انتخابات اتحادات الطلاب فى الجامعات السنة دى كانت اكتر شراسة من اى سنين فاتت قبل وبعد الثورة، واتقبلت بزخم اعلامى كبير جدا زود من حدة المنافسة، واتحولت الى صراعقوى ما بين الاخوان والطلاب المستقلين والتيارات الثورية داخل الجامعة واللى بيحاول كل طرف حصد اكبر عدد من الكراسى فى اتحاد الطلاب وسط كل الصراعات دى «اتكلم» قررت انها تنزل للشباب علشان يتكلموا عن اتحاد الطلاب، وهل هما كطلبة - ليهم حق التصويت فى اختيار اعضاء الاتحاد - حاسين بدور فاعل لاتحاد الطلاب؟ وهل للاتحاد مردود وعائد ملموس على حياتهم جوا الجامعة؟.. وإيه مدى مشاركتهم فى الانتخابات؟
ايمان مجدى، طالبة فى رابعة كلية علوم جامعة عين شمس، قالت: «انا مش بستفيد من اتحاد الطلاب فى حاجة بشكل مباشر وهو مش مؤثر قوى بالنسبة لى، بس رغم كده انا شايفة إن اتحاد الطلاب الجديد شغال اكتر حبتين من اللى فات، خصوصا بعد ما الاخوان اتعلم عليهم فى اكتر من كلية، اللى ترتب عليه ان الاتحاد الجديد بقى بيشتغل اكتر من القديم، علشان يثبت انه اجدر من الاخوان على القيادة».
وعن مشاركتها فى الانتخابات قالت «إيمان»: «انا مشاركتش السنة دى فى الانتخابات، بس قبل كده كنت بشارك وبنتخب اصحابى لأنى ببقى عارفة برنامجهم، انما السنة دى كنت عارفة أن طرفى الصراع فى الانتخابات هما التكتل الاخوانى وتكتل الشباب المستقل، وعلشان كده مهتمتش انى اشارك».
«المشهور هو اللى بيكسب» دا كان رد محمد حسين الششتاوى الطالب فى كلية الالسن، على سؤال «ايه هى معايير اللى بيكسب فى الانتخابات من حكم خبرته فى الكلية؟»، «محمد» شرح وجه نظره وقال: «الشباب اللى بتشارك فى الانتخابات بتعتمد على الارضية اللى بتكونها عن الطلبة الجدد اللى بيقدموا لهم خدمات ومساعدات فى اول اشهر ليهم فى الكلية، وبيعملوا كده علشان يكسبوا اصوات الطلاب دى فى الانتخابات بعد كده، بيكون الناتج إن الطلاب بيختاروا اللى ساعدهم بعيدا عن معيار الكفاءة. وعامة الثورة مغيرتش فكر ومفاهيم الشباب فى اتحادات الطلاب اللى جت بعد 25 يناير، لكن اقدر أقول إن الشباب اللى ماسك الاتحاد حاليا ناس محترمين وعينهم مليانة بعكس الوضع قبل الثورة اللى كان فيه ناس بتقوم بعمل مصالح وفلوس من الاتحاد».
محمد صلاح ناعوم رابعة كلية حاسبات ومعلومات، قال: «انا مش شايف اى دور للاتحاد عندنا فى الكلية، وده لانها كلية علمية واللى بيبقى الاتحاد مش ظاهر قوى فيها، وانا مشاركتش فى الانتخابات لأنى «مدبلر» ومينفعش يكون لى صوت فى انتخابات الاتحاد».
هدير محمد، طالبة فى رابعة آداب لغات شرقية، اكدت ان الاتحاد دلوقتى مبيعملش حاجة وانه ملوش دور ملموس عند الطلبة، هدير كملت: «انا مش دايما بستفاد من اى نشاط بيعملوه فى الاتحاد لانه بيبقى فى ميعاد المحاضرات، ولما بروح اشارك بلاقى معظم المشاركين ناس من اتحاد الطلاب ومفيش تواجد للطلاب العاديين فيهم، واللى لاحظته ان الاتحاد بعد الثورة بقى حاجة مقرفة بجد، كلمن هب ودب يدخل ويرشح نفسه، صحيح هما شغالين بس فيه ناس كتير متنفعش تكون واجهة للكلية، والمفروض الاتحاد يهتم بيا كطالبة اكتر من كده، يعنى ابسط حاجة ان المفروض الاتحاد يسعى انه يرجع الحرس الجامعى تانى، او انه يشوف حل فى مسألة البلطجة اللى بقت موجودة فى الجامعة بشكل مقلق ومعتقدش ان فى حاجة اهم من أمن الطلاب».
