معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا. ونذكر بعضنا البعض دومًا بالمثل الشعبى الجميل: تبات نار تصبح رماد
كذّاب وغدار أنا مروة.. حظى التعيس وقعنى فى زوج كذاب ويصدق كذبته، هدم البيت بالكذب عشان طمعان فيا وفى أهلى. الكذب عنده زى المياه والهواء لو قال الحقيقة مش هاعرف أصدقه.. آخر ما توقعت فى حياتى إن كذبه يوصل إنه يخرب البيت ولكن ده اللى حصل. كلمته في التليفون وقلت له الولدين التوأم تعبانين هاوديهم للدكتور وافق، ولكن بسبب تأخيرى عند الدكتور لقيت أبويا بيكلمنى وبيسألنى بمنتهى الاستنكار إنتى فين لحد دلوقتى بره بيتك؟ قلتله إنى عند الدكتور بالولدين وإن جوزى عارف، كان رد أبويا آخر شىء أتوقعه، قالى جوزك لسه قافل معايا التليفون ومش عارف انتى فين، لدرجة إنه قالى لو جاتلك يا عمى خليها عندك. أنا مصدقتش ودانى وجريت ع البيت لقيته مغير كالون باب البيت، ورافض تمامًا إنى أدخل وكل متعلقاتى وحاجتى مش معايا حتى لَبْس مدرسة الأولاد وكتبهم مش راضى إنى آخدهم، أتصرف ازاى مع إنسان بالوصف ده وإنه يوصل لدرجة إنه يدعى عليّا إنى خارجة من وراه عشان يتلكك ويرجعنى بيت أبويا بولادى وبدون حتى هدومنا.. دلينى أعمل إيه؟
الحل المقترح .. الأمان شرط الاستمرار
الكذب.. أسوأ الصفات على الإطلاق.. بس أنا حاسة إنك حصرتى تصرف زوجك فى الكذب.. الراجل دا ببساطة مش لاقى حجة يرجعك بيها بيت أهلك.. يعنى إيه اتأخرتى عند الدكتور يغير كالون البيت؟ هو غالبًا فيه تاريخ من الخلافات بينكم وانتى آخر حدث هو اللى صدمك.. بداية مش معقول إن راجل يغير كالون البيت ويمنع مراته وأولاده يدخلوا إلا لو الموضوع كبير.. بقول دا مش دفاعًا عنه! إطلاقًا بس نوع من توضيح الموقف.. إنه تصرفه دا مش نتيجة يوم وليلة.. بس دا لا يعطيه الحق إطلاقًا إطلاقًا إنه يعمل كده.. ودا عمل كده معاكى انتى والأولاد يعنى حتى أولاده ما عملش ليهم حساب.. وكمان بيعمل لك مشكلة مع أبوكى.. يعنى بيخلى مسئوليته من أى تصرف على أساس إنك انتى اللى غلطانة.. دا بيخطط وينفذ.. والله أنا مش بحب فىه أمور معينة بس هو زوجك شكله مش ناوى على خير ودى كلها مقدمات تؤدى إلى نتائج. بس نسيبه شوية ونحطه هو على جنب واسألى نفسك سؤال مهم جدًا: حتقدرى تكملى مع الراجل دا بعد ما منعك من دخول بيتك؟ حتقدرى تحسى بالأمان معاه؟ حتقدرى تكملى مع حد مش ضامنة بكرة ممكن يعمل إيه؟ إللى منعك إنتى وأولادك من دخول البيت ممكن يعمل أى حاجة.. تصرفه دا فيه غدر شديد.. دا شخص غير أمين لا عليكى ولا على أولادكم.. دا شخص ممكن يعمل أى حاجة فى أى وقت.. ممكن يكون معتمد إن أهلك موجودين وحيستقبلوكى بس برضو مش سبب. أظن الحل المقترح هو إن أبوكى يتكلم معاه بالراحة ويشوف ميته إيه وناوى على إيه.. أهم عنصر فى الجواز على الإطلاق هو الإحساس بالأمان.. إذا اختفت باظت الحياة أى حاجة تانية ممكن يعنى نتفاهم فيها لأن الأمان لا يندرج تحته الاطمئنان إن الطرف التانى لا حيخون ولا حيكدب.. ولا حيطرد من البيت أو يغير الكالون.. وتأثير دا على الأولاد إيه؟ أما لاقوا أبوهم مش راضى يدخلهم البيت؟ إحساسهم بعدم الأمان وعدم الاستقرار؟ لازم أبوكى يكلمه ويشوف ميته ويعاتبه على التصرف دا ويحاسبه.. ناوى على خير ومش حيكررها تانى يبقى تحاولى تعتبريها لحظة غضب.. لو غير كده يبقى لازم موقف حاسم. والقرار قرارك
