هالة صدقي مدافعة عن أصدقائها: زي ما العزاء واجب الفرح كمان واجب

دافعت الفنانة هالة صدقي، عن أصدقائها، الذين حضروا فرح ابنة أحد رجال الأعمال، في نفس يوم جنازة صديقهم الفنان سمير غانم.

ونشرت هالة صدقي عبر حسابها الرسمي على موقع التواصل الاجتماعي «فيسبوك»: «زي ما العزاء واجب الفرح كمان واجب، الفرح يوم في العمر وخصوصا لو حد عزيز عليه جدًا ومنتظر أشاركه اللحظه دي».

وتابعت: «المعروف جدًا أن أي فنان وأولهم الفنان سمير غانم ينزل يعرض ويضحك ويسعد جمهوره لكن قلبه من جوه كله حزن.. وأكبر مثال العظيم عادل إمام دفن مصطفى متولي صاحبه وجوز أخته الظهر.. ونزل يعرض بليل وبعد ما نزلت الستارة أنهار.. ومش عادل بس لا في غيره وغيره وغيره».

وأضافت: «للأسف الفنان بيبقي مطلوب منه فوق طاقته وأصحابه وحبايبه منتظرين منه أكتر، عمر الحزن ما كان بلون الأسود أو البكاء، ولاد سمير النهارده مؤكد لابسين ملون علشان مامتهم ما تعرفش باللي هما فيه.. هل ده معناه أنهم مش زعلانين ومقهورين علي باباهم؟، وهي قدرات ممكن حد يقدر يتغلب على أحزانه وناس لا».

وأوضحت هالة، أنها لم تكن معزومة على الفرح الذي حضره عدد من الفنانين وأثار الجدل، معلقة: «وعلى فكرة أنا مكنتش معزومة على الفرح اللي زملائي كانوا فيه.. كنت معزومة في فرح تاني خالص والنهارده كمان كان عندي فرح حد من أعز أصدقائي، كلنا عارفين الأصول أن لما حد يموت نقفل التلفزيون وبلاش مزيكا وحاجات كلنا عارفينها.. لكن للأسف في ظروف خارجة عن الإرادة، وبدل ما نحاسب البشر وإحنا عندنا رب هو المسؤول عن اللي في القلوب، ندعي للزميلة والأخت العزيزه دلال إن ربنا يقومها بألف سلامة وترجع لبيتها وولادها وتتحمل فراقها لحبيب عمرها.. شكرا لتفهمكم».

يشار إلى أنه أثير الجدل مؤخرا حول فرح أبنة أحد رجال الأعمال، والذي حضره عدد من الفنانين، خاصة وأنه كان مساء يوم جنازة الفنان سمير غانم.