«من اول يوم دخلت فيه الكلية اكتشفت ان الاتحاد اغلبيته طلاب بيدخلوه عشان المنظرة، والشباب فيه بيساعدوا الناس اللى على مزاجهم بس» بالجملة دى بدأت فاطمة الزهراء ربيع، طالبة بكلية الألسن جامعة عين شمس كلامها معانا، وقالت: «رغم انطباعي السيئ عن الاتحاد إلا انى شاركت فى الانتخابات، واخترت القايمة المنافسة للاتحاد القديم والحمد لله كسبت».
أحمد الجوهرى، تالتة تجارة، جامعة عين شمس قال: «انا عاجبنى جدا ان «الائتلاف» اللى كان ضد «الإخوان» فى الانتخابات نجح، وانا انتخبت الناس اللى اعرفهم بحكم علاقتى باللجنة الفنية، ممكن تكون فكرة انانية شوية بس ده مبدأ وانا ممكن اتحالف مع اى حد إلا الإخوان، وانتخابات اتحاد الطلاب السنة دى الاعلام ركز عليها لما عرف ان الاخوان سقطوا، لكن قبل كده كانت الانتخابات عادية هو بس الفوكس كان على الاخوان».
ولما سألنا خلود محمد، طالبة بكلية علوم قسم بيولوجى، على مدى استفادتها من انتخابات اتحاد الطلاب، كان ردها: والله احنا لسه مشفناش حاجة علشان نقدر نحكم عليهم والاتحاد مبيعملناش اى نشاط يخرجنا من جو الكلية الممل، لكن من ضمن الحاجات اللى مستنينها تتحقق ان فيه ناس من اتحاد الطلاب وعدونا انهم يعملوا لنا كارنيه نقابة العلماء».
وعلى الرغم من الجو المشحون فى كلية الحقوق جامعة عين شمس وتفشى الخناقات بالأسلحة فى الجامعة إلا ان احمد عرفات الطالب فى تانية حقوق، شايف ان من السابق لأوانه الحكم على الاتحاد الجديد لانه لسه بقاله اسبوعين وما انجزش – بحسب كلامه – واضاف: «الاتحاد ده عمره قصير 3 شهور بس والسبب اللائحة الجديدة اللى اتأخرت، وعشان الحكم على الاتحاد يكون منصف يبقى على السنة الجاية».
«انا كنت هرشح نفسى بس مردتش انزل عشان معنديش برنامج « الجملة اللى احمد ربيع «السن» بدأ بيها كلامه انا مش هاعمم رأيى على كل الاتحاد فيه ناس بيكون ليهم مصالح تتعرف على البنات وناس بتشتغل بجد واحنا عندنا فى الكلية النوعين دوول وانا كان نفسى ادخل الاتحاد بس قلت حرام اخلى المكان ده لواحد يفيده اكتر.
«إسراء مجدى» أولى السن» الاتحاد غير مفعل ودوره مش واضح ومش بنستفاد بحاجة هما بس بيقولوا احنا عملنا وانا مشفتش دور الاعلام فى الانتخابات.
«انا لسه فى سنة اولى ومعرفش حاجة» ده كلام مريم علاء الدين طالبة فى كلية تجارة جامعة عين شمس عن رأيها فى انتخابات اتحاد الطلاب، مريم كملت وقالت «انا شاركت فى الانتخابات واديت صوتى لأسرة الزهرة، لانهم احسن من اسر تانية كتير وبيساعدونا فى المسرح».
«محمد بخيت» الاتحاد حاجة مثمرة بيحاولوا يحققوا البرنامج بتاعهم ساعات بحس انهم بيدخلوا كنوع من التناكة بس اكيد اللى بيكسب هو المحبوب والاعلام ادى الموضوع حقه وانك توصلى للانتخابات وتنجحى دى حاجة جميلة وانا داخل الاتحاد السنة الجاية ونحاول نعمل حاجة للكلية وشاركت واديت اصواتى لأصحابى كلهم.
خالد امين «مساعد لجنة الاسر والرحلات» فى اتحاد طلاب جامعة عين شمس، قال احنا بنعمل اجتماع كل يوم سواء كان مجلس اتحاد او كل لجنة لوحدها علشان نشوف شغلنا ونحط خطة للترم ده والجاى، لأن الاتحاد مستمر معانا لحد شهر 9، والاتحاد جامد جدا وكل الناس عايزة تشتغل وفيه تفاعل ايجابى من الطلاب لدرجة ان فى طلاب بره الاتحاد بيقدموا لنا افكار واحنا بنقيمها ونشوف الفكرة تنفع للكلية ولا لأ، وأهم حاجة فى اى انشطتنا انها تنفع الطالب اولا.
اضافة الى ان لجنة الجوالة مهتمة جدا بالكلية وبيجهزوا خطط لتنضيف الكلية والاقبال على المشاركة كان شديدا جدا من طلاب سنة اولى وتانية».
