كان نفسها ساعة ماسمعته وهو بيعترف لها بحبه الكبير لها الذى لم تغيره الأيام ...أن تجرى فى الشارع وتستنشق هواء نظيفا وتقول لكل الناس بأعلى صوتها : أنا مش عبيطة ..أنا مش هبلة ..جوزى فعلا بيحبنى ! سألتنى بكل براءة : هى ليه ماما مش قادرة تقتنع إن جوزى بيحبنى ؟ ليه دايما شايفاه خاين وعينه زايغة ؟ قلت لها :ده مجرد خوف عليكى أنت عارفة الأمهات ، كل أم منهم شايفة بنتها مبتغلطش ...والأكتر من كده كل أم شايفة اللى جه خطف منها بنتها حبيبتها من حضنها ده ابن ستين فى سبعين والأهم والأقوى أنها شيفاه نسخة جديدة من زوجها اللى طول عمره مطلع عينها ، ياحبيبتى كل أم لاتتمنى لبنتها أبدا أن تعيش مثل حياتها ..شايفة أنها تعبت واستحملت علشان بنتها تكبر وتتعلم وتلبس وتعمل كل حاجة أحسن من اللى حصلت لها فى حياتها ، يبقى إزاى بنتها دى تقع فى نفس الغلطة والفخ اللى هى وقعت فيه وشربت فيه المر .. إزاى تسلمها بإيديها لراجل يقرفها ويعرف ستات عليها ، ومش بس كده .. لأ ده كمان يرمى حمل البيت والأولاد عليها ..وصلى ..ذاكرى ...ودى الدرس ...فيه تدريب فى النادى ..إدفعى رشوة للحكم ... شوفى حد من قرايبك يعين الولاد فى الحكومة ..بذمتك لو أنت مكان ماما وعيشتى التجربة كده ...حتوافقى على خطوبة بنتك ..أوعى تقولى أه ؟ قالت وهى تحاول أن ترسم الأهمية على شخصيتها ..وأن تتقمص دور أم العريف : لا ياطنط أنا بالعكس حساعد بنتى تختار اللى يناسبها ..حتى لو كنت عشت تجربة زى اللى حضرتك وماما بتحكوا عليها ..مش ححمل بنتى ذنب إنى معرفتش أختار راجل يحبنى ويصونى ويشاركنى فى الحياة مش يحملنى هموم الحياة كلها لوحدى ...ياطنط أنتو جيل مختلف ..جيل علشان الست تثبت شطارتها كانت هى اللى بتطلب من جوزها يسيب لها كل حاجة ... كلمة خليك ياحبيبى نايم مستريح ده أنت شقيان وتعبان طول الأسبوع ..حروح أنا أجيب طلبات البيت مش ممكن حقولها ..حقوله تعالى معايا نجيب طلبات البيت زى ما أنت طول الأسبوع بتشتغل أنا كمان طول الأسبوع بشتغل ...زى مامرتبك كله بيروح فى البيت أنا ربع فلوسى بتروح فى البيت والباقى مكياج وكوافير وكافيهات مع صحباتى ...كفاية إنى موفرة لك الفلوس دى كلها كان المفروض تدفعها ! وبالنسبة للمدرسة فيه باص ياخد الأولاد ويجيبهم أنا ليه أوصل وأجيب ولو مفيش باص يبقى أوبر أو كريم أو حتى تاكسى ..ماله التاكسى الأبيض ..أما النادى والتدريبات الرياضية فدى ملهاش لازمة أبدا ..عندنا 10 أو 15 بطل رياضى معروف ولا واحد منهم أتخرج من أكاديمية تدريب ولا من نادى معروف ..البطل بطل من يومه والموهبة من عند ربنا ..ليه بقى أتعب نفسى وولادى فى تدريبات وفى الآخر يطلع نقبهم على شونة وياخدوا ولاد المسئولين والمدربين يدخلوهم البطولات وابنى يخبط دماغه فى الحيطة ، ثم إزاى أتجوز واحد يقولى ادفعى رشوة ؟ أنا معملش حاجة غلط أبدا ..عاوز هو يدفع رشوة يدفع أنا مالى .. ثم أيه موضوع العين الزايغة والبصبصة ده ؟ مش معقول كل الرجالة كده أنا مش قادرة أصدق قلت لها: يعنى مش كلهم بس نسبة كبيرة منهم على الأقل ، قالت أكيد جوزى مش حيكون منهم ...ده بيموت فيا وبعدين لما بيشوف واحدة حلوة بيقولى الست دى حلوة أوى ياريتك كنتى شبهها ...كلام عادى يعنى بهزار وأنا برضه عادى وبهزار بعمل نفسى مسمعتش حاجة خالص ...وبعد كده بقوله فى الخباثة خلى بالك فيه قوانين ضد التحرش فى البلد ..الدنيا مش سايبة . قلت لها : أنا بجد عاجبنى تفكيرك المنظم وبتمنى لك حياة سعيدة مع زوجك وبالنسبة لكلام والدتك ولا تشيلى له هم ..ماهو ده اختلاف الأجيال ربنا يابنتى يكملك بعقلك ويجعل زوجك العزيز يحبك طول العمر . ردت بكل براءة ..أه والنبى أدعيلى لحسن المرات اللى أتجوزت فيهم قبل كده خلونى بدأت أصدق كلام ماما وأقول معاها حق كل الرجالة خاينين وعينيهم زايغة . سألتها وقد فاض بى الكيل ...ليه ياحبيبتى أنت سبق أتجوزتى قبل كده ؟ قالت وهى تتركنى وتمشى ..ياه دأنت قديمة أوى هو فيه جوازة دلوقتى بتستمر أكتر من شهور دى أطول جوازة بتقعد سنة إحنا عندنا 240 حالة طلاق فى اليوم ياحاجة . قلت لها معاكى حق ...يبقى كده الرجل حيلحق عينه تزوغ فين ...ده كلام قديم أوى هو بيتجوز على طول وربنا يخلى لنا قانون الخلع ..اللى طلق 80 % من شباب مصر .