نحيت الجورنال جانبا ونفخت فى ملل.. أفففففففففف.. أنا زهقت، فاستدار جارى لى وقال لى زهقتى من إيه، شاورت على الجريدة، فما كان منه أن نفخ هو الآخر: يادى الملل والسأم، أنا جنابى حاتفرقع م الزهق والقرف.. وعلى غير توقع انضم لنا كام واحد كمان، وعلى مدى كام يوم أصبحنا شلة، يجمعنا زهق عام كامن بقاله فترة.. بس يظهر قرر ينضح ويظهر على السطح. وكانت مناسبة إعلان الزهق، أو القشة التى قصمت ظهر المفقوعين.. حوار مع إحدى الفنانات المعتزلات العائدات، كلاكيت تسعميت مرة، كلام معاد ومكرر وسئيل، لا بيودى ولا بيجيب غير إنه بيضايقنا نحن القائمين على صناعة الفن، ولا كأنهم شافوا الشغلانة دى قبل كده، ولا كأنهم عارفين قواعدها ولا كأنهم اشتغلوا مع مخرجين عظماء وعملوا نصوص لكتاب أعظم منحوهم شرف العمل فى هذا المجال الرائع، ولا كأنهم عرفوا فى يوم من الأيام شروط المهنة، ولا كأنهم فهموا فى يوم من الأيام أهمية صناعة الثقافة بوجه عام وفى بلد أهم ثرواته هذه الصناعة. ولا كأن شهرتهم جاءت بسبب أنهم ينتمون لفن هذا البلد، وهذا البلد بالذات دونا عن غيرها، يعنى لو كانوا من أى مصيبة تانية ولا كان حد عبرهم كام فنانة من غير هذا البلد اتحجبت وألا اعتزلت؟؟ وحتى لو سمعتوا عنهم؟ أنا شخصيا دلوقتى مش حاضرانى ولا واحدة.. إشمعنى المصريات؟ وليه الأذعرينة دى؟؟ تتحجب وتعتزل بأذعرينة.. وترجع بأذعرينة.. وهاتك بقى يا فتوى وتصريحات وأحاديث مطبلة كلها، وييجوا يمثلوا ما تلاقيش أى عبقرية من أى نوع.. لا فرق. وحتى ردودنا على هذا الكلام أصبحت معادة ومكررة حتى ما بقيناش نرد.. بلا خوتة بقى. ع العموم ليس هذا هو بيت القصيد.. الزهق حاصل من إحساس جماعى إن فيه ناس عمالة تزقنا بعيد، مين إحنا..ومين اللى بيزقنا؟ إحنا الناس اللى عشنا فى هذا البلد فى عزها.. شفناها منورة بثقافتها وتراثها وكتابها وصحفييها ومطربينها وأفلامها وحضارتها الفرعونية والإسلامية والقبطية والإغريقية.. وآثارها وفولكلورها ورقصاتها ومواويلها وقصايدها وشعرائها.. أوبراها وكونسيرفاتوارها وباليهاتها حتى علماء أزهرها وكنيستها كانوا نجوم.. سياسيينها ووزراءها.. إعلامها واستعلاماتها.. نشرها ومطبوعاتها.. مسرحها وإذاعتها.. كل حاجة كل حاجة. ومين اللى بيزقنا بره؟ مين اللى بيشغل مساحات واهية مؤقتة والله أعلم؟ مين اللى مالى الدنيا لغو وكلام وهرتلة وزعيق وصخب.. مين اللى بيزيح سكان البلد الأصليين عشان يحل محلهم سكان تانيين ماحدش عارف هويتهم ولا طعمهم ولا حتى هما عارفين.. أقطع دراعى لو كانوا عارفين بدليل التردد اللى بيظهر عليهم والإقدام والنكوص.. الحماس وخبوه.. التناقض المذهل فى المظهر والمخبر.. مين دول؟ مين الناس الكتير دول اللى بيطلعوا فى التليفزيونات بيقولوا إيه؟ وبيعملوا إيه؟ وما بيتكسفوش ليه لما يبان زيفهم أو تهورهم أو كذب ادعاءهم؟ البيه التقى المعتبر.. المعترض على كل الناس ومتهمهم فى دينهم.. ياترى بيدفع ضرايب على الرقية الشرعية اللى بيقبض عليها فلوس دى؟؟ من باب التدين يعنى؟ على أساس إن ده الوطن يعنى اللى بنطلع فى تليفزيوناته ونقبض على كل لقاء نعمله وكده. إيه كم الفتاوى اللى تخنق ده؟ إيه كم الكراهية اللى حوالينا ده؟ إيه الناس المتفرغة ل«اقلعوا البسوا» كلوا وما تاكلوش.. صوتكوا حرام.. وشكوا حرام.. الست القاضية حرام.. المأذونة حرام.. الفن حرام.. التمثيل حرام.. الضحك حرام.. ماتسلمش عالقبطى لاتخش النار.. تحط فلوسك فى البنك حرام.. تديها لواحد بدقن يوظفهالك حلال.. ماتصلليش حاتخش النار.. تاخد رشوة يجوز عشان الحكومة بنت ال.... ما بتدفعش ماهيات عدلة.. رضعى السواقين يا ولية عشان يبقوا محارم.. لو شفت إسرائيلى فى الشارع إسأله «إنت إسرائيلى؟» إذا قالك آه.. تسأله عنده كام سنة وأعزب وألا متزوج ويعول؟.. ولما تتأكد من المعلومات تيجى مطلع السنجة وغازه ف ننى عين أهله.. دخن سجاير وأنت صايم.. ياريت شيشة بقى عشان تعطر الجو.. إذا اشتريت فرخة بيضا عايشة وواكلة دهن خنزير.. اقنيها عندك تلات تيام.. سيبها تاكل وتخرج.. تاكل وتخرج.. لحد ما تتأكد إن دهن الخنزير خرج منها إدبحها وكلها.. التجميل حرام بيغير من خلق الله.. ياستى ده مش تجميل.. الولية صدرها واصل لركبها.. بتمشى تتكفى على وشها.. نسيبها كده مركبة تقيلة زى المركب اللى نازلها هلب؟.. شرب البول حلال وألا حرام.. اللى تلبس تى شيرت عليه مهند حاتروح النار.. ماحدش قال لنا اللى يلبس تى شيرت عليه نور حكمه إيه؟.. عادل إمام كافر اهدروا دمه.. عبدالسميع كتب كتاب ولعوا ف أمه. كل شىء حوالينا بيزقنا بره الوطن، مش الظواهر دى بس لا حاجات تانية كتير جايالها بعدين. كنت فاكرة إنى زهقت لوحدى طلعنا كتير حزب بحاله.. وقررت أنا واللى اكتشفتهم.. نسمى نفسنا حزب الزهقانين. وقررنا نفتح باب الانضمام، أكيد فيه ناس كتير قوى زينا، ناس كانت زهقانة فى سرها ومابتقولش، برضه خوف من إيه؟ مش فاهمه. ماهى بلدنا برضه، وإحنا فيها م الأول بقى، ومش حاننزاح ولا ننقرض، وحايبقى أول هام فى جدول أعمال حزب الزهقانين ده.. التشبث. حانتشبث بالبلد اللى عشقنا هواها وميتها.. واللى سمعنا فيها عبدالوهاب وأم كلثوم.. حانتشبث بغنا عبدالحليم.. وشعر جاهين وحداد حجاب وبيرم.. حانتمسك بإدريس والسحار.. عبدالقدوس ومحفوظ.. حانفضل نعيد ف أغانى الحجار والحلو وصالح.. ونتمايل على أنغام عمار والطويل والموجى. ولما نعوز نهيص ونفرح حانرقص مع كاريوكا وسامية وفريدة فهمى.. ونتنطط مع زوزو.. ونحذر ونفزر مع شيريهان ونيللى.. ونرفص م الضحك مع المهندس ومدبولى وهنيدى.. وحانقرا لويس عوض والفريد فرج ونرسم مع جورج البهجورى. ولما نبكى حانبكى بكرامة من غير تسول وبربرة، وحا نحزن بجلال زى عم جاهين ما وصانا. بصوا بقى البلد دى بتاعتنا وياحنا يانتوا.. على فكرة أنا حاغير اسم الزهقانين ده.. حاسميه حزب المتبتين فيها.
