حاسس بمصيبة جاية لى.. يالطيف يا لطيف.. مصيبة ما كانتش على بالى.. يا لطيف يا لطيف» يا منجى من المهالك يارب بالزمة ديه أغنية الواحد يسمعها أول ما يفتح عينه، ده حتى يبقى اليوم من أوله أغبر، عموما نسمع النشرة يمكن نلاقى حاجة عدلة، مع أنها كلها أموات وكوارث.. والمتوقع أن يكمل وزير التعليم جولته فى كفر أبو إبرة بعد زيارته المفاجئة لمدرستين إعدادى».. يانهار ما طلعتلوش شمس الوزير هيروح المدرسة اللى أنا مديرها ومش هيلاقى حد غير البواب عويس، والنبى يارب نجينى المرة دى، وأنا أوعدك إنى هبقى مدير بجد. وبعد نصف ساعة كنت فى المدرسة وأنا من الزغفة لبست جاكتة الواد ابنى، مين اللى قفل المدرسة افتح يا عويس يا بواب الندامة، رد عويس من خلف الباب.. - أنت مين أنا المدير ياحمار؟! - بأمارة إيه؟! - افتح لأرفدك.. - أنت مش المدير عشان هو ما بيجيش دلوقت وأنا سمعت أنه رايح مع مراته القرافة عشان يقرأ الفاتحة على حماته.. - أبوس إيديك مش طالبة غباوة.. - طب لو أنت المدير قولى آخر مرة شتمتنى فيها قلت إيه.. مش فاكر.. - خلاص مش فاتح أمرى لله أنط السور عشان ألحق نفسى. - حسابك معايا بعدين يا بواب المصايب، اجمع لى إدارة المدرسة. - إدارة مين ومدرسة إيه ما أنت عارف.. الناظرة عندها عزومة والعيال عندهم دورى للكرة الشراب تحت الكوبرى والمدرسين سهرانين طول الليل فى الدروس الخصوصية، بس ما قلتليش أنت ما رحتش القرافة ليه؟ هى مراتك مراضيتش تاخدك معاها.. - صبرنى يارب اجرى واجمع لى الفراشين وخليهم ينادوا على الناظرة والمدرسين وروح أنت اشترى منظفات ومطهرات من الصيدلية اللى جنبنا وقول لحسين حقنة الفراش يتصرف لى فى 20 عيل من المدرسة اللى جنبنا.. مش ده الواد مصطفى اللى فى 6/16.. كويس أنك مش فى الماتش... روح ونادى بقية العيال وقول لهم ما ينسوش الكتب. - الحق يا مدير الصيدليات عاملة إضراب وقافلة ومافيش أى مطهر بس أبلة الناظرة جاية ومعاها خضار العزومة عشان تعمله هنا مش دول أساتذة المدرسة؟! كنت متأكد أنكم مش هتخذلونى.. فرد المدرسون برخامة مين قال.. إحنا جايين بس علشان سمعنا أن الوزير بيوزع لاب توبات على المدارس المنضبطة. وجاء مصطفى يلهث جريا.. يا حضرة المدير العيال جم معايا بالعافية بعد ما قلت لهم أنك هاتدى لكل واحد جنيه. - فهمس المدير فى سره زى بعضه.. وقفهم بسرعة فى الطابور علشان نحيى العلم.. واد يا عويس فين العلم.. رد عويس: المدرسة اللى جنبنا اتزنقت فى واحد فسلفته لهم بدل من ركنته، وأهو عمل الخير أحسن من عمل الملوخية. كاد المدير أن ينط فى كرشه روح بسرعة هاته بدل ما أطلع روحك!! وهنا جاء الخبر التمام الوزير مش جاى... فنط المدير مهللا... فركش ياولاد.. فصاح مصطفى: فركش إيه فين الجنيه يا بيه.. ضحك المدير: أنت صدقت؟ أمشى غور فى داهية فصرخ الأولاد: طب ربنا يوقعك فى الوزير تانى وأبقى ساعتها شوف مين هيعبرك.. يلا بينا يا عيال. بعد نصف ساعة فوجئ عويس البواب بأحد الأشخاص يطرق الباب وعندما فتح وجد الوزير أمامه الذى نظر إلى الخرابة اللى اسمها مدرسة، وقاله إن شاء الله كلكم هتصيفوا فى الصين.