قال الكابتن حسام البدري، المدير الفني السابق لمنتخب مصر ردًا على كونه السبب الرئيسي في إخفاق المنتخب المصري في الوصول لكأس العالم: "يا جماعة تاني هنقعد نبعد عن الحقيقة ونودي سوء التوفيق اللي حصل لحتة تانية علشان الناس ماتعرفش الأسباب إيه.. تاني هنعمل كده.. تاني هنفكر بالشكل ده، بدل ما نقعد نبحث في أخطائنا ونشوف المختصين ويتكلموا ويكون في قرارات لصالح مصر والكرة تاني عايزين بعض الناس اللي مش مسؤولين يقولوا حسام البدري السبب". وأضاف البدري خلال استضافته ببرنامج العرافة مع بسمة وهبة على قناة المحور: "اللي بيتكلموا على التصنيف.. غانا كانت تصنيف ثاني واتأهلت، وكذلك الكاميرون تأهلت على حساب الجزائر". وتابع: "شوفوا إيه الأسباب الحقيقية وراء الإخفاق والأسباب اللي ممكن تؤدي إلى تقدم الكرة، وأنا مستعد أشارك برأيي وبالسلبيات الموجودة علشان متتكررش تاني.. أنا هخدم بس وأقول آرائي.. لكن لحد دلوقتي مااتقالش نقعد مع فنيين وكدة". وواصل البدري: "علاقتي باتحاد الكرة مميزة ولو طُلب مني رأيي هقول كل حاجة.. عمري ما هبخل على منتخب مصر بأي حاجة".