نجوى عبد الله (مدربة معتمدة في القيادة التربوية ) في جلسة قديمة لي مع مجموعة من أصدقائي كانت حول تعريف الست الشاطرة .. والحقيقة إني على مدار أربع سنين رؤيتي للتعريف ده اتغيرت كتير واتحولت كتير .. في وقت من الأوقات كنت معتقدة إن نظافة البيت والأكل هو مقياس الست الشاطرة، أوقات تانية كنت شايفة إن الشخص المهيمن هو اللي شاطر فبالتالي الست القوية هي الشاطرة، وأوقات تانية شفت إن الراحة والطرف وإن الست يتوفرلها رغد العيش هو المؤشرإنها ست شاطرة .. وجهات النظر كلها انهارت أمام تجارب حياتية شخصية وغير شخصية، ومحتوى معرفي علمني إن لكل شئ تمن، هتدفعه قدام كل اختيار سواء رضيت أم لم ترضى.. الخطاب النسوي اللي بيقول للبنات انزلوا اشتغلوا واستقلوا ماديا ومتقعدوش في البيت، خلق مغالطة مع بنات كتير الظروف اجبرتهم على البقاء في البيت أو هو كان اختيارهم من البداية، وأنه الخطاب ده بيقلل من اختيارهم او وضعهم،أو أنه بيرسم للست نموذج لو مش ماشية عليه تبقي برة دائرة النجاح والنجومية .. والحقيقة إن ده كلام غير صحيح وحتى لو تبناه بعض النسويين ع السوشيال ميديا سواء كان بتريقة او بتحليلات.. الخطاب المعتدل اللي بيقول للست اختاري اختيار آمن مريح عامل حساب المستقبل ومش بيستنزفك ولا بتفقدي فيه حقوقك وحرية قرارك هو اللي انا بشوفه الأصلح (من وجهة نظري)وخاصة إن مينفعش نخاطب بنت اتجوزت في سن 18سنة أو أقل من عمرها ومعاها طفلين ونقولها لا انتي كده مش صح، وهي بالفعل قايمة بدور ومجهود يصعب ع ناس كتير تقوم بيه .. اختيارها كان بناءا على ايه ، بسبب ايه ، هي ندمانة عليه دلوقتي، مرتاحة فيه ... كل ده هي مسئولة عنه وميقللش من انجازها او اللي حققته .. في المقابل الخطاب الديني اللي بيوصف الست او البنت اللي اختارت الشغل والاستقلالية عن علاقة هتحصر اختيارها في البقاء في البيت وتربية الاولاد بأنه تشوه للفطرة وتخلي للمرأة عن دورها .. ده خطاب مش مقبول بالنسبة ليا .. اللي نقدر نشجع عليه هو إن اللي اختارت تقعد في البيت متنساش العالم اللي بيتحرك بسرعة من حواليها وتكبر في العمر وهي لسة في العشرينات .. تتكلم مع بنت تلاقيها متعرفش تشتغل فايل ولا عمرها فكرت تعمل ايميل .. اخر مرة قرأت معلومة عامة كانت في بوست من بوستات الاشاعات .. انتي كده بتختاري تسجني نفسك في اختيار واحد .. خلي عندك دايما باب مفتوح ولينك تقدري تخرجي منه لو احتاجتي ليه .. ونأكد على أن الاختيارين مبيتعارضوش سوا، وانك تقدري تشتغلي وتحققي ذاتك وتتجوزي وتربي العيال مع جوزك، ونأكد على إن محدش من حقه يمسك تشيك ليست (قائمة مراجعة وفحص)لحد وبيقول برافو بقيتي ست شاطرة ، اللي ماسك *تشيك ليست* عارضوه عادي .. توضيح بسيط : انا مش بشجع البنات تقعد في البيت ومتشتغلش، بالعكس انا بشجع اللي لسة مخدوش القرار وقدامهم فرصة الاختيار انهم يستقلوا ماديا، لكن انا بتكلم عن وضع قائم بالفعل لبنت اتجوزت وخلفت وحاسة انها محققتش حاجة أو مش مناسبها الخطاب النسوي بان يكون ليكي كيان وبتشتغلي وبتحققي انجازات في حياتك .. وشكرا
