والله أنا زهقت من كلام بعض المشايخ اللى عمالين يطلعوا علينا كل يوم بفتوى جديدة، وكلامهم زى الفول النابت البايت، لا له طعم ولا لون، الواحد من دول كل خطبة أو حديث تلاقيه نازل صراخ عمال على بطال، وعمال يطلع فتاوى، وآخر الفتاوى أقصد آخر الطرائف اللى سمعتها من أحد هؤلاء المشايخ، أن كلمة باى باى حرام، آه والله حرام لأنها من أعمال الفرنجة وإحنا لما نقول باى باى يبقى بنتشبه بالفرنجة، ولعن الله المتشبهين من المصريين بالفرنجة، ولعن الله باى باى وقائلها، وأى حد تانى يرد عليه، ومن هنا وتدعيماً لهذا الشيخ، ندعو إلى رجم كل من تسول له نفسه أن يقول باى باى، أو بنسوار أو حتى THANK YOU ، وعملاً بقول هذا الشيخ علينا أن نعود إلى تراثنا القديم ونسمع الأستاذ حكيم لما قال و«السلام عليكم»، وأهو نبقى ضربنا عصفورين بحجر، ودمرنا العنصريين أتباع الباى باى، وأحيينا التراث، ويمكن ربنا يكرمنا بزيادة وتنحل عقدة نحسنا ونوصل لسر شهقة الملوخية أو نطلع القمر، ولا نبنى للعيال بتوع الكوله اللى بيناموا تحت الكبارى عشش فى المريخ، أو نحل مشكلة الزحمة إللى عندنا، وباى باى يا عم الشيخ.