لازم نعرف اولا ان الخلاف اللى حاصل دلوقت مش على ان التعديلات دى حلوه ولا وحشه .. الخلاف على انى اقوم بثوره و اتحمل ده كله علشان اعدل 8 مواد من دستور بيتكون من تقريبا 200 ماده واقنع نفسى انى كده عملت انجاز هتقولى ده لفتره مؤقته .. هرد و اقولك ان دى اهم فتره فى تاريخ مصر من ايام محمد على .. و كميه التشوه اللى فى ال 192 ماده الباقين فى الدستور الحالى هتشوه الفتره دى و احتمال – احتمال مش اكيد طبعا – لا قدر الله تشوه مستقبل البلد اللى كلنا تعبنا علشان نخلصها من الفساد .. و هقلك ازاى .. مثلا: التعديلات المقترحه دى بتقول (ماده 189 مكرر) ان مجلس الشعب اللى جاى يشكل لجنه من المجلس و من الشعب تحط دستور جديد .. يعنى احنا ننتخب مجلس شعب علشان يرجع ينتخب مننا احنا لجنه تحط الدستور .. يعنى ودنك منين يا جحا من الاخر .. يعنى ال 500 عضو هما اللى هيختارو من ال 85000000 مواطن !؟ غير كده ان الدستور اللى هيتعدل ده بيقول لازم يبقى 50% من العمال و الفلاحين .. و هما طبعا على العين و الراس .. بس انا لما احب اعالج جرح بروح لدكتور مش نجار مسلح .. اما احب اختار مجلس شعب يتحكم فى دستور مصر يبقى لازم يكون بيمثل مصر و اذا كنت بافرض اغلبيه معينه تبقى لاهل الدستور اللى هما القضاه, مش العمال و الفلاحين .. غير انك لازم تعرف ان فى المجلس اللى فات كان فيه 55 ظابط شرطه داخلين المجلس على انهم فلاحين .. ولك انت تحكم على ترقيع الدستور اللى بالشكل ده. حاجه تانيه و هى ان الاتجاه السائد دلوقت فى المجتمع المصرى – حتى بين اوساط الناس المؤيده لفكره التعديل اولا – اننا نعمل نظام حكم بيسموه البرلمانى .. يعنى باختصار يبقى منصب الرئيس منصب شرفى و اللى بيحكم بجد هما اعضاء البرلمان المنتخب و اللى بتتشكل منهم الحكومه .. و لان البرلمان – اللى مش هيكون مزور ان شاء الله – فيه تيارات و احزاب مختلفه فكده هنخلص نهائيا من سيطره الفرد الواحد و الحزب الواحد .. و ده بصراحه انسب لنا لان اللى اتلسع من الشربه ينفخ من الزبادى, ده بالاضافه لالغاء مجلس الشورى اللى مانعرفش بيعمل ايه اصلا, و اللى اكتشفنا ان السادات الله يرحمه كان عامله مجامله للتيار الاسلامى .. المشكله بقى ان الدستور الحالى دستور ديكتاتورى رئاسى و علشان نوصل لهدفنا ده (حسب التعديلات المقترحه دى) لازم نعمل .. استفتاء .. انتخابات شعب .. انتخابات شورى .. انتخابات رياسه .. (دستور جديد) .. استفتاء .. انتخابات شعب .. انتخابات رياسه .. يعنى 7 انتخابت فى مده اقصاها سنه و نص. انما لو ابتدينا على ميه بيضه بدستور جديد هنعمل الاتى .. انتخابات لجنه وضع الدستور .. انتخابات شعب .. انتخابات رياسه .. يعنى 3 انتخابات, هتقلى فين الاستفتاء, هقلك ياعم مانت اللى مختار اللجنه .. ولا اقولك 4 انتخابات ياسيدى فى نفس السنه و نص, او اقل لو عايزين .. افتكر كده احسن من النظام بتاع ودنك منين يا جحا !؟ لازم برضه نعرف ان فى فزاعات عاملين بيخوفونا بيها, و دى بصراحه مش طريقه صح فى الاقناع, بس مثلا: فزاعه الوقت .. احنا عندنا فى مصر اكبر فقهاء دستوريين فى الشرق و عاملين دراسات بالهبل على عيوب كل ماده فى الدستور الحالى .. لدرجه ان فى كليه الحقوق جامعه القاهره عاملين دستور جاهز من قبل الثوره .. يعنى خبرائنا دول ممكن يعملو دستور فى شهرين بالكتير .. و نقعد نتناقش فيه كشعب فى شهرين .. و يبقى قدمنا شهرين نعمل انتخابت رياسه .. و يتفضل المجلس الاعلى للقوات المسلحه يتفرغ لمهامه .. و لو عايز يتفرغ من دلوقت يسيبها لمجلس رياسه من القضاه او غيرهم او لرئيس المحكمه الدستوريه .. و بعدين ياراجل بذمتك انت 7 انتخابات ولا 3 اللى هياخدو وقت و مجهود اكتر مننا او من المجلس الفزاعه التانيه الامن .. الامن مرتبط بنزول الشرطه .. البلطجى مش هتفرق معاه فى دستور ولا فى عشر دساتير حتى .. المهم يلاقى اللى يقف له و يحاسبه .. و احنا مش معطلين قوانين العقوبات و المحاكم المدنيه و العسكريه شغاله الله ينور فزاعه الاقتصاد .. احنا الحمد لله ربنا رزقنا بحكومه صادقه و بعد ماكانت الحكومه اللى قبلها بتخوفنا و تقول احنا بناكل من لحم الحى .. جت الحكومه الجديده طمنتنا و اعلنت كمان عن بدايه خطط زراعه القطن و القمح اللى كانت واقفه .. انا مش محتاج دستور علشان ازرع قطن و لا محتاج دستور علشان استورد قمح ..... انا محتاج دستور علشان اضمن حريتى .. وشكرا