حسن شبرا ،الزوج و الأب و العامل المشرد ، حياته تجسيد لواقع مؤلم يعيشه السواد الأعظم من فقراء هذا البلد، حلم حياته شقة يحتمي مع أسرته بداخلها ،كلما ضاق به الحال أخرج من جيبه إيصال وزارة الأسكان ليعطيه بصيص أمل بأن رحله العذاب و الشقاء أوشكت علي الإنتهاء ، يتمني عودة قانون الطوارئ ،و يطالب الداخلية بتكثيف حملاتها الأمنيه ،كره و زوجته كلام البرامج و التلفزيونات . ما هي مشكلتك ؟؟؟؟ كنت بشتغل في شركة غاز طبيعي ب6 اكتوبر في مدينه الشيخ زايد قالوا هنعملكم عقود ب6 شهور و بعدين نثبتكم فضلت معاهم سنتين و طلبوا مننا أوراق التعيين علشان يثبتونا و بعد اللف كعب داير علشان نجهز الاوراق دي و في ناس من زمايلي صرفوا 500 جنية علي تجهيز الاوراق دي في الاخر الشركة استغنت عنا و بدل ما تعينا مشتنا. هل لديك أطفال ؟؟؟ متزوج و لدي بلال و حبيبة 6 سنوات و 5 سنوات. ماذا فعلت بعد ترك عملك و كيف تنفق علي أسرتك ؟؟؟ نزلت اشتغلت هنا علي البحر الاول كان الدخل كويس لكن الايام دي حالة البلد نايمة علي الكل و البلطجة في كل حتة مفيش حد ما شي علي البحر الا و شايل مطوة مراتي اتخنقت لما بيبقي في ضرب علي الكورنيش بيكون زي الصحراء و مفيش شغل. و الحل من وجهه نظرك ؟؟؟ المشكلة مش مشكلة الرئيس مرسي او رئيس غيره المهم مين يمشي البلد، الحكومة عليها عبء كبير ،انا عايز قانون الطوارئ يرجع تاني و الكماين و الحملات تملي البلد علشان اي حد ماشي و معاه حاجة يتمسك انا شايف ان كدة امان و حماية لنا بصراحة، الاول الواحد كان بيروح القسم المسجل بيمشي بالفلوس و المحترم يقعد في الحجز الان مش شايف حكومة اصلا، تعبنا من الكلام في التلفزيونات كرهنا البرامج دي اول ما بشوف برنامج من اياهم بقول لمراتي حولي القناة. هل لديك مؤهلات ،شهادات ،أو صنعة تمكنك من إيجاد فرصة عمل أخري ؟؟؟ تركت المدرسة من أولي أعدادي، والدي كان موظف في مصنع الكاوتش بشبرا كان يطلع من الشغل في المصنع يروح يشتغل في محل الكشري لاننا كنا 10 عيال 6 صبيان و 4 بنات، لما اشتغلت كنت باخد يومية 3.5 جنيه بشتغل 8 ساعات في محل كشري كنت أصغر واحد في اخواتي ووالدي كان مكفي البيت لكني سبت المدرسةو نزلت الشغل علشان دي كانت رغبتي انا، لكن لما توفي والدي حسيت بالمسؤلية رغم ان فلوس شغلي كانت لمصاريفي الشخصية كنت بصرفها علي لعب الكرة انا واصحابي كنا بنشترك و نأجر ارض نلعب فيها الكرة و بعد كدة دخلت الجيش اشغال عسكريه بالجبل الاحمر كنت بتهرب من مركز التدريب و الاشغال العسكرية بمهمات السباكة و النقاشة و أعمال طائفة المعمار. جميعها حرف جيدة و تدر عائد وفير علي أصحابها ما الذي منعك ؟؟؟ حال البلد نايم مفيش بجد شغل و أنا ساكن في شقة إيجار ب 450 جنيه لو مدفعتش هيطردوني ،غير مصاريف الحضانة و المدرسة لولادي و الاكل و الشرب مينفعش اعيش علي يوم في و 10 لا . و لماذا لم تتقدم بطلب للحصول علي وحدة سكنية بالاسكان الشعبي ؟؟؟ فعلا اهم حاجة لي و لعيالي اني الاقي شقة ، رحت وزارة الاسكان قدمت ايام الفترة الي فاتت و قالوا الي معندوش مكان يروح الاسكان قدمت و اخدت الوصل و بقالي سنتين علي امل انهم هيسلموني شقة ان شاله اوضة و صاله ترحمني من ال450 جنية ايجار الي بدفعهم كل شهر و الحال نايم اصلا ، ادتهم كل الاوراق الي عايزنها صورة بطاقتي و قسيمة الزواج و شهادات ميلاد عيالي و بطاقة مراتي و بقالي سنتين كل ما تضيق بي اطلع الوصل بتاع الشقة و ابص فيهم و اقول ان شاء الله هانت. طيب زوجتك متعلمة ، و هل بتساعدك في مصاريف البيت ؟؟؟ التعليم زي الزفت مراتي متعلمة معاها دبلوم تمريض كانت بتشتغل انا خلتها تسيب الشغل علشان كان في نبطشيات و بيات بره البيت و ازاي تسيب بيتها و عيالها . هل تأتي بأطفالك إلي الكورنيش ؟؟؟ عمري ما جبتهم علي البحر،و لا جبت مراتي من يوم ما اتجوزت لاني بشوف طلبه المدارس بتهرب من المدرسة و تيجي هنا و المتسولين و مش معرفهم اني بشتغل هنا اصلا ، عايزهم أحسن منيي هعلمهم كويس لحد ميبقوا احسن ناس بلال في كي جي 2 و حبيبة في الحضانه