المجني عليه: ساكن الكمبوند ضربني 12 قلم على وجهي وسحلني على الأرض.. والمتهم: ضربته عشان شتمني حصلت "الشروق" على نص تحقيقات النيابة العامة في قضية اعتداء أحد ساكني مجمع سكني بالمعادي على فرد أمن الكمبوند. وحددت محكمة جنح المقطم، اليوم الخميس، جلسة 19 مايو الجاري، للنطق بالحكم في القضية بعدما تنازل المجني عليه وتصالح أمام هيئة المحكمة مع المتهم ونفى عنه اتهامات استعراض القوة والتلويح بالعنف. • نص أقوال فرد الأمن المجني عليه س: ما معلومات بشأن الواقعة محل التحقيق؟ ج: وأنا في شغلي كفرد أمن في الفترة المسائية في كمبوند البارون لاقيت عربية سوزوکي بيضا، وبداخلها 4 أشخاص 3 شباب والسائق راجل كبير، وبحكم عملي وقفتهم على البوابة رقم 5 للكمبوند، وسألتهم انتم داخلين لمين، فقالولي إحنا منعرفش فين إحنا داخلين جوه، فقلتلهم طيب اركنو على جنب وكلمو الساكن علشان أعرف دول مين وهيدخلو يعملوا إيه، فردو عليا وقالولي ملكش فيه، فرديت عليهم بعد إذنكم كلموا الساكن يعرفكم العمارة كام والشقه كام. وأضاف: الراجل الكبير اللي كان سايق اتصل على التليفون وكلم الساكن، وقاله يا باشا فرد الأمن مش عاوز يدخلنا وعاوز يعرف إحنا داخلين ليه جوه وهنعمل إيه.. بعد کدة الراجل الكبير إداني التليفون وقالي رد على الساكن فأخدت منه التليفون، وبرد على الساكن لاقيته بيقولي يابني أنا العميد "وليد. ع"، قالي هما داخلين يصلحوا العطل اللي عندي في العربية ودخلهم يالا، وبعد كده قفلت معاه وأخذت منهم الرخصة وسجلتها في دفتر الأحوال. وتابع: بعد ما سجلتها دخلت الأربع أشخاص داخل الكمبوند، وبعدها بربع ساعة لاقيت العميد "وليد. ع" جه، ومعاه الأربع أشخاص دول، وقالي إنت فرد الأمن اللي على بوابة خمسة قولتله أيوه ولاقيته بيبلطج عليا وبيتعدى عليا بالضرب بإيده على وشي ورقبتي وسحلني وجرني على الأرضي وضرب فيا بإيده ورجله. واستطرد: قلتله إنت بتضربني ليه، قالي إنت بتشتمني ومش عاوز تدخل الناس اللي جايه ليا، قولتله محصلش والله أنا مشتمتكش والناس اللي كانوا داخلين لحضرتك مقالوليش إحنا دخلين ليه، ولاقيته بيقولى اتصل بمدير الأمن ولما مدير الأمن أيمن جه كان العميد ياسر حسن اللي ساكن في الكمبوند داخل على البوابة ونزل من عربيته، وقالي إيه يا محمد اللي حصل فقولتله إن العميد "وليد .ع" تعدى عليا بالضرب علشان وقفت أربع أشخاص كانو داخلين له. وتابع: العميد ياسر راح اتكلم معاه بكل احترام بس العميد وليد شد معاه في الكلام، فالعميد ياسر قال للعميد وليد إنت مش من حقك تضرب فرد الأمن، فقاله أنا براحتي وقعد يزعق ويقول إني أنا شتمته، فرد عليه العميد ياسر وقاله في إدارة شركة الأمن وإدارة الكمبوند تشتكيه فيها.. وبعدين جه العميد وليد وكمل فيا ضرب بإيده علي وشي، والعميد ياسر حاشه عني وفضل يشتم فيا لحد ما مشي هو والأربع أشخاص مع الأستاذ أيمن وراحوا المكتب الرئيس لشركة الأمن في الكمبوند وأنا فضلت مع العميد ياسر واقفين، وبعدين أنا والأستاذ محمد أبو الدهب مشرف الأمن روحنا قسم المقطم عملت محضر وبعدين روحت مستشفي أحمد ماهر عشان أعمل تقرير، وده كل اللي حصل. س: متي وأين حدث ذلك؟ ج: الكلام ده حصل يوم الخميس 28 أبريل 2022 حوالي الساعة 10 مساء أمام بوابة کمبوند البارون منطقة الهضبة الوسطي المقطم. س: ما سبب ومناسبة تواجدك بالزمان والمكان سالف الذكر؟ ج: أنا شغال فرد أمن بكمبوند البارون. س: من كان برفقتك آنذلك؟ ج: أنا كان معايا العميد ياسر أحمد حسن وفرد الأمن إسماعيل على ومشرف الأمن أيمن عبدالقوي. س: ما طبيعة عملك واختصاصات الوظيفي؟ ج: أنا شغال فرد أمن تبع شركة مصر السلام للخدمات الأمنية ومتعين فرد أمن في كمبوند البارون، وبخلص بتسجيل سيارات غير الملاك اللي داخلة لبوابة 5 بالكمبوند. س: ما هي إصابتك تحديدا؟ ج: أنا متعور في كوعي الشمال ورکبتي الاثنين ورقبتي كانت وارمة من شدة الضرب وفكي السفلى. س: وهل كان المتهم "وليد. ع" يحمل ثمة أسلحة أو أدوات؟ ج: لأ س: وبأي شئ أحدث المتهم سالف الذكر إصابتك تحديدا؟ ج: هو قعد يضريني بإيده ورجله. س: وهل قام أي من الأربع أشخاص المجهولين اللذين كانوا برفقة المتهم سالف الفكر بالتعدى عليك بالضرب وإحداث إصابتك؟ ج: لا ماتعدوش عليا بالضرب، بس كانو بيبلطجوا عليا معاه وواقفين حواليه وبيمنعو أي حد يحوش. س: كم عدد الضربات التي كالها لك المتهم؟ ج: هو ضربني أكثر من 12 قلم على وشي بإيده وسحلني على الأرض 3 مرات. س: أين استقرت تلك الضربات؟ ج: في وشي وكوعي الشمال وركبتي الإثنين ورقبتي. س: وهل من ثمة استغاثه بدرت منك؟ ج: لا مكنش مديلي فرصة. س: وهل كان بإمكان المتهم موالاة التعدى عليك؟ ج: أيوه لولا تدخل العميد ياسر كان كمل ضرب فيا. س: وما الذي بدر من المتهم عقب ذلك؟ ج: هو كان عمال يضريني وسبني، ولما جه العميد ياسر أحمد شدوا مع بعض في الكلام، وكمل عليا بالضرب وشتيمة. س: ما حالة الضوح والرؤية آنذاك؟ ج: الرؤية كانت واضحة. س: ما حالة الطريق من حيث المارة؟ ج: نادرا لما حد بيعدي هما بين العربيات اللى داخل الكمبوند واللي خارجه منه. س: وهل قام المتهم باستعراض القوة أو التهديد بالعنف أو أيهما قبلك؟ ج: أيوه • نص التحقيقات مع المتهم س: ما قولك فيا هو منسوب إليك بكونك متهما باستعراض القوة والتلويح بالعنف قبل المجني عليه بقصد ترويعه وتخويفه لفرض سطوتك عليه مما نتج عنه إلقاء الرعب في نفسه وتكدير أمنه وسكينته؟ ج: الكلام دة محصلش. س: ما قولك فيها هو منسوب إليك بكونك متهما بالتعدي عمداً على المجني عليه فأحدثت به الإصابات الموصوفة بالتقرير الطبي والتي أعجزته عن أشغاله الشخصية مدة لا تزيد عن عشرين يوما؟ ج: أيوة أنا ضربته عشان شتمني بأمي. س: ما قولك فيها هو منسوب إليك بكونك متهما بالتعدي بالسب على المجني عليه بأن وجهت إليه الألفاظ المبينة بالتحقيقات والتي من شأنها أن تخدش الشرف والاعتبار علانية؟ ج: الكلام دة محصلش. س: وما الذي حدث إذا وما هي ظروف ضبطك وإحضارك وعرضك علينا؟ ج: أنا أول إمبارح كنت مكلف السواق بتاعي يجيب لي ميكانيكي عشان يبص على العربية بتاعتي اللي عطلانة تحت البيت، فاتصل بيا من على البوابة عشان أبلغ فرد الأمن إنه يدخله الكمبوند ففرد الأمن كلمني، فسأل تاني على رقم الشقة فقلت له يا ابني، فهو سمعها يلا بدل يا ابني. وتابع: دخل الميكانيكي والمساعد بتاعه والسواق الكمبوند وصلحوا العربية اللي عطلانة، وبعدها لقيت الميكانيكي بيقولي إنه بعد ما أنا بلغت فرد الأمن برقم العمارة والشقة قام رمي التليفون على الترابيزة اللي قدامه، وقال إيه التناكة اللي هو فيها دي وقام شتمني بأمي.. أنا لما عرفت اتعصبت بعد لما اتأكدت منهم كلهم ورحت له وضربته عشان شتم أمي، وجابوني على هنا. س: ما قولك فيها جاء بمقطع الفيديو السالف عرضه عليك؟ ج: أيوة أنا اللي كنت بضرب فرد الأمن في الفيديو بس ده كان عشان هو سب الدين لوالدتي الله يرحمها وده اللي خلاني أفقد أعصابي. وكان المستشار النائب العام أمر بإحالة المتهم بالاعتداء على فرد أمن بكومباوند سكني بالمعادي (محبوسا) إلى محاكمة جنائية عاجلة، لاتهامه باستعراض القوة والتلويح بالعنف واستخدامه ضدَّ فردِ الأمن وتعديه عليه بالضرب والسبِّ وإحداث إصابات به.
