقية بتاعتي اضرب طلقتين واخوف اللي فيها وانزله ومحمود يركب العربية يسوقها علشان انا مش معايا رخصة وبركب معاه ونمشي.
س: وما هو استقلاكم لتنفيذ تلك الوقائع ؟
ج: في مرة كنا بالتاكسي بتاع باسم واحد صاحبنا وفي مره ثانية كنا بالميكروباص بتاع عبد الله صاحبنا برده وفي مرة كان محمود مأجر عربية ملاكي.
س: وما مدي علم كل من المدعو باسم والمدعو عبدالله بتلك الأفعال ؟
ج: باسم وعبد الله ميعرفوش المشاوير بتاعتي انا ومحمود خالص وهما بس بيوصولنا بالعربيات بتاعتهم
س: وعلي اي اساس استهدافكم لمحل تلك الوقائع ؟
ج: احنا كنا بنقي العربيات الجيب علشان ابو هارون كان طالب مننا عربيات جيب
س: صف لنا كيف دارت الأحداث في تلك الواقعة محل التحقيق ؟
ج: اللي حصل في اليوم ده محمد كان مأجر عربية لانسر فضي ومعرفش كان مأجرها منين علشان نلف فيها في المهندسين ونلاقي عربية ناخدها وفضلنا نلف كتير لغاية لما النهار ابتدي يطلع وكانت الساعة 6 صباحا وكنا واقفين بالعربية من فوق نفق وادي النيل وطالعين علي شارع 26 يوليو لقينا عربية جيب حلوة اوي وجديدة وكان لونها ذهبي وسيقاها واحدة ست لوحدها فاحنا قولنا نجيب العربية ديه وطلعنا وراها وكانت ماشية بسرعة بس جات عند المطب اللي في اخر الشارع عند ميدان سفنكس ووقفت علشان كانت بتجيب حاجة وقعت منها في العربية ومحمود وقف بالعربية جنبها من ناحية الشمال وهي كانت علي يميني ونزلت من العربية رفعت البندقية اللي كنت ماسكها بإيدي اليمين ومديت ايد الشمال علشان افتح الباب بتاعها بس لقيت الباب مقفول من جوا وهي لقتيني اودمها بحاول افتح الباب بتاعها وحاولت تجري بالعربية فانا قولت اضرب طلقتين اخوفها وكنت ماسك البندقية بايدي اليمين بس راحت الطلقة الاولي جات في دماغها والطلقة الثانية جات فوق العربية وركبت العربية ومحمود جري بالعربية ومشينا وبعدها انا جيت نفس المنطقة علشان اطمن واعرف ايه اللي حصل وعرفت من الناس ان الست ماتت من ساعتها انا قررت اني مثبتش حد بالبندقية تاني وفي نفس اليوم ده انا روحت لواحد اسمه ايهاب جميل فرغلي في كرداسة وبعتله البندقية اللي ضربت بها الست بتسعة الاف جنيه وبعت لعمه البندقية الثانية اللي كنت واخدها من ابوهارون بتسع الاف جنيه وكنت عايز اسلم نفسي بس كنت خايف.
س: ما تعليقك لحدوث اصابة المجني عليها اذا ؟
ج: علشان لما كنت بضرب الطلقتين كنت ماسك البندقية بايد واحدة والبندقية اتهزت مني والطلقة الاول جات في الست والثانية جت في الهواء.
س: وما مدي اعتيادك اطلاق تلك الاعيرة النارية عند ارتكابك تلك الوقائع ؟
ج: انا متعود اضرب الطلقتين في الهواء علشان اخوف صاحب العربية
س: حدد لنا مكان استقرار العيارين الناريين انذاك ؟
ج: هي الطلقة الاول جات في الست اللي كانت سايقة العربيه والثانية جات في الهواء فوق العربيه .
س : ولما تصويب سلاحك الناري صوب المجني عليها انذاك ؟
ج : انا مكنتش قصدي اضربها هي وكان قصدي اضرب الطلقتين في الهواء بس ساعتها البندقية اتهزت في ايدي والطلقة جات في الست.
س: وما مدي توقعك مقاومة المجني عليها لك انذاك ؟
ج: انا عارف ان اي حد هيقاوم علشان كده بضرب الطلقتين في الهواء علشان اخوف اي حد.
س: وما هي المسافة الفاصلة بين وسيلة استقلالك والمتهم الأخر ومركبة المجني عليها انذاك ؟
ج: هو مكنش المسافة بنا كبيرة وكانت حوالي متر تقريبا
س: وما هو رد فعل المجني عليها انذاك ؟
ج: هي اول مارفعت راسها وشافتني ماسك البندقية وبحاول اشد الباب قعدت تصوت وكانت هتطلع بالعربية وتهرب.
