أنت علشان أوصفك لازم يكون في حروف للكلام لسه متقالتش ، حروف لمّا تتشبك جنب بعضها تكون أنت ، أنت اتولد على أيديك واحده تانيه خالص غير اللي أدام الناس ، واحده كانت بتمثل القوة لكن في الحقيقة كانت ضعيفة من جوّه ، بس مع أول حرف من حروفك وكلامك معاها فاقت ، زي متقول كانت في غيبوبة طويلة أوي أوي وفاقت على بحر من الحنان على راجل بجد عمرها لا شافت ولا حتى سمعت أو فهمت معنى كلمة راجل إلا معاه ، قلبها دق بجد وسمعت دقاته وهو بيكلمها ، كانت حاسه أنّها بتحلم حلم جميل وهتنام وتقوم وتلاقي الراجل ده كان مجرد حد بيزورها في الأحلام ، ولمّا سمعت صوته قلبها طار من الفرحة وفضلت ترقص وحسّت أنّها رجعت طفله تاني ، من كتر قلبها ما دق كانت خايفة يقف من الفرحة ، فرحة غريبة عمرها ما في يوم حسيتها ، دخلت نامت وحضنت صوته وباست صورته وحتى كلامه ، افتكرت أنّها لمّا تقوم خلاص هتلاقيه حلم جميل عدى وفات ، بس لاقيته بيكلمها ويشاغلها ويسأل عنها وبقى حتى مستني سؤالها وبحب يعرف أخبارها ويطمئن عليها وعلى أحوالها ، يوم ورا يوم بقى حياتها بقى دنيتها اللي عايشه عشانها بقى راجلها بقى كل حالها وأحوالها ، وكل حاجه حلوه في الدنيا بقت تشوفها على أيديه ، مع أول مره شافته وأيده لمست أيديها حسّت إحساس عمرها ما حسّت به ، خطف كل حاجه فيها بقى حبيبها وحياتها ودنيتها وأبوها بقى كل الناس بالنسبه لها ، كل الناس في عينيها هو ومفيش غيره ، هو غير كل البشر راجل كده مفيش فيه غلطه حب أيه وحنيت أيه ولّا في الغيره يلهوووووي عليه ، غيره بجد مليانه إحساس وحب وحنان ، عمرها ما خافت إلا عليه ما هيّ ملهاش في الكون دا غيره عايشه بحبها ليه بتتنفس حبه وهواه ومن غيره يبقى الموت أرحم . لمّا بيجي ياخدها في حضنها كام إحساس بتحسه ؟ يااااااه متعدش ، حتى في مَسكت أيده لأيديها حتى سلامه العادي قصاد عيون الناس ، لمّا بس يقولّها ازيك يا حبيبتي بتحس ساعتها انّه أخوها اللي بتفرح بيه أوي وبتحس انّه حارس بكره بتاعها بعد ربنا ، وكمان بيخليها تحس مليون إحساس انّه أبوها سندها وضهرها وحاميها من نفسها وساعات بتحسى أنّه روحها وملامحها وضحكتها وحبيبها اللي مالي عينها وساكن جوّه قلبها وعقلها ومالي عليها أيامها وثوانيها أوصف أيه ولّا أيه دا أنا محتاجة مليون حرف ومليون وصف أوصفه بيه ، راجل من الأخر ما لوش وصف غير إني بحبه وبعشقه وبحب التراب اللي بيمشي عليه دايما بيكون وحشني أوي أوي أوي ، هو الأمنية اللي بتمناها في كل ثانيه بتعدي عليَّ ، ربنا يحميه .
