قبل أيام توقفت ثلاث عربات أمام العمارة رقم 3 شارع مكرم عبيد بمدينة نصر، هبط من إحداها المرشح محمد مرسى، ليجد فى المدخل لافتة تقول: محمد مرسى رئيسا للجمهورية بإذن الله تعالى. إنها الطفلة إسراء، 11 عاما، ابنة حارس العمارة، التى يقع فيها أيضا مكتب النائب الأول لمرشد جماعة الاخوان المسلمين، خيرت الشاطر...عرفت إسراء بالزيارة قبل موعدها، «الساعى بتاع المكتب قال لى إن الدكتور محمد مرسى ح ييجى يزور المهندس خيرت، عشان كده قررت اعمل له يافطة مكتوب عليها محمد مرسى رئيس مصر بإذن الله»
فرح المرشح باللافتة، وحاول مداعبة الطفلة. سألها: انتى عايزة إيه؟ وردت إسراء: أنا ماعملتش كده عشان تلاعبنى أو تدينى حاجة، أنا عايزاك تنجح وتاخد بالك من الغلابة اللى زينا. أجابها مرسى: الغلابة هم أول ناس فى ذهنى.
اسراء تريد أن ينجح مرسى «عشان ربنا يصلح البلد، رغم أن كل سكان العمارة مش عايزين ينتخبوه، مش فاهمة ليه، لكن لان كل الموظفين فى شركة المهندس خيرت وماما وبابا بيقولوا انه كويس».
اسراء التى تحب المذاكرة جدا «كنت عايزة اكتب يافطة مكتوب عليها الشعب لا يريد شفيق بس ماما قالتلى لأ متزعليش حد»...حلم اسراء التى ترويه فى خجل «نفسى ابقى ضابطة شرطة عشان دا حلمى، نفسى اتعلم كويس وكل الناس الغلابة تعيش كويس».
لافتة إسراء لم تفصح عن كل أحلامها، ولم يتسع الوقت لتشرح للمرشح الرئاسى ما تقصده بالاهتمام بالغلابة، «كنت عايزة أقول له على حاجات كتير، يعنى المستشفى الحكومى اللى بنروحها مش حلوة زى المسلسلات، وفى المدرسة كمان الدكة مكسرة، بس أكيد لما ينجح ح ييجى يزور العمارة تانى وح أقوله على كل حاجة».