س: هل ناظرت ما الم بالمجني عليها من اصابات انذاك ؟
ج: لا
س: وما تعليللك لذلك ؟
ج: علشان انا سيت ان الناس ابتدت تتلم والدنيا كانت بقت نهار فنطيت في العربية مع محمود وجرينا علي طول .
س: وكيف حدثت اصابه المجني عليها انذاك ؟
ج: علشان الطلقة فوقعت الازاز بتاعها وسمعتها قالت اه فعرفت ان الطلقة جات فيها .
س: وكيف اثتبان لك وفاة المجني عليها من جراء ذلك ؟
ج: علشان انا بعديها جيت سالت في المنطقة وكان الخبر ده نزل في الجرايد والتلفزيون وعرفت ان هي ماتت .
س في حالة عدم تجمع الاهالي وتواجد مركبة القوات المسلحة هل كنت ستستولي علي مركبة المجني عليها ؟
ج: لا بس لوكانت خايفة كنت هنزلها من العربية واخد العربية وامشي ولو كانت ميتة كنت هسبها في العربية وامشي
س: وما مدي حدوث ثمه اصابات او وفيات في تلك الوقائع التي ارتكبتها سلفا ؟
ج: لا انا عمري ما عورت حد غير في القضية ديه ومكنش قصدي.
س: ولما اختيارك سلاحا اليا لاستخدامه في اكراه المواطنين كما قررت لنا سلفا ؟
ج: علشان البندقية الالي بتخوف اي حد وكمان لو حصل حاجه نعرف نهرب.
س: ما علاقتك بكلا من العميد عرفة حمزة والمقدم احمد الوتيدي وهل من ثمه خلافات فيما بينكم ؟
ج: انا اول مرة اشوفهم في الواقعة ديه ومفيش بنا خلافات.
س: هل لديك سوابق او اتهامات مماثلة ؟
ج لا
س: هل لديك اسم شهرة ؟
ج: ايوه انا شهرتي محسن سعد .
وسالت النيابة المتهم الثاني محمود يسري الحسني احمد 32 سنة سائق اقر بما جاء في اقوال المتهم الاول سعد عادل في التحقيقات.
وسالت النيابة المتهم الثالث باسم احمد هاشم 22 سنة طالب بالمعهد العالي للدراسات والتكنولوجيا المتخصصة، واكد انه علي معرفة بالمتهمين الاول والثاني وانه كان يستقل معهم السيارة قد ارتكب الحادث.
وجاءت اقوال شاهد الواقعة محمد محمود احمد امبابي عامل توزيع خبز في القضية كالتالي:
س: ما معلوماتك بشأن الواقعة محل التحقيق ؟
ج: اللي حصل ان انا شغال بوزع عيش الصبح علي الزباين وكنت راكب العجلة بتاعتي وشايل فوق دماغي قفص العيش وفيه سبعمائة رغيف متكيسين وكنت طالع مراتين المحور من ميدان لبنان اللي رايح ناحيه نادي الزمالك وفي الحتة الواصلة دي انا شفت عربية الست اللي ماتت واقفة علي يمين الطريق وكانت لوحدها في العربية وانا كملت بالعجلة عندها، وطلعت من فتحه المحور اللي ادام نادي الزمالك ودخلت يمين بعد سور نادي الزمالك علي طول عند محلات الشنط هناك علشان انزل طلبية عيش وبالضبط خدت حوالي اربع او خمس دقائق وطلعت تاني علي شارع 26 يوليو علشان توصيل باقي طلبات العيش لقيت الست دي تاني بعربيتها واقفة عند المطب الصناعي اللي في اخر الشارع وجبت اعدي من علي شمالها بالعجلة لقيت عربية سوداء ثانية جت جنبها علي شمالها ولقيت اللي كان قاعد جنب السواق قام ضارب طلقتين والعربية طلعت تجري وانا ساعتها لفيت بالعجلة ونزلت العيش ولقيت الست متعورة في دماغها، والعربية السوداء لفت من تحت الكوبري ورجعت تاني والناس إتلمت وكسروا الازاز بتاع الست علشان تقدر تتنفس لغايه لما الاسعاف جت وخدها والحكومة جات وده كل اللي حصل.
س: هل ابصرت السلاح المستخدم في تلك الواقعة ؟
ج: لا لانه كان بيضرب من جوه العربية بس الصوت كان علي اوي وكمان اول ماسمعت صوت ضرب النار لفيت وشي ومشفتش حاجة.
