* 44مليارات تحية لخادم الحرمين الشريفين الملك عبدالله بن عبدالعزيز على برنامجه لدعم الاقتصاد المصرى، وهى خطوة ليست بغريبة على الملك عبدالله رجل المواقف الذى أثبت ويثبت دائمًا أنه خير صديق عند الضيق.. * واضح إن كلامى عن الزمالك هايجيب لى الكافية.. فقد أغضب منى القراء الزملكاوية اللى ماأقدرش على زعلهم أبدا.. فالأستاذ على شاكر رئيس بنك التنمية والائتمان الزراعى أرسل لى "إنذار روسى" مع إحدى الزميلات يقول لى فيه: مفيش رؤساء تحرير يكتبوا كده عن الزمالك..؟! أما القارئ صلاح دربالة (71سنة) المدير السابق للبنك الوطنى للتنمية، فقد بادرنى فى مكالمة هاتفية مطولة قائلا بعصبية: ما تتقوا الله بقى وبطلوا كلام عن الزمالك.. فالضرب فى الميت حرام..! قلت وأنا أضحك: أكيد حضرتك بتهزر طبعا..!! رد على بانفعال: الكلام دا مافيهوش هزار.. إذا كنتم بتعايرونا بالستة واحد.. فاحنا بنفكركم بالستة صفر..!! سألته: حضرتك بتتكلم بجد فعلا..؟! قال لى بانفعال برضه : أيوه ياسيدى.. أنتم لما تتزنقوا يا أهلاوية تقولوا بنهزر.. لأ.. بقى الموضوع ده مافيهوش هزار.. وأنت لو ماكتبتش تنتقد الأهلى زى مابتنتقد الزمالك فى العدد القادم هاأقاطع المجلة..!! قلت له: ياشيخ.. إوعى تزعل منى يخرب بيت اللى يزعلك ويخرب بيت اللى يزعل الزملكاوية..!! وانتهت المكالمة.. وبقيت كلمة.. وهى إنى مصرى بأحب الأهلى وبأحب الزمالك؛ فالدم الذى يجرى فى عروقى أحمر.. زى فانلة الأهلى.. «وقلبى أبيض بخطين زى فانلة الزمالك»..!! * المتطرف موريس صادق، الذى أسقط عنه القضاء الجنسية المصرية بعد أن دعا لاحتلال مصر.. يجب أن يحاكم بتهمة التزوير فى أوراق رسمية.. فهو يدعى أنه «صادق» مع أنه كداب كبير.. كداب ياخيشة.. كداب قوى..!! * كلمة ورد غطاها: * بذمتك.. هو أوباما ده مابيعرفش غير الكلام وبس.. فين الأفعال؟! * * أنتم حيرتونا.. على الأقل الراجل ده أحسن من الرئيس الأمريكى السابق اللى ميتسماش.. فقد ضيع العالم كله؛ لأنه كان بيعمل.. ومابيتكلمش!!