حكالنا حنفي بن تامر وقال :- رحت اسأل ست البيت , طنط محاسن معيط , عن فن (الاتيكيت) , ف الذوق و المجاملة , وطريقة المعاملة , الحلوة وكيت وكيت !!! ...قالت لي : يا سلام , كانت احلا ايام , ايام زمان الرقيقة , كات ايام الحقيقة , ما شوفتش زيها تاني , انا دلوقتي باقول ياني , من قلة المجاملة , وخشونة المعاملة !! دلوقتي الصورة الكاملة : , ان الستات مهابيش , والرجالة شيش بيش , , (طروبشات و طرابيش) ,..... البنت النهاردة بجحة , ولسانها طويل وتنحة , والراجل دمه واقف , بارد مالهوش مواقف , تكبره فعنيها , وتثبت رجولته عليها , قولتلها : ما تعمميش , مش كلنا ياميش , قالتلي : بكرة تطوف , و تشوف من دول الوف , و الاتيكيت يتلخص , في هذا المخلص :- الراجل عاوز واحدة , مطيعة له مش جاحدة , لافضاله عليها , عايز يبقى فعنيها , هو الاحلا والاحسن , عايز يبقى كل حاجة , فحياتها واهم حاجة , عايزها تقوله دايما :- (( باحبك ياللى انت عليا افضالك ...ولو انا مشغولة عنك افضالك )) عايزها تحس بيه , وتحط ثقتها فيه , وتعتنق افكاره , ومبادئه وشعاره , ف الدنيا الغريبة دي !! والست عاوزة واحد, يشكرها على عمايلها , وبالغزل يجاملها , مش يبقى عندي وجاحد ؟ , يصرف علي احتياجاتها , ويلبي لها حاجاتها , , ويحترم كرامتها, ومشاعرها وشخصيتها , ويسمعها لما تتكلم , ويلحقها لما تتالم , يحسسها بالامان , والحب ولاطمئنان , مش يمسك ليها الفلكة؟ !!! , لا يحسسها انها ملكة , في قصرها معظمة , ( معززة مكرمة ) , يحسسها انها مزة , القرب منها لذه ... على راي ابن بجاتو , في مجلداته , ( بقالي مدة كبيرة , معاكستش مزة خطيرة ) :- " ورب واحدة مزة ...ومش عارفه انها مزة ...ورب واحدة مش مزة ...ومفكرة انها مزة !!! " وقال ابن البيه , ألف رحمه عليه , فكتابه ( التربية , نداء وتلبية ) :- ( إشبع ليها احتياجها , وعلي لها مزاجها , فبأبسط الأشياء , تملك قلوب النساء , وبأعذب الكلمات , تجذب ليك البنات , والبنت بقا عديك , يا تقول من بعديك , ( الله يرحمه ) , او ( الله يجحمه ) !!! ....هما البنات كدة , كائنات متنكدة , عليك ف الدنيا تفول , وعليك ف الاخرة تولول !!! ) ( ينتظر الرجل من المرأة الامانة ....وتنتظر المرأة من الرجل الأمان ) ( على الرجل ان يتحمل ثرثرة المرأة...وعلى المرأة ان تتحمل زرزة الرجل ) !! رحم الله ابن البيه , عارفه كان مبدأه ايه ؟ ( اسلامية مية مية ..أم الشيخ حازم مصرية ) عارف انتخب مين؟ , قولتلها : انتخب مين ؟ , أكيد طبعا ولازم , هينتخب الشيخ حازم !!! , قالت : لاءه دة رشح , أطعم وألذ مرشح, الأصلح والأنسب , والأجمل والأطيب , المرشح الشاب , اللى اهتم بالشباب , وفتح لهم الباب , للحياة الكريمة , بالبعد عن ريما , وعاداتها القديمة !!! ....ولكن للأسف , يا ابني مع الأسف , المرشح دة , ماسافة ما جه , مسافة ما انسحب , اه والله انسحب , بسرعة من سكات , من الانتخابات !! قولتلها : كدة انا متحير , ها قولى انتخب مين ؟ , قالت لي : هيكون مين؟ , طبعا ( سعد الصغير ) !! , الله يحميه لشبابه , وقال عنه ابن البيه , ألف رحمه عليه , فمقدمه كتابه ( اذا فاز سعد ...ستنعم مصر بأول رئيس مصري عربي مسلم ينفع فشتا او صيف ...كلنا سعد كلنا سعد ...سعد سعد يحيا سعد ...) كان بيحب سعد , وبيقتضي بأفعاله , وبحكمه وأقواله , كان معتنق أفكاره , وبيردد أشعاره :- (( مش اى حاجة لونها ابيض تبقى وزة ...ولا اي بت لابسه كت تبقى مزة )) لدرجه إنه أسس , في منطقته مجلس , سماه ( سعديون ) , هدفه سد ديون , مصر عشان تتأسس , وكان شعار المجلس , : ( مصرنا لازم تتغير , على ايد سعد الصغير ) , وكان نشيد المجلس :- (لا سعد عب وهاب ..ولا سعد زغلول ..ولا سعد اليتيم ...ولا سعد بهلول ..سعد الصغير وبس ...هنتغير وبس)... وكان ابن البيه , الف رحمه عليه , على بلده غيور , كان ضد (حزب النور) , قال عنه في ديوانه , ( ربيعنا قبل أوانه ) :- (( مرشح ( حزب النور ) رمزه دلوقتي ( البيانو ) .... مش المعازف حرام ؟ بانوا بقا على اصلكو بانو )) وعمل غنوة ( عديم ) , ضد النظام القديم :- لما تشيل همك تلال ...وتبقى حاجة مالوفة عادية ...لما يسيل دمك شلال ..منغير ادنى حساب ولا دية لما الحاجة تغلا وتغلا.. واحنا ال نرخص .....واما الحاكم صوته يعلا.. واحنا ال نخرص !! كان ف الحديد بيفوت , و قال قبل ما يموت, (اوعوا لما اموت ..حد يزعل عليا ...اللى هيزعل عليا ...والنعمه هازعله !!! ) ....واهو راح لتاني ملكوت , وصانا قبل ما يموت :- اوعى تبكوا عليا لما اموت ..........انا باحلفكو بالله عليكو حياتي كلها ارخص من اى....دمعة واحدة تنزل من عنيكو قال حنفي بن تامر : وانفتحت ف العياط , واللطم والصواط , قولتلها : ابوس اديكي , كفاية حرام عليكي , ثم يا ست الحساسة , يا طيبة يا نفاسة , ايه دخلك ف السياسة؟ , وفسيرة ابن البيه , انتى شطحتي كدة ليه ؟ , كان موضوعنا (الاتيكيت) , بين الراجل والست , مش نفتي بقا ونفت , انا غلطان انى جيت !! , بصت من تحت لفوق , وقالت : اوعى تمشي , لو قولت انك هتمشي , تبقى قليل الذوق, ودة ضد الاتيكيت !! , قولتلها : امشي؟ ياريت !! , دة حلم بالنسبالي , دلوقت اهوه جه فبالي , بعدين سيبتها ومشيت , وانا باحمد رب البيت , انى رحمت وداني , ونافوخي هوا التاني , من حزنها وزنها , ولتها وعجنها ...والختام !!!