وقال والد المجني عليها في التحقيقات:
س: ماصلتك بالمجني عليها نرمين جمعه خليل ؟
ج: انا والدها
س: وما معلوماتك بشأن الواقعة محل التحقيق ؟
ج: انا بنتي نرمين مقيمة معايا في البيت بقلها حوالي سبع سنين من ساعة لما اطلقت هي وبنتها عندها حوالي 13 سنه اسمها امنية وبنتي مطلقة من حاتم عبد العزيز انس ومقمين في حي الشيخ زايد وفي اليوم ده بنتي خرجت من البيت الساعة 6 صباحا تقريبا وراحت علي شغلها علشان كانت هتاخد ورق من الشغل وهاتركب في قطر بني سويف علشان عندها شغل في الفرع بتاع الشركة في بني سويف وحوالي الساعه 7 صباحا عرفت من زميلها في الشغل بالتليفون ان بنتي اضرب عليها نار في ميدان اسفنكس وميعرفش اذا كانت ماتت ولا لا اخدت بنتي نهال ونزلت وعند وصلناه لمكان الحادث وجد العربية واقفة علي مطب في اخر شارع 26 يوليو ناحية شارع جامعة الدول العربية ونزلت ملقيتش نرمين في العربية وكان في ناس ملمومة وقالولي ان الاسعاف اخدتها علي مستشفي امبابة العام وفي مستشفي امبابه العام قالولي بالتليفون ان هما حولوها الي مستشفي القصر العيني علشان حالتها حرجة وعقبال لما وصلت الي مستشفي القصر العيني عرفت ان هي توفيت وكانت في الثلاجة وهو ده اللي حصل.
وجاء في تقرير الطب الشرعي الخاص بالمجني عليها والذي حمل رقم 72 طب شرعي الجيزة، كالتالي " أنا الدكتور حسام الدين حسني الطبيب الشرعي المعاون بدار التشريح اني قمت يوم الاحد الموافق 12 / 2 /2012 بناء علي قرار النيابة بتوقيع الكشف الطبي الظاهري واجراء الصفة التشريحية لجثة المتوفاة نرمين جمعه خليل ابراهيم وذلك لبيان ما بها من اصابات وسبب وتاريخ وكيفيه حدوثها والادوات المستخدمة في احداثها وبيان موقف الضارب من المجني عليها بعدا ومستوي واتجاهها وبيان سبب الوفاه اثبت بالكشف الطبي الظاهري ان الجثة لانثي في اوئل العقد الخامس من العمر سليمة ظاهرة العين في دور تمام التيبس الرمي المتداخل مع عوامل الحفظ بالثلاجة والتعفن الرمي لم يتضح ظاهريا بعد والرسوب الرمي بلون داكن بخلفية الجثة عدا مواضع الارتكاز وكان بالجثة من الاثار الاصابية الحيوية ما يلي: جرح متهتك مشرذم الحواف غير منتظمة ابعاده حوالي 25 في 10 سم غير محدد الشكل يقع بمنتصف مقدم فروة الرأس خلف خط منبت الشعر الأمامي بحوايالي 4 سم مستعرض الوضع شاملا معظم قمة فروة الرأس وهو غائر جدا يبدو من خلاله عظام الجمجمة مكسورة والمخ متهتك ويبرز من الجرح.
وجاء امر الاحالة الذي اصدره المستشار محمد زكري المحامي العام الاول لنيابات بعد الاطلاع علي الاوراق وما تم فيما من تحقيقات في القضية.
