تواصل «الشروق» نشر الحلقة الثالثة والأخيرة من نص تحقيقات نيابة شمال الجيزة برئاسة محمود الحفناوى رئيس النيابة فى واقعة سرقة لوحة «زهرة الخشخاش» من متحف محمود خليل التى يقدر ثمنها ب55 مليون دولار والمتهم فيها محسن شعلان وكيل أول وزارة الثقافة و10 آخرون بالإهمال الجسيم وإهدار المال العام. قالت هويدا حسن عبدالفتاح موظفة بالشئون الإدارية بالمتحف: س: ماهى تفصيلات اعترافك؟ ج: اللى حصل ان يوم 21/8/2010 تقابلت مع علاء منصور فرد الأمن أمام المتحف وفتحنا الباب وأنا طلعت الدور الأول والثانى علشان افتح الباب اللى بين الدورين ونزلت وبعد شوية جه الاستاذ على أحمد ناصر والناس الزوار جم وقضينا اليوم عادى لحد لما علاء طلع الدور الاول وشاف اللوحة لقاها مش موجودة فبلغ أمين المتحف على احمد ناصر وبلغوا الشرطة وهو ده اللى حصل. س: ماهى إجراءات فتح المتحف اليومية والثابتة بدفتر الأحوال؟ ج: شرطة السياحة بتكتب بند فى دفتر الأحوال بوجود اللجنة وهى فرد الأمن وأمن المتحف ولما يثبت بند فى دفتر الأحوال بوجود اللجنة، وهى فرد الأمن وأمن المتحف ولما يثبت كده بيسلم أمن المتحف المفتاح وبيعملوا محضر فتح بيتثبت فيه التأكد من وجود اللوحات فى المتحف بعد صعود الاثنين علشان يتأكدوا، وهو ده اجراء الفتح. س: وهل اتبعت تلك الاجراءات بشأن فتح المتحف بتاريخ 21/8/2010؟ ج: أنا ما عملتش كل الاجراءات دى وفتحنا المتحف لكن أنا طلعت الدور الاول والثانى افتح الابواب وما تممتش على اللوح. س: وهل يجوز أن يكون أحد أعضاء لجنة الفتح موظفا إداريا دون أن يكون أمين متحف؟ ج: لا يجوز فعلا أن يكون رجل الأمن موظفا إدارى. س: وما سبب قيامك بذلك العمل فى حين أنك معتمده عليه ومعترضة عليهم؟ ج: علشان الاستاذة ريم أصرت على كده وقالت إنى ملتزمة وأنا سمعت كلامها. س: ما قولك وقد قرر فرد الأمن علاء منصور الذى كان برفقتك آنذاك انك قررت له بعد نزولك من أعلى أن كل شىء سليم؟ ج: لا أنا معملتش كده خالص. س: هل كان هناك أحد موجود برفقتك وفرد الأمن السالف آنذاك؟ ج: لا الاستاد على جه الساعة عشرة الصبح. س: هل قمت بفتح المتحف فى تاريخ سابق على تاريخ 21/8/2010؟ ج: أيوه. س: وهل قمت بمناظرة لوحات المتحف بعد الفتح فى التاريخ السالف؟ ج: أيوه، وكان معايا فرد الأمن محمد عبدالصبور وكانت اللوحة موجودة. س: ما سبب عدم طلبك صعود فرد الأمن برفقتك فى 21/8/2010 للتأكد من وجود اللوحة. ج: المفروض أنا ما باطلبش والمفروض هو اللى يأخذنى ويطلعنى فوق عشان نشوفها. س: وما قولك وقد ثبت من مطالعة الأوراق أن أمن المتحف يلتزم باتخاذ جميع الاجراءات الاحتياطية لسلامة اللوائح؟ ج: انا كنت فاهمة افتح الباب بس لكن ما أخدتش حاجة ومعرش حاجة عن اللوحة دى. س: وهل قمت بمناظرة مكان وجود اللوحة بعد السرقة؟ ج: لا أنا ماطلعتش فوق بعد اكتشاف السرقة. س: وكيف نمى إلى علمك وجود واقعة سرقة فى المتحف محل التحقيق؟ ج: زميلى علاء منصور هو اللى اكتشف السرقة. س: وما قولك وقد ترتب عن اهمالك فى أداء وظيفتك سرقة اللوحة محل التحقيق؟ ج: أنا فعلا غلطانة لكن مش أنا لوحدى اللى مهملة وكل الموظفين مهملين. س: هل قمت بإثبات أية بيانات بدفتر الأحوال يوم 21/8/2010. ج: أيوه، أنا مضيت على الدفتر بما يفيد صحة الفتح وإن مافيش حاجة حصلت وأنا فعلا مكنتش ساعتها لسه فتحت وكتبت البيان ده قبل ما أطلع أصلا. س: هل اشترك معك أحد فى واقعة إثبات توقيتك على البيانات الخاصة؟ ج: لأ، علشان أنا بأقوم بدور أمين المتحف ولأنى مفوضة بذلك. س: وما سبب عدم مناظرتك للوحة محل السرقة؟ ج: علشان أنا ما أخدتش بالى وما بصتش عليها خالص وفتحت الأبواب بس ونزلت لأنى مش فى دماغى أى حاجة حصلت.