و إيه تساوى يا صور وسط الأصول صورك شبه أصل البشر لكن على نغمة فضول إحساس رهيب بيشدنى يرسمنى بمشى فى وسطهم و اكتب على حيطة أمل ذكرى المرور ************* بيشدنى افتح بيبان شارع طويل شد انتباهى فى مشيته سهم اترسم باصص على حاره اتجاهها ع اليمين يافطتها مزحومه بتراب بيعرفك عُمر السنين مكتوب عليها يدوب (أ ) من اسمها و باقى الحروف اتكََسَرت اما ال أ واقف حزين ************** فى البدايه على الشمال واقفه واحده بألف راجل رغم هم الدنيا كله راسمه ضحكة و فى عينيها ميت سؤال واقفه بتبيع الجرايد للى رايح و اللى جاى كل أحلامها فى حياتها انها تجوز بناتها و ابنها يُصدق فى وعده انه ينجح بامتياز أصلها حلفت لابوهم قبل ما يفارق حياتهم انها تربى العيال ************ بعدها بكام خطوه واحد بينادوله عم لطفى العيون الطيبه اللى مش راسمين زعل بس جوه القلب طعنة جاتله من أكبر ولد اللى كان تعليمه عالى بس أخلاقه ورق بعد ما اتعين فى منصب ساب أبوه من غير سند ********** بعدها بصت عنيا ع البيوت و اترسم معنى التراث لصورة من رصه قلل فوق جدار البلكونات و بنت حلوه صغيره بتبص بعيون الخجل نظره عيونها مِركزه ف ابن الجيران اللى كان واقف بعيد يضحكلها و يقولها باللغه العيون انتى القمر عايش فى دور ست البنات ************ و قهوه بلدى مِشغله غنوه لنجاه اللى طلب قهوه بلبن و اللى سرح فى الغنوه و اختار السكات و اللى بيحلف ع اللى جنبه و بيعزمه ع المشروبات و هناك صاحبنا و شِلته بيقول قصيده للوطن و بيوصفه انه قتل قلبه اللى مات ********* يا بختها حاره أ حضنت بساطة قلب ناس ما لهمش فى خداع البصر لكن لهم مليون علامه فى وشهم بطمنك ان الزمن لساه وفى رغم اللى فات ****** #سهام_سامى