كتبت : رانيا نور ... فاكرين أيام حظر التجول لما كانت كل الناس بتروح بدرى، وتعمل حسابها إنها تشترى اللى ناقصها قبل الوقت المحدد، يا سلام والله ماكنتش أيام وحشه بالعكس، علشان كده بسأل إيه المانع لو طبقنا النظام ده بس من غير ما يبقى فى حظر تجول، يعنى مثلا المحلات والمولات تقفل بدرى، عارفين هنوفر قد إيه كهرباء؟ وكمان الناس هتروح شغلها الصبح مبسوطة وهادية، لأنها روحت بدرى وأخدت حقها فى الراحه بالليل، وهتقل العصبية والخناقات، وبدل ما أصحاب المحلات يشغلوا ورديتين بأسعار زهيدة، هيشغلوا وردية واحده بمرتب محترم، ويمكن كمان تقل معدلات الجريمه والسرقات الليلية، ولكن ممكن حد يجى يقولى ده ممكن يؤثر على رزقنا واللى بنكسبه، ولكنى هقوله هو اللى فاتح محله بعد الساعه 10 حيكسب قد إيه ولا كام زبون بيجيله فى الوقت ده، وعلى فكره بلدان كتير متقدمه بتعمل كده زى ماليزيا وتركيا ماتلاقيش محل ولا مول فاتح بعد الساعه 10 والناس هناك محترمه ده.. طب يبقى إيه المانع لو ده حصل عندنا فى مصر؟