التقت رانيا ربيع، محررة «الشروق» بأحد سماسرة الانتخابات، فى منطقة مصر القديمة، أثناء العملية الانتخابية، وتفاوضت معه على الإدلاء بصوتها لصالح خالد القط، والذى كان حتى تلك اللحظة مرشح الحزب الوطنى على مقعد الفئات، ثم أصبح فجر اليوم نائبا فى البرلمان. بعد تعب ومناقشات، استطاعت رانيا ربيع أن تصل بالتفاوض إلى 300 جنيه مقابل صوتها. وإلى نص الحوار الذى «سجلته» الشروق: الشروق: أنا عايزه أنتخب بس هتدفعوا كام؟ أقل حاجة 200 جنيه. السمسار: يعنى لو 75 جنيها وحش؟ الشروق: وحش طبعا. السمسار: استنى شوية على بعد الضهر وتاخدى 100. الشروق: لا طبعا، أنا متأكدة أن الصوت هيرفع ل200. السمسار: هى كانت 50 الصبح والستات كلها قاعدة قدام المدرسة مستنية تقبض ورفعوها ومش راضيين يدخلوا غير لما الواحدة فيهم تاخد 100 جنيه. الشروق: عيب عليك، بعد الضهر الصوت هيوصل ل200 و300 جنيه. السمسار: هو ده اللى هيحصل بس استنى شوية. الشروق: هو لسه بدرى ولا إيه؟ السمسار: لما نعرف بس الدنيا ماشية إزاى الأول، نبقى نشوف السعر. الشروق: وهتعرفوا إزاى؟ السمسار: مع أول صندوق يطلع هنعرف العملية ممكن تبقى بكام. الشروق: هى الصناديق بتطلع إزاى؟ السمسار: بيطلعوا وبنعرف فيها كام صوت.. وإذا كان لسه بدرى نبتدى نولعها بقى. (بعد لحظة صمت).. السمسار: بصى مش مهم انتى منين، خدى البطاقة دى وحطى عليها اسمك مش مهم وادخلى انتخبى. هاجبلك بطاقة فاضية وهاكتب اسمك عليها وانتى ادخلى انتخبى. يمكنكم متابعة مزيد من التغطيات من خلال مرصد الشروق لانتخابات برلمان 2010 عبر: مرصد الشروق عبر فيس بوك مرصد الشروق عبر تويتر