منذ الساعات الأولى لبدء التصويت وحتى اللحظات الأخيرة قبل أن تغلق اللجان الانتخابية أبوابها والمصريين كعادتهم يتفنون فى إطلاق النكات خاصة بعد وقوف مرشحى الرئاسة كتفاً بكتف داخل الطابور ودعوتهم لاحترام النظام والقانون ولأن مرشحى الرئاسة معظمهم من كبار السن فكانت النكات التى تداولها الشباب عنهم على مواقع التواصل الاجتماعى وداخل اللجان على النحو التالى . أحسن حاجة وأنت داخل اللجنة اللى يقولك انتخب مرسى قوله طبعاً..اللى يقولك انتخب شفيق قوله أساسى..اللى يقولك انتخب موسى قوله بلا شك..وادخل علم على حسام خير الله لكل اللى مستنيين إن شفيق يرجعلنا الأمن... مش أما يرجع الجزمه اللى اتحدف بيها الأول..وسؤال هام لجميع لناخبين إيه هى الحاجه السوده اللى بتطير و ملهاش جناحات و لا عيون ؟.. وكانت الإجابة جزمة شفيق .. «توقعاتى .. ان الاعادة هاتكون بين شفيق وجورج بوش .. فى اكتر واحد اتضرب بالجزم «..»أنباء عن نقل أحمد شفيق المستشفى بعد إصابته ب«جزمه» قلبية.. شفيق لو كسب هايعرّض مصر ل «جزمة اقتصادية».
كان الكتاتنى ينتخب بيده اليسرى ..فقال أحدهم : هل انت أيسر..فقال:لا توشيبا.. فضحك الاثنين و بكى الخميس والانتخابات اتلغت وعم الفرح وفتحى سرور
وعن الشعار الانتخابى والرشاوى الانتخابية يقول الشباب «الله يرحم ايامك يا مبارك كنت بتشترى اصواتنا ب 50 جنيه « دلوقتى بالكتير اوى يجيب كيسين سكر وازازة زيت وربع كيلو زتون كالاماطا «..»زمان كان واحد مننا .... و بيركب أوتوبيسات زينا... دلوقتى مطلع عين أمنا...حملة شتتهم يمكن مينتخبوش»
ورصداً لأحد الحورارت داخل الطابور الانتخابى بين شاب ورجل مسن
- هتنتخب مين يا بنى ؟
- حمدين يا حاج ، أمال أنت هتنتخب مين ؟
- الأستاذ عمرو موسى ، رمز الميزان
- بس عمرو موسى مش رمزه الميزان يا حاج ، الميزان ده محمد مرسي !!
- بجد ؟؟
- آه و الله يا حاج
- ولاد الحرام إمبارح عدوا عليا و قالولي عمرو موسى رمز الميزان .. منهم لله
- هنعمل إيه ، ولاد الحرام ماخلوش لولاد الحلال حاجة يا حاج
- على رأيك يا بنى ، أمال الأستاذ عمرو موسى رمز إيه بأه ؟
- رمز النسر يا حاج
[صورة من صفحات النشطاء علي الفيس بوك]
[طفل يشارك أمه في عرس الديمقراطية]
[أحد الناخبين يصمم علي دخول اللجنة الانتخابية بحماره]
