Over qualified جملة أكيد سمعتها قبل كده وأنت بتعمل interview لوظيفة قدمت عليها، يمكن الجملة دي تكون سمعتها مرة أو أكتر من مرة دي حاجة أنت ونصيبك بقى. الغريب أنك لما بتسمع الجملة دي في نهاية الinterview بتبقى مش عارف المفروض وأنت خارج تضحك ولا تعيط. تضحك أنك على قدر عالي من العلم والخبرة إللي تؤهلك لوظيفة أعلى وأفضل من الوظيفة إللي اتقدمتلها، ولا تعيط أن الخبير إللي عمل الinterview شايف إنك أعلى من الوظيفة المطلوبة فمع ألف سلامة يا سيد ماتلزمناش ورينا عرض كتافك. إللى هيجنني فعلاً إزاي وسط الظروف دي كلها إللي بيعمل الinterview بيبص أنت هتاخد كام مش هتفيد الشركة أو المؤسسة بإيه. يعني مثلاً لو أنت موافق إنك تشتغل بمرتب أقل من المرتب إللي يتناسب مع خبراتك ومؤهلاتك وقابل وحابب تقدم خبراتك للنهوض بالشركة ولا المؤسسة دي فتلاقي إللي يقولك لا يافندم خبراتك ومؤهلاتهم أعلى من إنك تمسك الوظيفة دي وأنا ماقدرش أديك مرتب قليل بالشكل ده، طب صاحب الشأن موافق، برضه يقولك لا أنا عايز واحد خبراته على قد الوظيفة دي مش أعلى منها. إللي مش قادرة أفهمه وشيفاه حاجة غير طبيعية بالمرة إزاي جملة زي دي تتقال، الطبيعي إن ممكن يتقالك خبراتك أقل من الوظيفة إللي حضرتك متقدملها إنما خبراتك أعلى وأكبر من الوظيفة فدي حاجة جديدة ومافيش أي عقل يتقبلها بصراحة. علشان كده قعدت أفكر كتير ليه الجملة دي بتتقال وإيه الهدف منها ولقتها بتنحصر في حاجة من التالي :- أولاً : السيد الفاضل إللي بيعمل الinterview عنده عقم فكري وتحجر في تلافيف المخ وواضح أنه لا بيفهم ولا عايز يفهم ولا فيه أمل أساساً أنه ممكن يفهم جاله فرصة ذهبية إن واحد خبراته ومؤهلاته أعلى يشتغل في الشركة وبمرتب أقل مما يستحق بس سيادته طور بدماغ تيس ورأسه وألف صرمة قديمة مش عايزة وعايز الضعيف أبو جوز جنيهات. ثانياً : الأستاذ المُبجل المحترم إللي بيعمل الinterview منفسن وخايف إنك لو اشتغلت تأخد وظيفته وده لأن خبراتك ومؤهلاتك أعلى منه ويؤهلك فعلاً إنك تمسك وظيفته أو وظيفة أعلى منه وهو مرعوب من ده فطبيعي جداً يحطلك قشرة موزة تتزحلق عليها وتترمي بره الشركة. طبعاً الأستاذ ده حمار وحط تحت حمار دي مليار خط لأن كل واحد رزقه مكتوب وماحدش بيأخد رزق حد بس لأنه هو شخصياً عنده استعداد يأخد وظيفة أي حد فمُتخيل إن كل الناس زيه فبيحاول يحافظ على مكانه في الشركة على قد ما يقدر وأي حد كويس بيرميه بره بعد ما بيديله الزُنب والخوازيق التمام. ثالثاً : الأستاذ عنده عقد وكلاكيع نفسيه وعايز يجيب حد ضعيف يتحكم فيه ويبهدله في الرايحه والجاية يعني الموضوع عنده مش موضوع شغل على قد ماهو موضوع تطليع كلاكيعه وعقده النفسية على الموظفين إللي لا ليهم حول ولا قوة. رابعاً : ده مجرد تمثيلية بتتعمل بإتقان interviewالإعلان محجوز لحد تاني ال قدام الناس كلها لحد مايجي الأستاذ إللي عليه العين وإللي متفق عليه من بدري وإللي هيحصل على الوظيفة دي مقابل واسطه أو رشوة يعني من الآخر مش مُقابل الخبرة. لما تلاقي إللي عايز يشتغل وعنده خبره تُؤهله للشغل مش لاقي شغل، ولما تلاقي إللي شغال ماعندوش خبره تساوي الشغل إللي بيشتغله لأنه اشتغل بالواسطة أو بالرشوة يبقي هو ده إللي ضد المنطق.
