ركبت آلة الزمن هرباً من الزحام وأزمة المرور فبعدت 50 عاماً.. أملاً في الأكثر راحة.. الأكثر تكنولوجيا والأكثر والأكثر. وصلت وكانت الصدمة.. أي نعم وجدت الأكثر ولكني وجدت الناس أكثر.. والكباري أكبر والأنفاق وصلت لتسعتاشر دور تحت الأرض.. فسألت أحدهم علي جنب «هو إحنا بقينا كام نسمة؟! فقال لي: العدد في الليمون يا أستاذة ما أنت شايفة مبقاش في مكان نمشي فيه جنب بعض.. كنت عايزة أسألك: هو فين العربيات والموتسيكلات والتريلات؟! ياستي هو في مكان دي الأبراج اللي حضرتك شايفاها دي 95 دور و150 دور ومش مكفية.. هنمشي مع العربيات كمان طيب والشقق غالية ولا رخيصة؟! ما هي إيجار ياأستاذة هو أنت منين؟! أنا!! من هنا.. ليه؟! أصل مفيش شقق غير إيجار.. هو في خيار تاني. لا.. يعني تمليك مثلاً. يعني إيه تمليك؟! يعني نشتري البيت مرة واحدة. لا ياأستاذة مفيش النظام ده إلا الفيللات.. ودي بقي للصفوة للكريمة. وأسعارها إيه؟! يعني من 50 إلي 70 مليون جنيه. 50،70 مليون؟!! ليه هو مرتب الفرد بقي كام؟! 50،70 ياستي الحال علي القد.. والدنيا غالية والرواتب يادوب مقضية يعني أنا بشتغل في المترو ومرتبي 50 ألف جنيه وأهو رضا، هنعمل إيه؟! الصبر من عندك يارب. 50 ألف جنيه؟! والصبر من عندك يارب؟! طيب أروح مدينة نصر ازاي لو سمحت؟ مدينة إيه؟! مش فاهم. مش فاهم إيه!.. عايزة أروح منطقة مدينة نصر. إنت منين ياحاجة مفيش الكلام ده.. مفيش حاجة اسمها كده. هو أنا مش في القاهرة دلوقت؟! ياستي دي القاهرة سابقاً.. اسمها دلوقت الصامدة. الصامدة آه .. والله اسم علي مسمي. أنت حضرتك عايزة إيه بالضبط وبتدوري علي إيه؟! لا خلاص.. كنت بدوَّر علي الراحة الأكثر.. لكن الظاهر أن الصامدة هتفضل طول عمرها صامدة وقاهرة مهما طال الزمن علينا.. أنا عايزة أروح بقي فينك يا «2011»؟!