عزيزي الجمهور: لو إنت عاوزني أقولك الكلام اللي انت عاوز تسمعه وخلاص، يبقى طظ فيك مش هقوله، هقول وأكتب دايما اللي أنا شايفه، عشان تبقى فيه لازمة من إني أقول أصلا. ما سبق كان مبدأ الفيلسوف أحمد العسيلي الذي أعلنه في كتابه الأول "كتاب مالوش اسمه"، وأكد أنه سار عليه في كتابه الثاني الذي سيصدر قريباً بعنوان " الكتاب التاني " ، والعسيلي أكد أنه يسير في كتابه بنفس طريقة الكتاب الأول وقال " هو كتاب أعقد وأصعب ومواضيعه أكبر وفيه من كل ألوان التفكير، فهو يحمل تفكيراً فلسفياً وتحليلاً منطقياً للأشياء، انا تعقدت أكثر ككاتب وتعلمت من التجربة الأولى الكثير وزاد على تجربة حياتي سنة وشهرين زيادة فيهم شغل وقراءة وبحث " خاتما حديثه عن الكتاب قائلا " كتاب قيم، انا مبسوط منه الحمد لله". أما عن خطة العسيلي بعد تسليمه الكتاب لدار النشر اليوم فقال: عندي شغلانة تانية ..فأنا أصلح في اسكربت مسلسل، هياخد شوية وقت وعندي خطة مستقبلية بس مش هقول عليها !. العسيلي قال أنه يتابع الإعلام نسبيا في الفترة الأخيرة مضيفا "بصراحة أغلب الحاجات مابتعجبنيش من غير ما اسمي حاجة، علشان أنا بشوف إن أي حد بيطلع يتكلم قيمته الحقيقية - في الظرف اللي بنمر بيه - تنبع من انه يقدر يخلي الناس يبصوا على الأشياء من منظور مختلف، بمعنى اننا نغير طريقة تفكيرنا في الأمور، احنا بقينا بنفكر بطريقة فاسدة .. يعني مثلا ماينفعش يطلع حد مفروض انه مثقف بيكلم الناس ويطلع يقول "شوفتوا فرح فلان الفلاني صرفوا عليه 50 مليون جنيه" إنت كده بتعمل خبر أصفر، يثير انتباه الغلابة وتثير الأحقاد وتكرهم فيهم، زي اللي اتكلموا عن فستان هيفاء وهبي، يعني واحدة مغنية ومشهورة وجوزها رجل أعمال وهتتجوز .. هتجيب فستان منين يعني .. ؟! إيه المطلوب؟؟ انت بتتكلم في الموضوع ده ليه؟؟ . وعلق العسيلي على حملة اغلاق القنوات التي جرت مؤخرا قائلا: الموضوع محير، من ناحية دي حاجة ضد حرية التعبير، ومن ناحية أخرى فلو انا مسئول ولقيت واحد بيكلم الناس كلام بيفسدهم هعمل ايه؟؟ الموضوع ده محير لأنه يحمل هذه القضيه الفلسفية، هو بالنسبة لي أنا كشخص عادي "كان في محطة بتفرج عليها أو مش بتفرج عليها وحد شالها"، بس لما تيجي تفلسف المسألة وتفكر فيها لازم تبص على اللي عملها، انا لو مكانه في المطلق أعمل ايه؟؟ المنطقي اكثر إني أعمل قصاد كلامهم المفسد كلاماً لا يفسد وأخلي الجمهور ينتقي، لكن افرض أنا معرفش اعمل كده؟؟ لو النية سليمة وانا مش عارف اواجههم بفكر مختلف يبقى لازم أوقفهم عموماً الأصل في الأشياء إن الخطاب الوحش نصلحه بالخطاب الكويس.