كشف محمد فضل لاعب الاهلي و منتخب مصر عن شجون كبير بسبب توالي رحيل شخصيات عزيزة علية . هذه الشخصيات هي اخته فامه و ابيه فكتب هذه السطور المليئة بالشجون و الحزن . قال فضل علي صفحته علي صفحته الرسمية علي صفحات التواصل الاجتماعي :" لما اختي توفيت كنت ماسك نفسي جدا وطبعا حامد ربنا وعارف انها استريحت من المرض علشان حبيبتي تعبت اوي وبعدها علي طول لما أمي تعبت وزعلت عليها وماتت بعدها علي طول بردوا كنت ماسك نفسي وحامد جدا لانها تعبت اوي فعلا وكانت عاوزة تبقي مع اختي... واكيد عارفين لما تخسر اختك وأمك ورا بعض ده معناها ايه...وكنت راضي وحامد جدا وده طبعا ربنا لما ينزل ابتلاء بينزل رحمة وسكينة علي العبد ...كنت فاكر نفسي جامد وبعرف أتحكم في نفسي لكن اكتشفت اللي كان مقويني في كل حاجة طبعا بعد رحمة ربنا هو ابويا الله يرحمه .....انك تحضر وفاة بنتك ومراتك وبعدين تتعب وتستحمل وتبقي عاوز تكمل وعاوز تعييش علشان تطمئن علي اولادك وأحفادك وتسترهم في الدنيا وتبقي في ضهرهم وانت تعبان جدا وعمرك ما اشتكيت ...علمتني ابقي راجل عندي كرامة وشخصية وفِي نفس الوقت جدع وطيب وقوي ومبخافش من اَي حد خالص طول ما انا نضيف...علمتني ازاي أفكر في الناس واساعدهم ..اخد قرار..علمتني كل حاجة وسترتني في كل حاجة ،كنت مقويني اوي ...استحملت المرض واستحملت فراق بنتك ومراتك وكنت راضي ..كنت بتهتم بكل الناس وآخر حاجة نفسك....اخر يومين كنت بتقولي انك بتحبني وان اصعب حاجة هي الفراق وكنت خايف عليا من عدم تحمل الفراق ،بتفكر فيا بس اني استحمل وانا كنت من الخوف مش عاوز اتكلم وبهرج علشان مش عاوز اصدق .....الحمد لله علي كل شيء ،كل حاجة كانت ميسرة ..كنت زي ما انت علي طول مرتب كل حاجة ،اصغر التفاصيل ....هتوحشني يا ابويا وربنا يرحمك ويجعل قبرك روضة من رياض الجنة ويسكنك الفردوس الاعلي ويثبتك عند السؤال ويارب أكون الولد الصالح الذي يدعوا لك .....مكنتش قادر اسيبك يوم الدفنة كنت عاوز انزلك .فيه سكينة في قلبي بس انا مؤمن وحامد ربنا وعارف انك استريحت وفِي مكان احسن وربنا هيثبتني وان شاء الله في الفردوس الاعلي