واتهمت النيابه العامة سعد عادل حسن، وشهرته محسن 26 عام سائق ومحمود يسري الحسيني أحمد 32 عاماً، سائق، وباسم أحمد هاشم عاشور، 22 عاماً، طالب، بأنهم في ليلة 12 فبراير 2012 قتلوا نرمين جمعه خليل ابراهيم، عمدا مع سبق الإصرار، بأن هاموا بالارض فسادا قاصدين غلبه الشيطان، فجهز الأول سلاحا ناريا ( بندقيه اليه سريعه الطلقات ) باحثين عن فريستهم وبيتوا النيه وعقدوا العزم المصمم علي ازهاق روح من يعترض تنفيذ جرائم سرقاتهم ممن تسوقه الظروف امامهم وابصروا المجني عليها ضالتهم، مستغلين وحدتها وضعف قوتها وقلة حيلتها فإستوقفوها عنوه حال إشهار الاول سلاحه الناري، وعند محاولتها الفرار من بطشهم اطلق الاخير صوب راسها عيارا ناريا اخترقها محدثا اصابتها الموصوفة بتقرير الصفة التشريحية والتي اودت بحياتها قاصدين ذلك وقد اقترنت تلك الجناية بجنايه اخري انه في ذات الزمان والمكان سالفي البيان شرعوا في الاستيلاء علي المركبة الرقمية ط س ب 3171 مصر قيادة المجني عليها نرمين جمعة خليل ابراهيم بأن استوقفوها عنوه إثناء سيرها بالطريق العام واشهر الاول صوبها سلاحه الناري " بندقية اليه " مهددين اياها بالحاق الاذي بها ان لم ترضخ لرغباتهم في استحكامهم علي مركبتها واطلق اعيرته النارية امعانا في طغيانهم وبدء الاهالي في التجمع علي اثر اصوات الاعيرة النارية فاوقف نشاطهم الاجرامي لسبب لا دخل لارادتهم فيه وهو فرارهم من مكان الحادث خشية ضبطهم بمعرفة الاهالي الامر المعاقب عليه بنصوص المواد 45 / 46,1 / 3,2 ,315 / اولا من قانون العقوبات.
أحرز المتهم الاول سلاحا ناريا "بندقية آلية سريعة الطلقات" غير مصرح بإحرازه أو حيازته، ولكنه استخدمه في الاعتداء علي المجني عليها موضوع التهمتين السالفتين مما ترتب عليه اخلالا جسيما بالأمن العام.
شملت القائمة أدلة الثبوت اقوال الشاهد الاول العميد عرفه حمزة منصور حسن 53 سنه، عميد شرطة ورئيس فرع المباحث الجنائية لقطاع شمال الجيزة، وقال بأن تحرياته السرية المشتركة مع الشاهد الثاني لكشف غموض الحادث ومن خلال فحص الحوادث المشابهه توصلا لقيام المتهمون الثلاثه بإرتكاب واقعة قتل المجني عليها عمدا بقصد الاستيلاء علي مركبها بالطريق العام .
الشاهد الثاني أحمد عبد العليم أحمد الوتيدي، 40 سنة، مقدم شرطة ورئيس مباحث قسم شرطة العجوزة، أقر بمضمون ما قاله الشاهد الأول، وأضاف أنه نفاذا لقرار النيابة العامة تمكن من ضبط المتهمان الاول والثالث، واستخراج الثاني من محبسه وبمواجهتهم اقروا بتكوينهم تشكيلا عصابيا تخصص في الاستيلاء علي السيارات ذات الدفع الرباعي كرها عن قادئدها باستخدام الاول سلاحا ناريا عاقدين العزم علي قتل كل من يحاول مقاومتهم وعند محاولتهم الاستيلاء علي مركبة المجني عليها حاولت الاخيرة الفرار من بطشهم فاطلق الاول صوبها عيارا ناريا اراها قتيلا قاصدين ذلك وفروا هاربين خشية ضبطهم بمعرفة الاهالي .
وأكد الشاهد الثالث محمد محمود سيد عفيفي، 41 سنة، مقدم شرطة وكيل مباحث فرقة شمال الجيزة، انه نفاذا لقرار النيابة العامة تمكن من ضبط السلاح المستخدم في الواقعة.
وجاءت ملاحضة النيابة العامة، كالاتي أقر المتهمون الثلاثه بارتكاب الواقعة تفصيلا بتحقيقات النيابة واقر المتهم الاول بارتكابه الواقعة تفصيلاا امام قضاء مد حبسه بتاريخ 27 / 3 /2012
ثبت بتقرير الصفة التشريحية ان وفاه المجني عليها تعزي للاصابه النارية بالراس فتحتي دخول وخروج عيار ناري وما احدثته من كسور بالجمجمه وتهتك بالمخ وهي جائزة الحدوث وفقا للتصوير الوارد ومن مثل ذلك السلاح وبتاريخ معاصر للواقعة .
وايضا ثبت بمعاينة النيابة العامه لمكان الحادث العثور علي فارغ طلقة نارية واثبت تقرير مصلحة تحقيق الادله الجنائية ان الفارغ المعثور عليه بمكان الحادث اطلق من ذات السلاح المضوط مع المتهم الاول .
وثبت بتقرير مصلحة تحقيق الادلة الجنائية وجود فتحتي دخول وخروج عيار ناري بسقف سيارة المجني عليها ووجود قطع نحاسية تمثل الغلاف الخارجي لمقذوف طلقة نارية مما يؤكد اطلاق ذلك العيار الناري من الجهة اليسري للسيارة وفقا لتصوير المتهمون