داعب الإعلامى عمرو أديب، المطربة أنغام، قائلًا: «أنا أخاف أتجوزك، هتبقى شديدة عليا شوية»، وردت المطربة قائلة: «أنا مش فرفوشة لازم أتحط فى مود الناس اللى حولى يكونوا مبسوطين». وأضافت انغام خلال لقائها ببرنامج «كل يوم»، على قناة «أون تى فى» امس الاول: «أنا حاليا بحس بالوحدة، وأعترف إن طبعى صعب، ومفيش حد بيتقدم لى دلوقتي، لكن لسه فيه ناس بتعاكسنى.. مش كل الرجالة وحشين، وأنا مصاحبة أولادى». كما داعبها أديب قائلا: «هى الرجالة اتعمت ولا إيه، مفيش حد بيتقدملك إزاى.. أنت حتى عندك 33 سنة، وشكلك يدى 18سنة». وردت المطربة: «يا سلام آدى الرجالة ولا بلاش، لولا أن لميس صاحبتى كان هيبقى فيه كلام تانى.. مفيش رجل يقبل يعيش مع واحدة أغنى منه إلا لو كان البعيد جبلة». وقالت: «أنا رومانسية وساذجة جدا فى حياتي، ولكن بطلت أكون حساسة عشان بروح فى داهية». وقالت أنغام: إن حظها فى الحياة من الرجال كان قليلا، ولم تقابل فى حياتها «رجل جدع» على حد وصفها، مضيفة: «ماقابلتش رجل كويس وجدع، يمكن كل الكويسين اللى قبلتهم مكنوش من نصيبى، وأنا حظى قليل فى الرجالة»، وأضافت: «أنا أقدر أعيش من غير راجل، وأنا حاليا من غير راجل، وبقدر أفهم الراجل المعجب بيا كأنثى أو كفنانة».