خالد: مساء الخير يا رورو.. طابخه لنا إيه النهاردة؟! روان: مساء النور يا حبيبى.. اتأخرت ليه ده المدفع خلاص هيضرب.. طابخة لك مكرونة وناجتس. خالد: مكرونة وناجتس.. وهو ده بقى الطبيخ؟.. وتاعبة نفسك ليه يا روحى؟! روان: مش عاجبك ولا إيه؟!.. طيب والله ده أنا تعبت النهاردة جدًا، هو القلى ده سهل؟! خالد: ولا يهمك يا حبيبتى.. ناجتس.. ناجتس، زى بعضه.. «ثم لحظة سكوت ويُكمل بصوت خافت» بقولك إيه يا حبيبتى؟! روان: قول. خالد: يعنى إحنا عزمنا مامتك.. وإخواتك.. وأصحابك.. ولسه معزمناش أهلى.. ماما، وإخواتى وكده.. هنعزمهم إمتى؟! روان: «ممتعضة»: وقت ما تحب يا.. حبيبى.. خالد: خلاص يبقى الخميس. روان: لأ.. السبت. خالد: «فى غيظ» خلاص يا روحى السبت. روان: خالد وده.. عاوزين نجيب الكحك بقى! خالد: كحك.. ماشى.. هى مامتك مش هتجبلنا زى السنة اللى فاتت؟! روان: لأ طبعًا.. السنة اللى فاتت كانت أول سنة جواز عشان كده هى عملتلنا الكحك.. لكن السنة دى.. إحنا اللى هنجيب لنفسنا.. وكمان ليهم بقى! خالد: لينا وليهم!! طيب أهلى أنا سمعت أنهم عاملين حملة عشان بدل الكحك نتبرع بثمنه لمستشفى «500-500» للسرطان إيه رأيك؟ روان: «صمت تبحث عن إجابة أو عن حاجة تخبطه بها». ok يا حبيبى بلاش كحك وبلاش كمان عزومة مامتك وندفع الفلوس ل«500-500» و(57357» وأى رقم نحبه.