نص : حسام محفوظ رسوم : مصطفى سالم جمال: هل نفتتح الجلسة؟ صفوت: لأ طبعاً.. اشمعني أنت ترأس الجلسة؟ أنت هتعمل وريث علينا إحنا؟ العادلي: آه صحيح.. السجن ده يتبع الداخلية، يعني أنا البُس. عز: ولو بالأقدمية أنا أول واحد شرف هنا، يبقي أنا أولي برئاسة الجلسة جمال: ياجدعان هتبوصولي في خمستاشر يوم!!.. ادونا فرصتنا بقي سرور: الموافق علي رئاسة جمال للجلسة يتفضل برفع يده صفوت: لا الكلام ده مياكلش معانا يا سيد قراره.. برلماني علي برلماني ميقترعش نظيف «يحدث نفسه»: غير مستعدين للديموقراطية فعلاً جمال: خلاص خلاص.. هكلم بابا يرأس الجلسة بالتليفون.. هو خلاص بقي متعود علي الكلام عن بعد «يحضر التليفون» مبارك: أيها المواطنون الأحرار جمال: احم احم.. لاحظ يابابا احنا بنكلمك منين مبارك: أيها الأخوة الشرفاء عز: بلاش تلميحات خبيثة لو سمحت مبارك: أيها الإخوة والأخوات صفوت: كده أنا أقوم أمشي أحسن بدل الإحراج مبارك: يوه.. أنا مش حافظ غير الافتتاحيات دي.. متلخبطونيش جمال: يابابا مش لازم تخطب فينا.. كلمنا عادي مبارك: شوفوا بقي.. أنا بقيت راجل صاحب عيا ومش فاضي للمناهدة.. كل واحد يقول شروطه إيه في زنزانته وأنا هنقل الكلام لإدارة السجن نظيف: أنا كنت رئيس الحكومة الذكية، فلازم يبقي عندي لابتوب في الزنزانة مبارك: مفيش جنس كمبيوتر هيدخل العنابر.. أنا خلاص كرهت الاختراع ده صفوت: أنا كل طلبي إن الزنزانة تخلو من كاميرات المراقبة، ومن صور سعاد حسني مبارك: لأ دي بسيطة.. لكن إدارة السجن هتعملك زيارة أسبوعية مع اعتماد خورشيد علي سبيل الأشغال الشاقة مرتضي: ياريس أنا بعمل إيه هنا؟؟ مبارك: مش أنت اللي قولت دي ثورة وائل وشادي؟..أهم شادي ووائل دخلوك اللومان مع شلاطة وبرعي يافالح عز: أنا عايز درامز في الزنزانة بتاعتي.. خلاص هسيب السياسة وارجع لمستقبلي الفني مبارك: ماشي.. خليك تتسلي عز: بس ياريت حد يشوفلي رقم حسين الإمام الجديد.. بمبقاش بيرد عليا خالص سرور: أنا محتاج... مبارك «يقاطعه»: لأ أنت بالذات مش هنقل طلبك.. بقي أنت كنت بتديني أوامر يافتحي؟ سرور: إيه ده؟ هو أنت بقيت بتقرا جرايد بعد التنحي؟ مكنتش بتعملها وأنت ريس!! جمال: وأنا يابابا.. محتاج أشكل لجنة سياسات أرأسها جوه السجن مبارك: اقعد ساكت.. أنت عايز المساجين يعملوا ميدان تحرير جوه بسببك؟ العادلي: وأنت ياريس معندكش طلبات خاصة لزنزانتك؟ مبارك: أنا راجل كبير ومبحبش الوحدة.. ياريت تجيبوا العقيد القذافي معايا!!
