طرحت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، قضية الكثافة الطلابية داخل المدارس، على أولياء الأمور، قائلةً: "محتاجة رأيكم كأمهات وأولياء أمور وبطريقة عقلانية.. إزاي نحل كثافة الفصول داخل المدارس.. أولًا: حل عاجل مؤقت. وثانيًا: حل على المدى الطويل". وتفاعل أولياء الأمور من الأمهات، على صفحة اتحاد أمهات مصر، عبر "فيسبوك"، حيث قالت ولي أمر: "يبقى في المدارس اللي فيها كثافة دي الحضور اختياري مش إجباري؛ يبقى من حق ولي الأمر غير المقتدر الحفاظ على ابنه بعدم مرواح المدرسة". وأضافت ولي أمر: "تطبيق الفترتين، بناء مدارس جديدة، تخصيص فلوس المصروفات لبناء المدارس.. كلها حلول في إيد الوزارة والمديرين، مفيش حلول في إيدينا إحنا أصلًا"، وتابعت أخرى: "يقلل عدد أيام الذهاب؛ كل مرحلة لها يومان أو ثلاثة، ونكتفي بالمواد المهمة". واستكملت ولي أمر: "تقسيم أيام الأسبوع، ويكون اليوم كاملًا، وتُقسم السنة على ثلاثة تيرمات زى معظم الدول، وكل تيرم يعتبر امتحانًا منفصلًا، وبكده يعوض نقص الأيام اللي الولاد مش هيروحوا فيها، وده كمان طبعًا مناسب لتالتة إعدادي، أما المدى الطويل فده موضوع تاني، وطبعًا المسؤولية الأكبر على الدولة في بناء مدارس أكثر وتعيين مدرسين أكثر، وأكيد أكيد الزيادة السكانية الرهيبة يكون لها حل". وقالت ولي أمر: "تقسيم الأيام للمدارس اللي كثافتها عالية، مع إلغاء حصص الرسم والأنشطة، والحاجات دي كده كده في المدارس الحكومي مش بتتفعل، والولاد مش بتستفيد منها، وعلى المدى البعيد لازم بناء مدارس وتوسع مساحة الفصل؛ لأن للأسف المباني الجديدة الفصل مبنى صغير جدًّا جدًّا ومش مستوعب عدد الطلبة لو حضروا كاملين في الفصل؛ حتى لو قعدوا 3 في الديسك". وذكرت أخرى: "تقسيم الأيام، والوزير أصلًا كان قايل منذ بداية أزمة كورونا إن نظام تقسيم الأيام سيستمر حتى بعد انتهاء أزمة كورونا، وتقسيم الأيام كمان هيحل أزمة قلة المدرسين، والتقسيم ده يتم عن طريق الوزارة نفسها مش عن طريق مديري المدارس، وذلك بتحديد مثلًا الفصل لا يزيد على 40 طالبًا. أما لو سبناها للمديرين فماحدش هيقسم حاج، بينما الحل على المدى البعيد إنه يوفر فلوس الوجبات المدرسية لبناء المدارس، أما الحل الأوَّلي والأفضل فهو أن يتم بناء مدارس أو استئجار أماكن؛ مثل السناتر وتعيين مدرسين جدد، أو توزيع الصفوف على أيام الأسبوع بمعنى تقليل عدد أيام الحضور للطلاب وجعلها للمواد الأساسية فقط، وعند الاضطرار يمكن جعل المدارس فترتَين؛ لكن من الصعب أن تقوم الفترات بنفس عدد المدرسين الحالي".
