أكثر ما كان يثير غضب المخرج الراحل يوسف شاهين من جيل السينمائيين الحالى هو الطموح المحدود، فأغلبهم يكتفى بنجاح فيلم أو اثنين ويعتبر نفسه قد صنع مجدا يمكن أن يعيش على ذكراه، وهو ما بدا جليا من خلال نص حوار دار بينه وبين أحد اكتشافاته الفنان خالد النبوى، وقد خص الأخير جريدة «الشروق» بنص الحوار مع المخرج الراحل فى الذكرى الأولى لوفاته. النبوى: مالك يا أستاذ؟ شاهين: مش مبسوط النبوى: ليه؟ شاهين: المناخ مش حلو النبوى: المناخ.. الدنيا حر يعنى شاهين: حر إيه يا قفل: المناخ يعنى الجو العام.. العيشة.. الناس النبوى: الناس.. الناس كلهم يعنى شاهين: أكيد الناس.. الناس أهم حاجة النبوى: الناس فى الدنيا كلها يعنى والا هنا عندنا شاهين: فى الدنيا كلها طبعا بس الأهم عندى الناس بتوعى النبوى: بتوعك! شاهين: أيوه يا قفل: وفيها إيه لما أقول الناس بتوعى ما أنا منهم وليهم ما فيهاش حاجة لما أقول بتوعى النبوى: طيب حصل خير يا أستاذ شاهين: لا محصلش.. ما تقعدش تمسكلى على الواحدة زيهم النبوى: زى مين يا أستاذ؟ شاهين: الله ما انت لسه قايل.. أيوه يا سى... لسه قايل الناس بتوعى وبحبهم وكل اللى باعرفه جى منهم لكن زعلان منهم وهما السبب إن المناخ بايظ النبوى: الناس شاهين: أيوه يا نيلة .. أمال أنا اللى بوظته النبوى: العفو يا أستاذ شاهين: لأ ما تقول إن أنا اللى بوظته ما انت بجح وتقولها النبوى: لأ ما أقدرش.. بس مين يعنى الناس دول اللى مبوظين المناخ الناس الفقرا والا الأغنيا مين بالظبط..؟! شاهين: فقرا أغنيا ما يهمنيش.. أنا أكتر ناس زعلان منهم هما الشباب النبوى: الشباب احنا يعنى شاهين: أيوه النبوى: زعلان مننا ليه يا أستاذ؟ شاهين: مش عارف بس أحنا ما كناش كده. النبوى: فهمنى أكتر... شاهين: هاكلمك بشكل خاص عن السينما.. عنكو. النبوى: مالنا يا أستاذ احنا مزعلنيك فى إيه. شاهين: فيكو حاجة بتخوفنى. النبوى: إيه هى يا أستاذ. شاهين: عندكو قلة تواضع بمليون جنيه: الواحد فيكو يعمل فيلم واحد يفتكر نفسه هد الدنيا.. وواحد تانى يقولى استكفيت أنا مش عايز أجاهد علشان أعمل فيلم أنا هاعمل اللى يقولوا لى عليه وخلاص النبوى: يعنى يا أستاذ قصدك إنه ما فيش طموح شاهين: أخيرا فهمتها يا قفل النبوى: ما هو المناخ وحش يا أستاذ هانعمل إيه؟ شاهين: صلحوه يا نيلة: لما كل واحد فيكو هايستكفى بفيلم واحد كويس وواحد تانى يفتكر إنه هد الدنيا علشان عمل فيلم تبقى مصيبة النبوى: أيوه يعنى... شاهين: بلا يعنى بلا زفت فهمتوا فهمتوا مافهمتوش اتنيلوا على عنيكو بقى وتبقى قسمتكوا كده ويالا بقى مع السلامة هتوحشنى عندى شغل لازم اخلصوا. النبوى: سلام يا أستاذ شاهين: ما تنساش بكره عندك ساعتين خيل فى نادى الفروسية اتمرن كويس أحسن والله العظيم لو ما طلعتش بتركب خيل كويس فى الفيلم لا أوديك فى ستين داهية. النبوى: حاضر يا أستاذ