أنا عندي 17 سنة، حاسة إن ماليش لازمة في الحياة خالص، والدي علاقته بيّ علاقة افتراضية جدا، ممكن أقعد يوم كامل من غير ما أشوفه، ولو شفته بتكون العلاقة بيننا: إنتي وراكي كلية بكرة؟ خدتي مصروفك؟ بس.. أنا عمري ما شفت حنان من أبويا خالص، هو متجوز على ماما علشان إحنا تلات بنات وعايز يخلف الولد، وأمي كل ما أحكي لها تقول لي ما هم إخواتك كانوا قدك عمرهم ما عملوا كده، بتخلي الواحد يحرّم يتكلم. إخواتي متزوجين، ولما آجي أتكلم معاهم يحكوا هما عن مشاكلهم، وأصحابي فارقوني لما دخلت الكلية، وكل واحد راح في مكان، أنا لا حاسة باهتمام ولا عمري مرة دقت طعم الحنان.. دي ظروفي. أما بقى مشكلتي فهي إني اتعرفت على واحد معايا في الكلية من المنتدى بتاعنا، وقلت له اسم غير اسمي، وحبينا بعض واتكلمنا في التليفون، وكانت علاقتنا حلوة أوي، كل واحد معوّض التاني عن اللي ناقصه. وأنا عرفته شكلا في الكلية، لكن هو ماكانش يعرفني، لحد ما جه وقت حسيت إنه مش هيسامحني لو اعترفت له بالغلط بتاعي، وقلت خلاص أنا هابعد بس ما قدرتش، وخليت واحدة صاحبتي تكلمه وقالت له الحقيقة، واتصدم وقال إنه مش هايقدر يسامح. وبعدها كلمته وأنا باعيط، وقلت له والله أنا كنت ناوية أقول لك بس حسيت إني ماستاهلكش أصلا فقلت أبعد، وعايزة منك إنك تسامح، وقال إنه سامح وخلاص، وبكده بقينا في النور وعرفني شكلا، بس بعدها لقيت العلاقة بيننا بقت قليلة أوي، وكان البعد من ناحيته هو. وصاحبتي اللي صلحت ما بيننا دي جت سألتني على الميل إنتم عاملين إيه، قلت لها كلام هو مش حصل بيننا بس أنا كان نفسي أحسه أوي منه، وقلت لها ده بيقول إنه ضايع من غيري ومجروح (أنا لا أكذب ولكني أتجمل)، فكلّمته من ورايا وبعتت له المحادثة. وهو قال لها الكلام ده ما حصلش.. دي طلعت كدابة رائعة وإحنا لازم نقاطعها، جت صاحبتي قالت لي الكلام اللي حصل بينكم ده ماكانش حصل وأنا اتأكدت منه، أول ما قالت كده أنا ماعرفتش أعمل إيه، قلت لها لا حصل بس مش كله، وبعدها سبتها ومشيت لأني اتصدمت.. وهي اتصلت بيه، وقالت له دي أنكرت. لقيته بعت لي رسالة قال لي فيها إنتي شخصية زبالة وكدابة وماتستاهلنيش ولا تستاهلي صحبتك دي، وروحي عالجي نفسك عند دكتور نفساني، وإنتي بالنسبة لي ولا حاجة، وأنا عملت لك بلوك في كل حاجة.. يعني متجاهلك. رحت الكلية لقيت صاحبتي دي بعدت عني خالص، وهو بقى بيبص لي بصات وحشة أوي، والمشكلة إنه معايا في المحاضرات وهي معايا في السكشن، يعني كل أما أنسى غلطتي أفتكرها تاني. أنا عارفة إن أنا غلطانة.. أنا كدابة.. بس والله العظيم أنا اتعلمت، يا رب تفهموني وتقولوا لي حل عملي يريحني شوية، أنا اتقربت من ربنا بس برضه لسه فيّ جرح، مع العلم بإني اتصلت بصاحبتي واتأسفت لها، بس هي قالت إنها مش هترجع لأنه وصاها إنها ماتمشيش معايا بكل الطرق. eng_nag
صديقتنا العزيزة.. أولا.. أنا معترضة على أول جملة ليكي من البداية خالص، كلمة "ماليش لازمة في الحياة خالص"، لأن لو ماكنش ليكي لازمة ماكنش ربنا خلقك ورزقك وسبّب أسباب الحياة ليكي. ثانيا.. إنتي 17 سنة، يعني إنتي في مرحلة انتقالية من عمرك دلوقتي.. وبُكرة هتبصّي على المرحلة دي وتفتكري وتضحكي وتقولي: ياه أنا إزاي كنت باعمل الحاجات دي. أنا سعيدة إنك سميتي اللي بينك وبين زميلك "علاقة" وقلتي إنها "تعويض عن اللي ناقصك"، وتغييرك لاسمك أو كذبك مش أكتر من خوف ومحاولة لأنك تحفظي ماء وجهك، وفعلا زي ما قلتي إنك لا تكذبي ولكنك تتجملين. لكن يا صديقتي الكذب مالوش رجلين.. والتجميل مسيره يوم يزول، ويظهر الوجه الحقيقي ولو ماكانش الوجه ده نقي وجميل وطاهر هتكون مشكلة كبيرة في حقك. أنا عايزاكي تتخطي المشكلة دي، إزاي؟ هقول لك الطريقة.. فيه حكمة جميلة بتقول لو عايزة تموّتي موضوع ماتتكلميش فيه، لا تتكلمي معاه ولا مع صديقتك، ولا تعتذري ولا تناقشي، إنتي اعترفتي بغلطتك وأخذتي عقابك بخسارتك لهم، لكن الحياة مانتهتش ولن تقف عند الشخصين دول. تاني حاجة تدوري على أصدقاء جداد، واعملي لنفسك بروفايل باسمك الحقيقي وشخصيتك الحقيقية على منتدى كليتك، وابدأي فعلا في المشاركة الفعّالة والتعليق، وكوّني صداقات بشكل مباشر دون خوف أو قلق. وفيه شوية حاجات هيساعدوكي في المرحلة دي من حياتك، منها مثلا: إنك تبدئي في التعبير عن أفكارك الشخصية، يعني لما تكوني عصبية أو حزينة جرّبي تكتبي حدوتة طلّعي فيها كل اللي جوّاكِ، أو ارسمي حتى لو كانت شخبطة، المهم تخرّجي الطاقة اللي جوّاكِ دي. وجرّبي كمان تقرأي أكتر، وخصوصا عن المرحلة العمرية اللي إنتي فيها، علشان تفهمي نفسيتك ونفسية أصحابك كمان، وتعرفي إنتي بتتصرفي كده ليه، وهم كمان بيتصرفوا معاكِ كده ليه. كمان حاولي تلتزمي بالفروض الدينية، حاولي تصلّي واتكلمي مع ربنا كتير وادعي. صديقتي الجميلة.. حبي نفسك وافهميها جيدا.. وستجدين من يحبك ويفهمك جيدا ممن حولك، فالحياة لا تتوقف والدنيا مليئة بالناس الجيدين، وكل يوم هو فرصة جديدة وحياة جديدة تنتظرنا أن نحياها ونستمتع بها.. قريبا سيكون لك أصدقاء أجمل وأفضل وناس رائعون يهتمون لأمرك دون حاجة لأن تكذبي عليهم أو تتجملي أمامهم .. فقط كوني نفسك .. وستسعدين.
