فى ألبوم الصور عمرك فى تحويشه و تسبق ضحكتك دمعه فى ساعه شوق تشوف صورتك يدوب عيل لكن مبسوط و تتمنى السنين ترجع لعمر بعيد لضحكه طفل ملهوفه ليوم العيد ينام حاضن فى أحلامه بلبس جديد و صوت ثومه تغنيله يا ليله العيد و يستنى النهار يطلع عشان تِكمل معانى اليوم بلمه كل أصحابه اللى مش باقى خلاص منهم غير صوره من الألبوم ********* فوتوغرافيا الحياه واخده علينا عهود نعيش راسمين فى تكشيره بنظره بتعشق الحيره و لو لحظه فرح جايه بتتلهف يا حزن تعود ********* و صورتك جوه مدرستك فى تخته تحسها بتاعتك *********** و شكلك و انت فى الجامعه و فجأه ترسمك دمعه و تنهيده و ميت ضربه على كفوفك و تتردد أوى فى خوفك لصوره حاططها بالمقلوب عشان سلمت بالمكتوب و حب العمر ضاع منك و راسم جنبها قلبين و غنوه شاديه ويا حليم بحاجه غريبه جمعتكم و فجأه فراق دخل بينكم و صوت فيروز بقى فى ودنك مالوش تأثير و راحت بهجه الدنيا بقالها كتير ************* و منها تنقلك رحله لحزن كبير لصاحبك اللى سميته شهيد النيل صديق عمرك و نومه الارض فى التحرير فى لحظه موته برصاصه فى أحلامه وآخر جمله قالهالك هنتقابل اكيد تانى و لسه صداها على بالك ********* فى آخر صفحه فى الالبوم مكان فاضى لضحكه ضيعتها هموم لكن ربك رحيم قادر يخلى فرحتك مقسوم