سأل الإعلامي محمود سعد، الفنان أحمد سعد، عن سبب ارتدائه لحلق وقميص شبك في إحدى الحفلات التي أحياها العام الماضي، بالمملكة العربية السعودية. وأضاف خلال استضافته ل سعد، خلال برنامج «SOLD OUT»، المذاع عبر فضائية «CBC»، مساء الخميس: «شكلك هتلبسه تاني؟ أنت ندمان بجد؟ أنا مش عارف إيه الجد في كلامك وإيه الهزار». ورد الفنان على كلام محمود سعد، بقوله إن الغرب يرتدون الحلق وفقًا لعادتهم وتقاليدهم، مضيفًا: «الحلق ملوش علاقة بالستات.. مش بتاع ستات بس»، ليعرب الإعلامي عن صدمته. وأكمل أحمد: «في موضة معينة.. الدنيا بقت مفتوحة دلوقتي والوضع مبقاش زي زمان، الدنيا كلها باصة على بعضها». واستوقف الإعلامي الفنان، قائلًا: «بس أنت عارف إنك نجم ولما تعمل حاجة شباب كتير يقلدوك، لما يقلدوك في حاجات مقبولة أوك، لكن إيه رأيك لو كلهم لبسوا حلقان؟». وأوضح الفنان أنه بعد تحقيق نجاح كبير في إيطاليا بحث عن منسق ملابس لمساعدته في إطلالاته بالحفلات، مازحًا: «هو غالبا قلعني مش لبسني، أنا كنت بكم عادي خلاني بشبك». واستطرد: «قلت ألبس أحسن موضة، والقميص كان معاه جيبة لكن أنا عشان عاداتنا وتقاليدنا قلت لا مش عاوز أزودها.. رحت رامي الجيبة ولبست الشبك». وذكر أنه تعرض لنقد مهول بعد تلك الإطلالة، معقبًا: «أنا كنت بتشتم 3 أيام في الأسبوع زي المضاد الحيوي، لكن أول مرة أنبسط من النقد لأن الناس شافتني منهم وجوا بيتهم، ممكن حد تاني يلبس كده ويسيبوه عادي». ودفعت التصريحات الإعلامي محمود سعد للسؤال: «محدش شافك قبل ما تخرج؟»، ورد الفنان: «في واحدة ست كبيرة قالت لي إيه يا ولا اللي أنت لابسه ده، قلت دي موضة قديمة الست دي، لكن طلع الشعب كله بيفكر زيها».
