شيخ الغفر إصح يا عمده.. فوق بقى يا عمده.. العمده فيه إيه يا وله.. فيه إيه يا بوز النكد.. شيخ الغفر البلد كلتها ولعت يا عمده.. العمده عرفنا يا فالح.. ما هو الواد عوضين قالها قبلك يا شيخ الغفر.. شيخ الغفر والحل إيه يا عمده؟.. العمده وانت مالك متشعتف كده ليه يا وله؟.. إيه يعنى شوية براميل جاز ولعت.. ما تروح يا وله تنادى البقر اللى سابوا النار ولعه وجريوا ع الغيطان.. شيخ الغفر هيعملوا إيه يا عمده.. دول مش قادرين عليها وخايفين على مواشيهم وعلى عيالهم.. العمده هتفضل طول عمرك حمار يا شيخ الغفر.. شيخ الغفر ليه بس يا عمده؟.. العمده ابعت يا شيخ الغفر مرسال للواد صميده الكهربائى يشغل التلفزيون اللى احنا حطينه أدام الجامع عشان البقر بتوعنا يشوفوا مصايب الدنيا كلتها.. شيخ الغفر ودى معناتها إيه يا عمده؟ العمده بيقول لى معناتها إيه؟.. هفضل أنورك لحد إمتى يا شيخ الغفر؟.. ما هو الناس لما تشوف فى الأخبار منظر الحرايق والفيضانات والكوارث شغاله فى العالم كله يقوموا يهْدوا وينسوا الهم اللى هم فيه يا خايب.. فهمت يا بجم؟.. شيخ الغفر يا سلام يا عمده.. دا انت عليك مخ متكلف تمام يا عمده.. علي النعمه مخك ده مخ تفصيل يا عمده.. العمده هم مش بيقولوا يا وله اللى يشوف بلاوى الناس تهون عليه بلوته؟.. شيخ الغفر إيوه بصحيح يا عمده.. العمده وبعد ما تخلص الأخبار خللى الواد صميده يحطلهم شريط كورة من بتاع كاس العالم خليهم يتلهوا على عينهم.. شيخ الغفر يعنى نخليهم عايشين فى غيبوبة يا عمده؟.. العمده يخرب مطنك يا شيخ الغفر.. ما انت بقيت تفهم أهو يا وله.. شيخ الغفر طيب إيه رأيك يا عمده لو لمينا شوية التلامذه اللى فى البلد وعملنا منهم فرقتين وجبنالهم كورة كفر وحطناهم فى الجرن عشان ما الناس تتلم وتتفرج على هبلهم.. العمده إيه دا يا وله؟.. انت عيان يا وله؟.. شيخ الغفر ليه يا عمده؟.. العمده أصلك أول مرة تقول حاجة عدله يا وله.. بس ما تنساش الجريدة اللى العيال بتوع الجامعة معلقينها على شجرة الصفصاف اللى فى السوق.. شيخ الغفر أحرقها يا عمدة؟.. العمده رجعت تانى للغباوة يا شيخ الغفر.. ما تسأل حد على قطعة غيار لمخك الزنخ ده يا وله.. شيخ الغفر أمال عايزنى أعمل فيها إيه يا عمده.. العمده خد عيلين من بتوعنا وخليهم يكتبوا كام خبر ع البت لواحظ الخباصه وكام صفحه على الكوره والزقهم ع الشجره عشان ما يتلهوا فيها البقر ويريحونه.. شيخ الغفر بس فيه حاجه محيرانى يا عمده.. العمده إيه هي يا شيخ الغفر؟.. شيخ الغفر أنا حاسس إن الناس بدأت تزمزق يا عمده وخصوصا شوية التلامذه بتوع البلد وعاملين نفسيهم متنورين وبيقولوا حاجات غريبه.. العمده زي إيه يا شيخ الغفر؟.. شيخ الغفر بيقولوا إن العمده واللى معاه فى الدوار مِكَحْوشين على كل حاجه.. ومعدش فيه لا قانون ولا أمان ولا دياولو.. ومعدش فيه ديموقراطية.. العمده طيب وإيه يعنى.. ولا يهمك يا شيح الغفر.. خليهم يلسنوا ويفضفضوا.. هو يعنى الكلام عليه جمرك يا شيخ الغفر.. شيخ الغفر إلا بصحيح.. هو يعنى إيه ديموقراطية يا عمده؟.. العمده يعنى نبقى احنا من طينة البقر دول يا شيخ الغفر.. شيخ الغفر تصدق يا عمده؟.. العمده إيه يا شيخ الغفر؟.. شيخ الغفر أنا كنت فاكر إن الديموقراطية دى أكلة محشى يا عمده.. العمده ما انت طول عمرك جاهل يا شيخ الغفر.. وجهلك ده هو اللى جايبنا ورا.. شيخ الغفر دول بيقولوا إن العمده معدش همه حالة الفقر اللى احنا فيها ولزمن يشوف له حل.. العمده تقدر تقول لى احنا عاملين زرايب الحبس اللى ورا الدوار لمين يا شيخ الغفر؟.. اللى مش عاجبه شغلنا يا إمن يشوف له بلد ثانية يا إمن تحطه فى الحبس يا شيخ الغفر.. شيخ الغفر لكن يا عمده أنا شايف برضه إنك تبحبحها ع الخلق شوية.. العمده إنت بتقول إيه يا شيخ الغفر؟.. انت ناسى إنهم عمالين يجيبوا ف عيال.. وغلبنا نقول لهم "أنظر حولك.. أنظر حولك".. ونديهم موانع مجانية مفيش فايدة.. وجت الحباية إياها نيلت الدنيا.. شيخ الغفر بس يا عمده فيه ناس تعبانه خالص ومش لاقيه.. العمده هو انت عايزهم ياخدوا ع الراحه يا شيخ الغفر.. عشان بعدين يفوقوا ويقولوا عايزين كمان؟.. صدق اللى قال "جوع كلبك يتبعك".. شيخ الغفر طيب يا عمده افرض يعنى.. بقول افرض.. افرض مثلا يعنى.. العمده ما تتكلم يا شيخ الغفر.. خرست ليه وافرض إيه؟.. شيخ الغفر بقول افرض يعنى.. العمده هو انت هتقعد تعنعنلى.. ما تقول يا شيخ الغفر وخلصنى.. شيخ الغفر بقول افرض إن الكلب ده جاع قوى.. مش ممكن برضه ياكل صاحبه!.. العمده جتك نايبه يا شيخ الغفر.. يظهر انك مش فاهم حاجه.. شيخ الغفر حاجه؟.. حاجة إيه يا عمده؟!.. العمده ساعتها هاخد أول قطر على بلاد برة عدل.
