أكيد ساعات بيكون نفسك في حتة بنطلون جينز(levis)أو تلبس واحد ( tomy) أو( ck) أصلى، بس طبعا بتنسي الموضوع لما تعرف أسعارها، أقل بنطلون عندهم بيعدي 500 جنيه وممكن يوصل سعره ل 2000 و3000 جنيه، وتلاقى البنطلون شكله قديم فتسأل البياع ليه.. يرد عليك ويقولك أصل خامته مش بتتكرمش ولونه مفيش حد بيعمله غيرنا، وتخرج من المحل ونفسك تشتري البنطلون، ما تزعلش علشان فى حل اسمه الوكالة ممكن تشترى منها كل اللى تحتاجه. من الشباب اللي جرب الموضوع ده أحمد علاء -24 سنة محاسب- ويقول: وأنا طالب كنت ممكن أنزل أشترى بنطلون جينز ب 500 جنيه لكن المهم يكون ماركة محترمة، وبعد ما تخرجت واشتغلت بدأت ادقق في حكاية الأسعار حتي اكتشفت وكالة البلح ، فهناك لقيت جميع الماركات العالمية من بنطلونات وتشيرتات وقمصان وبأسعار لا تصدق، فمثلا البنطلون الجينز levis اللي بيتباع في التوكيل ب700 جنيه ممكن تلاقي أخوه في الوكالة ب200 جنيه، وبعد ما تفاصل ممكن تشتريه ب150 جنيهاً . ويتفق معاه في الرأي عمر أشرف 20 سنة طالب بكلية الهندسة ويضيف: أنا اللي عرفني شارع الوكالة أصحابي في الجامعة، هناك فى ماركات من الجينزات زى ال lee واشتريته ب100جنيه. ## محمود أمين صاحب محل ملابس في الوكالة واللي بيقول: أولا زبون الوكالة مش بس ابن الطبقة المتوسطة أو الشعبية، احنا عندنا زباين من مصر الجديدة والمعادى والمهندسين، الشباب بقت عملية دلوقتي فيقول ايه اللي يخليني أروح ادفع أكتر لما ممكن ادفع اقل، خصوصا إن احنا عندنا حاجات بتكون شبه جديدة مش بتحتاج لغسيل بعد شرائها.. والسر في إننا نبيع البنطلونات الجينز المستوردة بربع ثمنها اللي بتتباع بيه في المولات الكبيرة إن ضريبتنا وإيجار المحلات أقل بكتير من محلات وسط البلد والمولات، وبنجيب البضاعة بأكتر من طريق أولهم عن طريق المزادات اللي بتتعمل في الجامعات الأجنبية مثل الجامعة الأمريكية واللي بيبيع فيها الطلاب ملابسهم القديمة للتبرع للأنشطة الخيرية، و عن طريق بالات بورسعيد والبالة عبارة عن شوال كبير مليان بالملابس المستعملة المستورد من الخارج، أو "الديفوهات"، وهي الملابس المعيبة، فالمصانع الكبرى اللي بتصدر إنتاجها من الملابس ويظهر بعض العيوب الصغيرة اللي مش ملحوظة، ولكن طبقا لمعايير الجودة في الخارج مش هينفع استيرادها فبتبيع الحاجات المعيبة دي لتجار متخصصين في شراء الديفوهات، وعلى فكرة "الديفوهات" بيكون الإقبال عليها كبير جدا لأنها بتكون ملابس جديدة وعيوبها مش ملحوظة، أما عن الأسعار بشكل عام في الوكالة فالبنطلون بيبدأ سعره من 30 أو 40 جنيهاً ، وحتى 150 جنيهاً، والتي شيرتات والقمصان من 20 جنيهاً وحتي 70 أو 80 جنيهاً بالكتير.
