نا زمان نفرح قوي لما نسمع اسم مصر في فيلم أمريكاني .. ولو بنشوفه في بلد برة مصر و نبقي عاوزين نشاور للناس الأجانب و نقوللهم دي بلدنا .. جايبين سيرة بلدنا .. و لما نلاقي صورة أو إعلان أو حتي نكتة ظاهر فيها الهرم أو أبو الهول كنا نتلزق جنبها فرحانين قوي إن لسة فيه حد فاكر أي حاجة عن مصر برة .. كان لما حد يسألنا إنتوا منين نقوله من إيجبت .. من مصر .. و يبقي قلب كيا ما وجعني السؤال ده .. و كان رده حسب المزاج .. اذا كان مزاجي كويس و عندي نفس طويل .. آخد اللي سأله في رحلة حوارية طويلة أشرحله فيها إيه هي مصر .. أما لو المزاج معكر و الصدر ضيق و النفس مكروش .. فمايسلمش الزبون من إيدي .. و يسمع من مختارات التهزيء و التريقة ما لا يحب .. و يأخي عيب علي شنبك و شعرك الاصفر اللي عاقده علي قفاك بوني تيل .. شفتني بعاملك علي انك كاو بوي ماسك اللاسو و بتسوق البهايم؟؟ .. شفتنيش شلت ريشة الهنود الحمر من فوق زرعة دماغك؟؟ .. إنت منين ياله؟؟ .. يقوللي من أمريكا .. منين أصلا ياد؟؟ .. هو فيه أصلا من أمريكا بتاعة أهلك دي؟؟ .. مرمي ف مركب من أنهي بلد و منفي علي هنا؟؟ .. جدك .. طبو زادة بتاع سلسالك .. كان من أنهي سجن ف أوروبا؟؟ .. وارد كريستوفر كولومبس وللا باحث عن جرين كارد و مستخبي في زحمة هارلم و بتشتغل دكاكيني؟؟ .. و الا ملقح بلاك علي أي واحدة تتجوزها و تتسلبط عالجنسية الأمريكاني؟؟ .. وكنا دائما ما نصاب بالدهشة من تخلف الشعوب الأمريكية و الأوروبية .. مش عارفين عننا حاجة .. و احنا عارفين عنهم كل حاجة .. الغني و الفقير و المثقف و الجاهل عارف كتير عن معظم الشعوب و البلاد .. و لما نعبر عن سخريتنا من الجهل يقولولنا طب و انتوا إعلامكم فين؟؟ .. أفلامكم فين؟؟ .. خارجيتكوا بتعمل إيه؟؟ .. أسئلة م اللي تحرق الدم دي .. ما يعرفوش عننا غير الأهرامات و عمر الشريف .. وفجأة .. في ثمانية عشر يوما لا أكثر .. شغلنا سماوات كل العالم .. نطينالهم من كل حدب و صوب .. لقونا علي القنوات الإخبارية و البرامجية و ف خطب رؤساء الدول و مانشيتات الصحف .. إيجبت .. إيجبت .. تحيا إيجبت . * العالم كله لفت نظره في نشرة الأخبار إن فيه مظاهرات في مصر .. و شافوا ملامح من البلد بأقاليمها و ميادينها .. و شافوا شباب زي الورد مجعمزين في ميدان ضخم و جميل اسمه ميدان التحرير .. جريت كاميرات القنوات الخارجية و زرعت كاميراتها في كل ركن و دخنوق قدروا عليه .. سربوا كاميرات صغيرة و موبايلات و مراسلين .. و تفاوتت أحجام التغطية .. القنوات اللئيمة اللي عارفة قيمة مصر و حجمها في المنطقة ثبتت مراسلين و كاميرات أكتر .. بخبرتهم الإعلامية و مهنيتهم المتفوقة عرفوا إن دي مش أي بلد و لا ده أي شعب .. ماهم برضه ليهم في الفيسبوك و الانترنت .. مش زي جماعة .. * لما بدأ الاحتكاك دول غريبة عنا قالت عادي .. ماهي شعوب المنطقة دي كده .. حاينضربوا بالصرمة كالعادة و يسكتوا و يروحوا و تخلص الحدوتة عشان ننقل علي حدث تاني أكثر شهية .. لكن المفاجأة كانت في قمة تحضر الشعب المصري ده .. استغربوا و تأملوا للحظة .. إيه التحضر ده؟؟ .. آآآآآآآآه .. ماهو ده الشعب اللي صدر الحضارة في الأصل للعالم كله .. ليه مستغربين إنه يستدعي الحضارة دي في مواجهة نظام فاسد و جاهل؟؟ .. و بدأوا يتذكروا أصل الأشياء .. كان فيه ناس بتنسيهالهم عن عمد .. ثم بدأ كل حي يترك ما يشغله ليجلس في هدوء و إعجاب متابعا صمود شعب .. و قد أخذ النظام ينكل به بكل الطرق و الوسائل .. إلي أن جاءت الطامة الكبري .. و أطلقوا علينا البغال و الجمال و الحمير .. روحوا ربنا يهدكوا هدة عزيز مقتدر .. عمالين نثبت للعالم إننا متحضرين عشان ينسوا السؤال الجاهل الغبي بتاع بتروحوا الشغل راكبين الجمال .. تقوموا تنزلولنا الجمال في ساحة القتال؟؟ .. يعني مش بس ضرونا و هددوا سلامتنا و عورونا .. دول كمان وكسونا و فضحونا .. و ورطونا في الرد علي سؤال أغبي .. بتروحوا الشغل راكبين الجمل .. و بتحاربوا بعض في ساحات القتال ممتطيين البغال و الحمير؟؟ .. و كمان بتمسكوا سيوف .. و انتوا المجند منكوا بقي بياخد فرقة معيز وللا بغال؟؟ .. وسلاح الفرسان بتاعكوا متقسم لرتب فارس جمل و فارس بغل و فارس تيس .. و اذا اترقي بقي يصرفوله بسكليتة؟؟ .. لا حول و لا قوة إلا بالله .. المهم انتصرنا الحمدلله .. و حطمنا مش أسطورة واحدة .. دول شوية أساطير في بعض .. و بقينا نموذج للرقي ينضرب بيه المثل في العالم أجمع .. لكن اللي جاي إيه؟؟ .. إزاي حانفضل محافظين علي الصورة الرائعة دي؟؟ .. هل حايركبنا الغرور و كل واحد يفتكر في نفسه إنه تشي جيفارا و يبتدي ينظر و يتمنظر و ينسي الخبرة و العقل و الحكمة؟؟ .. هل حانفتح لبعض معتقلات قطاع خاص و نشكك في ذمم بعض و اللي ما يشتري يتفرج؟؟ .. هل سوف نغالي في موضوع البلاغات اللي اتفندقت عالباهلي دي و نجرجر بعض في الاقسام و المحاكم؟؟ .. و اضرب الشكوي و سخن المكوة مادام مقبولة من مجهول؟؟ .. هل لن يوجد عقاب لكل من يقدم بلاغا كاذبا يفسد به سمعة الوطن أكتر ماهي فسدانة؟؟ .. هل حانطفش السياحة و نقطع عيشنا بإيدنا؟؟ .. هل حا نستحلي القعدة في الشوارع تحت شعار المظاهرات و الوقفات الناطقات منها و الصامتات؟؟ .. هل حانسيب المؤسسة العسكرية تشوف شغلها وللا حانتنططلها في فتحة مناخيرها زي الدبانة التلمة و نبقي عاملين زي الحجر الداير اللي لابد من لطه؟؟ .. أعتقد إننا لازم نهجع بقي شوية و نصلي عللي حايشفعلنا يوم القيامة .. عشان الفرحة تكمل و نعبر العبور الحقيقي التاني ف حياتنا و نرجع نستاهل إننا نقود الأمة اللي حوالينا دي علي حق .. مش قالك الرجولة أدب مش هز اكتاف؟؟