صباح الخير يا خاله عيشه أنا جيت أشرب معاكي الشاى ونتكلم على حال البلد حبَّه وحال الدنيا والعيشه واشوفك انتي عايشه ازاى ولو إني أنا للحاله مش حبِّه يدوب هسأل سؤال سؤالين على الأكتر وأقولك باى ............... تعالى اقعدي جنبي هنا شويه هقولك ع اللي راح والجاى زمان احنا اللي عشنا المر وكفروا عيالنا بوطنهم وراحوا فطيص فى عرض البحر وباعوا للشيطان حالهم عشان زهقوا حياة الفقر وابني راح بدون ديَّه مع اللي راح ومش راجع ودان الغربه مطروشه بنادي عليه ومش سامع وعاش اللي فَلَت م الموت بنص كرامه مهدوره بيتسوَّل طريق رجعه ومش قادر وسفاراتنا بتشرب نخب أوجاعهم سهام إهمالها والغربه تعشش يأس ف ضلوعهم وشايفين البلد مفتوحه ع البحري و ع القبلي و ع الشرقي و ع الغربي ومرتع للي ما بيسواش وبالاكراه جبروها تحب وتعشق الأوباش وقطاع الطرق بالسلب يسعوا في مناكبها وطول الوقت مكفيَّه على ركبها برغم الكسر بتلملم فتافيتها وتجري نهارها ع الايتام وتقضي ليلها سهرانه توزع ضحكها الأصفر على الأصنام وتعبانه ودمعتها ما بتجفش يا بلدي تكيَّه ووسيَّه لأوطى الناس وقفنا طابور مالوش اخر بنصرف قِلِّة الحيله ببطايقنا لا طايقين الحياه فيها ولا حالنا من اللي فينا طايقنا وطقِّينا وملِّينا بأعلى الصوت نادينا ماحدِّش غيرنا سامعنا حاولنا كتير على المتداري والمكشوف نغيَّر بس لو مرَّه مسار الذل ف عروقنا وماقدرناش وليل مشبوك ف ديله نهار وراحه مافيش وكل الجري على هِدْمَه ولقمة عيش وكرهِت بعضها الأيام لأن الخلْق كرهتها ودابت في مرار الكُرْه حلاوتها هقول لك ايييييييه ؟؟؟ يا بنتي الهم مات مسموم بطعم المر ف حلوقنا وفُضِّيها بقى سيره وخلِّينا نعيش بُكْره ................. وشايفه إيه من اللي جاى يا خاله يارب يكون حجات تِفْرِح وييجي يوم قلوبنا بالأمل تطرح ............... بلدنا بكل قوتها وعزم شبابها يا بنتي طرح ثوره لكل خسيس ومتآمر ظهر عَوْره وشفنا فضيحته بجلاجل وجلجل من ورا القضبان ( أنا موجود وكان عايش وفاكر نفسه مش مِنْطال وانه ع السحاب مسنود وشايف مُلكه متمطرق مالوهش حدود وشفنا قلوب طيور خضرا بتطرح خير على روحهم يبدَّوا الغير وزرعوا دمُّهم متاريس يموتوا بس مصر تعيش وكان الدم مش غالي على نيلها وموالها ولون الشمس فى عيونها وقسموا الشَربه واللقمه على غيرهم وشفنا شبابنا من تاني يفتَّح ورد ف شبابهم ياريت ابني رجع بلده وكنت اهديه لمصر شهيد وكان يومها هيبقى العيد وياريتنا ... بقلب امبارح المجروح نشوف بُكره خيوط الضلمه تتداري وشمس من العدم تطلع ولا للضيم ولا للبين في يوم نركع وولاَّده يا بلد الخير وأرض المعجزات والصبر بِنُص جناحِك المكسور هدِّيتي جبال القهر وعديتي في قلب النار ولينا الفخر بعلو الصوت وراسنا لفوق مرفوعه بعزم مافينا من همَّه ومن فرحه نقول ... اننا من مصر