قال الفريق كامل الوزير، وزير النقل، إن الفيديو الذي تحدث فيه عن اقتراب حصول نادي الزمالك على الدوري العام وتقنية الفار التي حرمت الأهلي من البطولات "مجتزأ وجاء بعد تأكيد احترامه للنادي الأهلي". وأضاف الوزير، خلال مداخلة هاتفية مع برنامج "على مسؤوليتي"، مساء الثلاثاء: "أنا بفرق دايمًا بين الأهلاوي والزملكاوي المتعصب وغير المتعصب.. الفيديو المنتشر مجتزأ وقت ما كنا بنمر في محطة بشتيل وعرقانين وتعبانين، وبتكلم مع أصدقائنا الإعلاميين وأحد الصحفيين الأهلاوية اللي كنت بضحك معاه". وتابع وزير النقل: "أنا قلت كوزير مصري إني بحترم النادي الأهلي وجماهير الأهلي وليا أصدقاء كتيرة مثل الكابتن طاهر أبوزيد والعامري فاروق ومصطفى يونس، والكابتن محمود الخطيب من أحسن اللاعبين وتربطني علاقة جيدة جدًا لكن ظروفنا لم تسمح إننا نتقابل كتير". واستطرد الوزير: "أنا بحب الكل ووزير كل المصريين، لكن أهل الشر اجتزأوا الكلام بتاعي رغم إني قلت لهم مش للتصوير ونشروا الجزء بتاع كلامي عن الفار.. طب أنا بشجع السكة الحديد النادي بتاعنا، وقبله كنت بشجع نادي المنصورة بلدنا، كمان كلنا بنشجع الأهلي والإسماعيلي وبيراميدز وكل الأندية لما تلعب مع أندية خارج مصر". وأضاف وزير النقل: "عايزين ننبذ التعصب وكره الآخر.. ياخونا حبوا بعض وكل المصريين يشجعوا بدون تجريح أو إساءة للآخر، حكامنا مصريين وجلا من لا يخطئ، النادي الأهلي النهارده ماكسبش لكن بكره يكسب، وكام بطولة كسبها قبل كدة".
