خالد وروان زوجان مصريان متفاهمان متحابان وداخل عليهم رمضان روان: خالد.. رمضان جاي يا خالد خلاص.. خالد: رمضان مين يا روحي؟! روان: رمضان كريم يا حبيبي.. شهر رمضان. خالد: آه.. أهلاً أهلاً.. وحوي يا وحوي.. يتفضل.. روان: يتفضل إيه ووحوي إيه بس.. محتاجين نجيب حاجة رمضان.. خالد: حاجة رمضان؟!! ما إحنا جبنا حاجة الشهر يا رورو أول الشهر.. هي صورة.. روان: لأ.. بس رمضان حاجة تانية.. فراخ أكتر.. لحمة أكتر بط أكتر وحمام ألذ ألذ ألذ يا حبيبي.. خالد: وده سنة ولا فرض؟!! ارحميني يا روان مش كده.. هو يعني إحنا شهيتنا هتزيد في رمضان؟ روان: لأ بس هنعزم أهلنا وأصحابنا في رمضان خالد: نعزم.. .. .. ومش هنتعزم؟!! روان: أكيد هنتعزم.. خالد: خلاص.. يبقي ده هيشيل ده يا روحي.. روان: والمكسرات والياميش والبلح والحمام.. خالد: روان.. هو مش إنت مبتحبيش الحمام يا روحي وأنا كمان مش باحبه.. روان: بس ده رمضااااان ولازم يكون عندي في الفريزر حمااام.. خالد: حاضر.. حااااااضر هجيب حمام اللي محدش بياكله فينا وهجيب مكسرات اللي برضه محدش بيحبها عندنا والياميش اللي إنتي يا روحي مبتعرفيش تعملي بيه أي حاجة.... حاااااضر.. روان: رمضان كريم يا حبيبي.. خالد: كريم قوي يا روحي.. «بصوت واطي يا مطلعة روحي